Diosi israelítalaca Egíptobi nechi manlarica jonunca
(Exodo)
Israelítala Egíptobi padeseilainunca
1
Jacóbori, Israel tinun, Egipto toca jinasa, yachi naolanan yabe pejilainue. Aman ya naolachi mumun 2 Rubén, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad, Aser jominlanue. Yalari yalachi familialabe Egíptobi pefelainue. 5 Jerale nechi siete chunca tsachila jominlanue. Aman Jacóbochi nao José mantimini numa Egíptobi chumin jominue.6 Junni Josenan yachi acolanan, junte nechi jun mate sonnaminlanan jera puyalainue. 7 Junnasa israelita tsachilari duque na taminlanue. Junto duque serato, jerale jun tobi duque israelita tsachila joto, sonban jominlanue.
8 Junni Egíptobi casan miyaman inue yari Joseca quiratumin miya. Junni yari yachi tsachilabe itsantinue: 9 Israelítalaca quiralaquede! tinue. Chiquilaca fe duque joto, fe sonban jolajoe tinue. 10 Junni tenca tan jolajosa! Niyantotiya quilaquisa! yape nantari seralaitusa. Pansile chiquilaca pa jominlari quera quilaquinasa, ya israelítalari yalabe peito, chiquilaca pequilaquito, in tobi nechi manjito, chiquilachi tenchi nantari trabajaquilaquituchunae tinue.
11 Junni Egipto tsachilari mantá tanla polaquinue yape israelítalaca sonba trabajaquisa carilaquisa. Junni aman ticatiya senun puebloca quisa carilaquinue yape Faraón ticatiya sesa. (Aman egíptolari yalachi tobi fécari mantá tan miyaca Faraón timin jominlanue.) Ya pueblori Pitón, Ramesés mumun jominue. 12-14 Israelítalaca duque sonba trabajaquisa carilaquinue natiya pacara quituminnan. Ladriyo quisa carilaquinue tobe lapabe palato. Junni israelítalabe duque seiton jolajoto, witabi ti quino jonuncatiya quiniquisa carinaminlanue. Junni tsanque seiton quilaquinasanan, duque seranaminlanue. Junni duque seralainanan, Egipto tsachilari duque jele tinaminlanue.
15 Junni paluca israelita sonalari, Sífrabe Fúaberi, yala na quisa carimin jominlanue. Junni yalaca Faraonni itsantinue:
16 —Nula israelita sonalaca na quisa carinato quiralaquina! tinue sona na jonunca o unila na jonunca. Sona na jonari, totelaquituna! Junni unila na jonari, totelaquina! tinue.
17 Tsan josanan, na quisa carimin sonalari Diosica tennato, Faraón pacaca merátuto, unila nalalaca totelaquitunue. 18 Junni Faraonni ya na quisa cariminlaca jasa carito panhato, itsantinue:
—¿Nalalaca totelaquitunuco? tinue. ¿Ti quichun la pacaca meralaquitiyun? tinue.
19 Junni na quisa cariminlari Miya tito, itsanlatinue:
—Ya israelita sonalari Egipto sonala cuwenta itolajoe. Yalari sonban jolajoe. Chiquila cafetusanan, numa na quica jominla joe latinue.
20-21 Junni israelítala duque seranaminlanue wa bolon icari. Junni na quisa cariminlari Diosica tennaminla jonan, Diosi yalaca senla joe tito, yalachi familialabe sen jominue. 22 Faraón mantimini yachi tsachilaca itsanque mantanue: Jerale israelita unila nalala naica junlaca pibi jera quepolaquina! Juntonan sona nalala nainaminlacari sonnasa quiranilaquina! tinue.