Yachi acolabe Joséyoe tinunca
45
Junni yachi aco tsanque panunca meráto, José wantaino podeitunue. Junni yabe mantaiminlachi cale patuchique, yalaca otito, Inte nechi lolaide! tinue. Mantaiminlaca jera larinue acoyoe tino podeichun. 2 Junni José sonba warenaeque Egíptolachite jeralete mera jominue. Faraonchi fecári mera jominue. 3 Junto José yachi acolabe itsantinue:—La Joséyoe. ¿Lachi apa casonnan? tinue.
Junni yachi acolari yachi cale raminlayoeque duque wepananato, beco pano podeilaitunue. 4 Junni José itsantinue:
—Niya josatiya, lachi quelo falaide! tinue.
Junni yala quelo jinan, itsantinue:
—La nulachi aco Joséyoe tinue. Nula laca Egíptoca tanjisa osicala joe tinue. 5 Juntonan niya josatiya laca osinun tenchi laquiilaitude! Tencachiquenan pa tenca calaquitude! Diosi laca ereca jominhe nulaca se larisa. 6 In tólate palu wata ano mochi padeseilainae. Inte nechi mante wata fecári titiya wacabi tinantiya ituchunae ti waquenasatiya. 7 Diosi laca nulaca caquenan inchi ereca jominhe yape alicala puchuisa, junsi tsachilaca se larisa. 8 Diosi inchi erecae; nula eretucalae. Diosi laca Faraonca payimin suwacae. Junsi yachi yaca, junsi jerale Egipto toca, mantamin suwacae.
9 Junni lachi apachica we manjilaide! Junsi manfetobi, itsantilatina! Nuchi nao José itsantie tilatina! Diosi laca Egipto miya suwaca joe tilatina! tinue. Quirabi jasa tie tilatina! Natiya wanhitude! tilatina! tinue. 10 Junsi Gosén tote sonnachunae tie tilatina! nuchi naolabe, nuchi nietolabe, nuchi animalilabe, junsi titiya tanunbe. Lachi quelole chularachunae tinue. 11 Lari nuchinan, junsi nuchi familialachi ano cuwanae tie tilatina! Junsi mante wata fecári ano caitosanan, nula jeralelachi tinantiya falta itochunae tie latina! 12 Lachi aco Benjaminbe nulabe testicola jolajochunae la tsanque pánanunca. 13 Lachi apabe jera cuenta quilaquina! la Egipto tobi duque mantá tan joeque, junsi titiya jera Egíptobi quiraca jonunca. Lachi apaca we calaquechin! tinue.
Jacóbola Joséchica jilainunca
Junni Jacóbobe yachi familialabe Egíptoca jilainue. Yalari jeralela siete chunca manteca jominlanue. Egíptobi wan fecári chuminnan, Jacobo puyanue. Junca mannaman Canaán toca mantanjato, junte menalaquinue. Menatobi, yachi nalala Egíptoca manjilaito, junte manchuminlanue.