—In tsachilachi costalibi tricoca tuwaquede! Junsi yalachi costal orócale calacanan manpona! tinue. 2 Junsi debi acochi costalibi lachi copacanan pona! Ya calaca quica jun copaca pona! Trico tenchi cala pacara quica junbe parejo pona! tinue.

Junni José niyaque mantanunca meráto, mayordomo tsanquinue. 3 Junni ayuna nanchi duque quepenanan José yachi acolaca yalachi toca manherenue burolabe. 4 Juntonan pueblole nechi duque nuwiri cajitusanan, José mayordomoca itsantinue:

—Ya tsachilaca bene jide! Yalaca beneitobi, itsantina! ¿Niyaito nulari lachi patronca seiton quilaquiyun? tina! yari nulabe sen josanan. ¿Nulari ti quichun lachi patronchi calaca quica jun copaca tarinlaquiyun? tina! tinue. 5 Jun copabi cuchimin joe. Jun copachinan miimin joe tina! tinue. Duque seiton quilaquinue tina! tinue.

6 Junni mayordomo José panunca merátobi, Josechi acolaca bene jinue. Junni beneitobi, José niyan tica jonunca jera tsantinue. 7 Junni Josechi acola mayordomobe itsantilatinue.

—¿Niyaito nuri chiquilabe tsanque pánayun? tilatinue. Numanan chiquilari tsancaituchunae. 8 Canaanbi nechi itsan tala manjanato, chiquilachi tolobi cala pominca feto mancuwade jalaiyoda latinue. Ya calaca mancuwaminla joto, ¿niyaito nuchi patronchi yabi nechi calaca, oroca tarinlaquino joinhin? latinue. 9 Chiquilachi tolobi calaca quica jun copaca fenari, jun tolo tsacumin puyachunae. Chiquilanan puyano fecári nuchi patronchi tenchi trabajaquinola joichunae pacara quitusanan.

10 Junni mayordomo itsantinue:

—Tsanque jochunae. Juntonan copa taminsiri pacara quitusanan trabajaquino jochunae tinue. Weyanlari culpa itolajochunae tinue.

11 Junni yalari wepana costalica patarito, manca cura foroto quiralaquinue. 12 Mancachi mancachi tolobi mayordomori neyanue caque acochile nechi debi acochi fecári. Junni Benjaminchi tolobi quiranari, junbi ya copa ponue. 13 Junni junca quirato, yalachi tsanpaca chilelaquinue wepananayoeque. Junto burobi manan manpanarito, Joséchica manjilainue.

14 Junni Judabe yachi acolabe Josechi yabi manfelainasa, José juntenan caraminue. Junni yachi cale tobi mutsailainue. 15 Junni José itsantinue:

—¿Niyaito tsanlaquiyun? tinue. ¿La cuwenta miyalari miiminla joeque miitolajoyun? tinue.

16 Junni Judá itsantinue:

—Nuchi cale niyaquenantiya pano pode itolajoyoe chiquilari culpa itolajoyoeque. Diosi casticaquinae matu chiquila jutsa quica jonun tenchi. Inte ralarayoda. Puyano fecári nuchi trabajaquilaqueyanae pacara quitusanan. Copaca costalibi tamin tsachinan tsanque trabajaquichunae tinue.

17 Junni Joseri itsantinue:

—Jeralela inte purainola itochunae tinue. Copa tamin tsachiri trabajaquichun puraichunae tinue. Weyanlari manjiniilaichunae. Monantiya nulaca pasuwatuchunae tinue.

18 Junni Judari Josechi quelole jisi itsantinue.

—Miya, la nube rocainayoe; nube nosasa pano muquee. Niya josatiya, laca pa tenca catude! Nu Faraón tsansi mantá tan joe tinue. 19 Junto nuri apa, aco tayunque panhacae tinue. 20 Nube chiquilachi apa duque unica, aco manca nalalan, talarayoeque palaquiyoda. Chiquilachi apa duque unica josa, ya aco naicae. Chiquilachi apa debi acoca duque muna timinhequenan palaquiyoda. Chiquilachi apachi sona manca paluca nao taminheque palaquiyoda. Manca numa puyacae. In mancasiri ya sonachibi nechi puraicae tinue. Junto yaca duque munarae.

21 Nu quirachun yaca tanjasa ticae. 22 Chiquila nube manpato, ya acori apaca purano podeituchunae latiyoe. Ya puranari, yachi apa puyachunae. 23 Juntonan nuri itsantie: Ya chiquilabe pejatunari, nuri chiquilaca facaricatuanae ticae tinue. 24 Yaca manjitobi, chiquilachi apabe tsanque pasa tie. 25 Junni chiquila tanjica jun trico jerainan, chiquilachi apari manan mancábi jide! tie. 26 Junni chiquilari apabe itsantilatiyoda: Chiquilachi debi aco pejitunari, chiquilanan jino podeitulajoanae latiyoe tinue. Ya chiquilabe pejitunari, trico osiminca quirano podeilaituanae tilatiyoe.

27 Tsantinunsi, chiquilachi apari itsantie: Lachi sona Raquel paluca nao tamin jonunca nula miralarae tie. 28 Ya manca, José, duque numarile nechi itonhe tie. Amana fecári camanquiraitucae tie. Seiton animali toteca jonhoeque mirayoe tie. 29 Lachi manca naocaman tanjinari, ya niyantiya inari, nula culpa talarachunae tie tinue. Wari unica joyoe. Manca nao itoyoe. Yaman niyanni inari, laquichi puyaichunae tie. Chiquilachi apa tsanticae tinue. 30 Junni ya mosori lachi apachi caleri ramin joe. Chiquilabe ya moso manjatunari, 31 chiquilachi apa puyachunae yaca manquiratuto. Chiquilachi apa laquichi puyanari, chiquila culpa tacaichunae. 32 La apabe itsantiyoda: Ya mosoca cuidaiyanae. Ya mosoca mancuwatutori, numasitiya puyano fecári culpa tanae ticayoe tinue. 33 Junto nube rocainayoe. Lari nuchi tenchi trabajaqueyanae yape ya moso yachi acolabe pemanjiniisa. 34 Ya moso labe manjatunari, apachibi manfeno podeituanae tinue. Lachi apa duque laqui jominca quirano muquetue tinue.

Judari Josebe tsanque rocainue Benjaminchi tenchi.