—Manan Egíptoca trico cabi jilaide! chiquila fichun.

3 Junnasa Judari pato itsantinue:

—Ya tsachiri tsarasica pacae tinue. Nulachi aco nacanca tanjatutori, manjalaituna! ticae tinue. 4 Junni nuri Benjaminca chiquilabe peerenari, trico cabi jilaiyanae tinue. 5 Juntonan Benjaminca eretunari, chiquilanan jitulajoyoe tinue.

6 Junni Israéliri, yanan Jacobo joe; yari itsantinue:

—Nulari laca duque seiton quilaquinae. ¿Ya tsachiberi ti quichun aco manca tanyoe tilatiyun? tinue.

7 Junni yalari itsanque beco manpalaquinue:

—Yari chiquilabe duque duque panhae chiquilaca, junsi chiquilachi familialaca. Nulachi apari casonnanque panhae. Junsi manca aco talarayunque panhae. Junni panhanari, chiquilari jera panilaquiyoe. Natiya miilaitiyoe manca acoca tanjasa tino jonunca.

8 Junni Judari yachi apa Israélibe itsantinue:

—Ano mochi puyatuchun ya náca peerede! tinue. Lari seque cuidaiyanae. We jintsan joe monantiya ano mochi puyatuchun, nunan, chiquilanan, junsi chiquilachi nalalanan. 9 Lari ya náca miranae. Niyanhinatiya, la miranae tinue. Intenan mancuwapotutori, nuchi cate numasitiya culpa joanae tinue. 10 Inte tsancari wanhitumanpari, palu ne jito manjaca jono jominla joinhie tinue.

11 Junni Jacóbori yachi nao Judabe itsantinue:

—Wari uyan quiraque niyanantiya ituntsan jonari, itsanquilaquede! Ya tsachichi epe cuwachun inte imin fe sen cosaca costalibi poto tanjilaide! tinue. Bálsamo tinun puban pi, china pi, junsi mira tinun puban pi, nues tinun puca, almendra tinun pucaca tanjilaide! tinue. 12 Junsi calaca palu tsansi mantanjilaide! Junto nulanan yachi mancuwalaquina! Pansile pansito ya calaca costalibi manpoca jominla jonhoe tinue. 13 Nuchi aco nacanca tanjito, manan manjilaide! ya tsachichica. 14 Jera podeimin Diosiri ya tsachica nulaca laquirasa carichunae tinue yape nulachi manca acoca manheresa, junsi Benjamíncanan dotusa. Juntonan lari nao iton puraino jotori, nao iton purainiiichunae tinue.

15 Junni Jacóbochi naolari ya tsachichi epe cuwano jonunca can, junsi cala palu tsansica can, junsi Benjaminca petanjito, aman Egíptoca jilainue. Junni yalari Joséchibi felainasa, 16 Joseri Benjamín yalabe pejanaminca quirato, yachi mayordomobe itsantinue:

—Ya tsachilaca lachi yaca tanjide! tinue. Junsi wala manca toteto dalaquina! tinue. Yalari amana quitsa mate labe ano pefinola joe tinue.

17 Junni mayordomori José mantacaca, jun tsannan jera quinue. Junni yanan ya tsachilaca Josechi yaca jera tanjinue. 18 Juntonan yalari Josechi yaca tanjinasa, duque wepananato yala tala itsanlatinue:

—Seiton quechique tanjinhinae. Matu costalibi manpomin cala tenchi epe trabajaquisa carichunae chiquilacanan, junsi chiquilachi animalilacanan.

19 Junni yalari ya fenobi jinato, mayordomochi quelole jito itsanlatinue:

20 —Chiquilari matu man ne trico cabi jaca jominlayoe latinue. 21 Juntonan jun mate manjinaminnan quebi inasa catsochun pensionbi jera costalica patarilaquiyoe. Junni foroto quiranari, trico tenchi cuwaca jun calari jera costalibi manpominhe latinue. Juntonan amana ya calaca mantanjalaiyoe mancuwachun. 22 Junsi weyan calacanan tanjalaiyoe trico cachun. Juntonan matu calacari mo chiquilachi costalibi manpoca jonuncari miitolajoyoe latinue.

23 Junni mayordomori manpato itsantinue:

—Wepanatulajode! Nulachi, junsi nulachi apachi, Diosi ya calaca nulachi costalibi manpoca jomin jonhoe tinue. Nula cuwaca jun calacari la caya jomanyoe tinue.

Junsi ya mayordomori Simeón doraminca manlarito, yachi acola ranunte tanjanue. 24 Junto aman Josechi yaca jera tanjinue. Junsi junbi tanfeto, pi cuwanue yape nede tsalelaquisa. Junsi yalachi burochi ano cufinue. 25 Junni yalari meraca jominlanue junte Josebe ano pefinola joyoeque. Junto quitsa mate José janasa, epe cuwano jonunca cuwachun méraminlanue.

26 Junni José yabi fanunsi, yalari epe cuwachun tanjica junca cuwalaquinue. Junsi Josechi cale telenhito, tobi mutsailainue. 27 Junni Joseri yalabe itsanque panhanue:

—¿Nulari senan jolajoyun? tinue. ¿Junsi nulachi apanan senan jun? ¿Casonnan? tinue.

28 Junni yalari duque respetaito, junsi jelerato pato, itsanlatinue:

—Chiquilachi apa senan joe latinue. Casonnae latinue.

29 Junni Joseri yalachi awinta jera quirato, yachi nácan aco Benjaminca quiranue. Junni itsanque panhanue:

—In nulachi nácan acoca pacalae, ¿ya jun? tinue.

Junsi Benjaminca pato, nao, nuca Diosi bendesiquisa tenjae tinue. 30 Jun tsantisi, Joseri yachi acoca manquirato, duque sonchinan warechi tinaminue. Junsi we yachi tamochi manwito, warenue. 31 Junni wareno deitobi, caforo tsalen quito, tamochi nechi manlosi, yachi peyunlaca pato, anoca fichun tanjalaide! tinue.

32 Junni Joséchiri manca mesabi ano tanjato cuwalaquinue. Junsi Jacóbochi naolachiri chican mesabi ano tanjato cuwalaquinue. Junsi weyan Egipto tsachilachiri manca mesabi ano tanjato cuwalaquinue. Egipto tsachilari Hebréolabe parejo ano fituntsan joe timin jominlanue. 33 Junni Josechi acolari José niyaque chudisa tinatiya, tsanque chudilainue ano fichun. Caque acole nechi debi aco fecári chudisa mantanue. Junni yalari duque wepanalainue niyaito mirananque mo caque aco jonunca, junsi mo debi jonunca.

34 Ano poto cuwaminlari Josechi mesabi nechinan ano cato, yachi acolachi cuwalaquinue. Juntonan Benjaminchi fécari cuwalaquinue. Weyan acolachica mante tsansi cuwalaquinue. Junni Josechi acola yabe duque ano fin, cuchin, quito son tilatinue.