Diosi Moiseca wentenunca
3
Junnasa Moiseri yachi suedro Jétrochi opisaca cuidaimin jominue. Jétrori Madianbi patele jominue. Junni aman tinantiya chutunun tose Moiseri opisaca tape fisa tanjinue. Junbi nenaminnan, Diosichi sen dubi fenue. Ya du Horeb mumun jominue. 2 Junni junte Miya Diosichi anjeli tape quitsabi nin loloncabi quirainue. Junni Moisés junca quiranasa, tapebi nin lunasanan tape natiya ninchi jeraitunue. 3 Junni Moiseri tenca canue: Itsancari numatotiya quiratumanyoe. Junto aman quirabi jichinayoe tinue niyaito tape ninchi jeraitununca. 4 Junni aman Moiseri quirade quelo fenasa Miya Diosi tape quitsabi nechi otinue:—Moisés, Moisés tinue.
—Quelo fatude! Junsi sapatoca laride! Nu wiruranunte lachi sen posto joe tinue.
6 Junsi Diosi itsantinue:
—La nuchi matu to tata Abrahanchi, Isaachi, Jacóbochi Diosi joyoe tinue. Junsi nuchi apachi Diosinan joyoe tinue.
Junni yaca meráto, Moiseri yachi caforoca donue Diosica quirano jele tito. 7 Juntonan Miya Diosiri capaniquito, itsantinue:
—La tsarasica quirayoe lachi tsachila Egíptobi padeseinaminlaca. Seitonla duque trabajaquisa carito waresa carinaminlaca meráyoe. Yala niyaque padeseinaminlaca ura mirayoe tinue. 8 Junto lachi tsachilaca se laribi patacayoe tinue yape egíptola nantanancari mantato talaratusa. Ya tobi nechi larito, uyan toca tanjiyanae tinue. Ayancan toca tanjiyanae. La nulaca tanjino jun tobi duque fino titiya joe tinue cupi, china pi, titiya. Jun tobi amanari cananéola, hetéola, amorréola, ferezéola, hevéola, jebuséola chunun to joe tinue. 9 Israelítala warenaminlaca meracayoe tinue. Egíptola duque seiton quinaminlacanan quiracayoe tinue. 10 Junto Moisés, nu inte nechi manjide! La nuca Egíptoca ereto, jun to miyachica ereyanae yape lachi israelita tsachilaca manlarisa.
11 Junni Moiseri Diosibe itsantinue:
—Te, podeitiyoe. Lari uyanla cuwenta epe tsachiri joyoe tinue. Miyachica jito israelita tsachilaca Egíptobi nechi manlarino natiya podeituichunae tinue.
12 Junni Diosi beco manpato itsantinue:
—Lanan nube peranae. Nuri itsanque miichunae tinue la nuca ereca jonunca. Egíptobi nechi lachi tsachilaca jera mantanjatobi, nula in dubinan laca se tilatichunae tinue. Tsanque mirachunae la nuca ereca joeque.
13 Junni Moiseri Diosibe beco manpato itsantinue:
—Tsan josanan, tenfe jochunae. La junchi jito israelítalabe cuenta quito, nulachi matu to tatalachi Diosi laca eree tiyanae. Junni la tsantinan, yalari beconan panhalaquichunae. ¿Ya Diosi ti mumun jun? latichunae. Junni tsanque panhalaquinari, ¿niyan tiyanan? tinue.
14 Junni Diosi beco manpato itsantinue:
—La jomin joto joyoe. Junsi israelítalabe itsantina! tinue. “La Joyoe” tinun Diosi laca nulachica erecae tina! tinue.
15 Junsi Diosi Moiseca itsantinue:
—Junsi israelítalabe itsantina! Laca nulachica ereminni, Miya Diosi joe tina! tinue. Ya nulachi matu tata Abraham, Isaac, Jacóbochi Diosi joe tina! tinue. Yachi mumun “La Joyoe” tinun joe. In mumun numatotiya joto polechunae tina! tinue. 16 Junni Moisés, jide! Israelita mantaminlaca layato itsantina! Miya Diosi labe quiraie tina! Ya nulachi matu to tata Abraham, Isaac, Jacóbochi Diosi joe tina! Ya israelítalaca jera quiranayoe tie tina! Nulaca egíptola seiton quinanunca quiranayoe tie tina! tinue.
17 Junsi Diosi itsantie tina! tinue. Egíptobi nantari padeseilaitusa lariyanae tie. Egíptobi nechi larito, uyan toca tanjiyanae. Aman jun tobi cananéola, hetéola, amorréola, ferezéola, hevéola, jebuséola chularae. Yari sen to joe. Junbi duque fino titiya joe tina! tinue cupi, china pi, titiya. 18 Junni Moisés, nu israelita mantaminlabe tsantinunsi, yala nuca obedeseilaichunae. Junsi nula Egipto miyaca quirabi jito, itsanlatina! tinue: Miya Diosi chiquilachi Diosi joe tina! Ya jato, chiquilabe tulaie tina! Junto chiquilaca mantato, tinantiya chutunun minu jisa mantaquee tilatina! tinue yachi ticatiya epe cuwato se tibi jichun. Peman ma tsansi nuwiri jinola joyoe tilatina! tinue.
19 Junsi Miya Diosi Moisebe cacuenta quinato, itsantinue:
—Moisés, nulari Egipto miyabe tsantinunsi, la mirayoe nulaca losa carituchunaeque. Lachi sonbabe larisa carinari, tsanquesiri larino jonhoe tinue. 20 Jun tenchi la wepanantsancari quino joanae tinue yape laca jele tito, poden joeque tenhilaisa. La tsanque wepanato quirantsan cosa quinasa, duque egíptola puyalaichunae tinue. Junni tsanhinunbiri Egipto miyari israelítalaca tenca mánta manherechunae tinue.
21 Junsi lari ya egíptolaca seque tenca casa cariyanae tinue. Israelítalari duque sen jolajoeque tenca casa cariyanae tinue. Junto israelítalari Egíptobi nechi lonato, duque mica cosalaca tanjilaichunae tinue. 22 Sona cura quelole chuminlabe o yaca mantaminlabe ti cosacatiya panhanola jochunae. Egipto sonalabe óroca, calaca quica junlaca, o camisa, ticatiya cuwasa panhanola jochunae tinue. Ya camisaca nulachi naolachi o namalachi cuwalaquina! yaca poto nenalarasa. Junto nula egíptolachite nechi lonato, egíptolachi duque sen cosalaca tanjilaichunae tinue.