—¿Niyaito nulari inte tinantiya quituto chularayun? tinue. 2 Egíptobiri duque trico jotie tilatie. Nulari junchi jito, trico calaquechin! tinue chiquila ano fichun, junto ano mochi puyatuchun.

3 Junni Josechi chunca acolari Egíptoca trico cabi jilainue. 4 Juntonan Jacóbori Benjamíncari peeretunue. Yari jun ayanbinan Josechi aco jominue. Tsanque Jacóbori Benjaminca eretunue pansile junchi jinato niyantiya ichunae tito. 5 Tsanque Israélichi naolari uyanla tsanquenan trico cabi jinaminlabe parejo pejilainue. Junni piyanle Canaán tobi ano fino itonan, duque tsachila trico cabi pejinaminlanue.

6 Junni Egíptobi José miya jominue. Yari niyanlatiya uyan tobi nechi trico cabi jaminlachi trico osimin jominue. Junni Josechi acolari Egíptobi féto, yachi cale telenhito, tobi mutsailainue.

7-9 Junni Joseri yachi acolaca quirato, moora miinue yachi acola jolajoeque. Juntonan miitumin tsanni inue yape tenhilaitusa. Junni Joseri numari quipica mantenhinue. Junto itsanque sonba seitonque panue:

—¿Nulari nunchi nechi jalainayun? tinue.

Junni ya acolari Canaán tobi nechi trico cabi jalainayoe tilatinue. Joseri yachi acolaca manmiinasanan, ya acolari Joseca miilaitunue. Junni Joseri yalabe itsantinue:

—Nulari seiton tsachila jolajoe tinue. In tobi niyaque jonunca jera quiracabi jacala joe tinue. Chiquilaca niyaque quera quintsan jonunca quiracabi jacala joe tinue.

10 Junni yachi acolari itsantilatinue:

—Miya, te, chiquilari seque jalainayoe; trico cabiri jalainayoe latinue. 11 Chiquilari jeranan man apachiri naola jolajoyoe. Sen tsachilayoe tilatinue. Numatotiya quiracato nenatuminlayoe.

12 Juntonan Joseri itsantinue:

—Te, natiya tsa itoe tinue. Nulari in tobi tile cumana posto jonunca quiracabi jalainue.

13 Junni yalari duque respetainato itsantilatinue:

—Chiquilari chunca paluca acolayoe; junsi Canaán tobi chularayoe tilatinue. Chiquilachi aco fe nacanni chiquilachi apabenan puraicae. Junsi manca acori numari mánta chiquilabe peitonhe tilatinue.

14 Junni Joseri junca merasi, itsantinue:

—Nulari tsanan quiracato nenamin jolajoe tinue. 15 Junni itsanque miintsan joe tinue. Faraonchi tenchi juraquito pánayoe. Nulari inte nechi manlolaituchunae nulachi manca aco inchi jano fecári. 16 Nula manca jito, nacan acoca tanjana! Weyanlari inte doralarachunae. Tsanque miiyanae nulari tsa paminla jonunca. Tsa itonari, nulari quiracato nenamin jolajochunae. Faraonchi tenchi tsanque juraquito pánayoe tinue.

17 Junni Joseri yalaca peman ma fecári do taminue. 18 Juntonan aman itsantinue:

—Lari Diosica jelerato respetaimin tsachi joyoe tinue. Nulari itsanquilaquitori, puyalaituchunae. 19 Tsanan sen tsachila jolajotori, nula manca aco inte puraichunae. Nulari trico cato manjinilaide! yape nulachi familiala ano filaquinasa. 20 Juntonan nulachi nácan acoca tanjalaina! Junnunbi aman miiyanae nulari tsa paminla jonunca. Tsa paminla itotori, puyalaichunae tinue.

Junni yalari se joe tilatinue.

21 Junni yala talari itsantilatinue:

—Chiquilari matu mate chiquilachi aco Joseca duque seiton quicala joyoe. Yari laquiralaradeque duque rocainasanan, chiquilari merátucalayoe. Duque padeseinaminca quiranatonan, natiya laquiratucalayoe tilatinue. Junni chiquilari jun tenchi amana itsanque padeseino patilainayoe tilatinue.

22 Junnasa Rubenni itsantinue:

—Lari pánamanyoe Joseca tsanque seiton quilaquitusaque. Juntonan nulari la pacaca natiya merátucalae tinue. Junni amanari duque padeseinola joyoe tinue Joseca seiton quiminla jonun tenchi.

23 Junni yalari miitominlanue Joseri yalachi fiquica merámin jonunca. Joseri yalabe cuenta quinato, Egipto fiquichi pánaminca manca tsachi yalachi fiquichi manpolarinaminue. 24 Junni Joseri yachi acola niyaque cuenta quinaminlaca meráto, duque laquiito, uyanchi jito warenue. Junni yala ranunte manjato, manan yalabe pano podeito, Simeonca chican larito, jeralela quiranasa telesa carinue. 25 Junsi aman yalachi costalibi trico posa mantanue. Junni mayordomobe nosale pato, yalachi costalibi calacanan pepona! tinue. Trico tenchi cuwaca jun calaca trico costalibi manpolaquina! tinue. Junsi minute jinato filaquisa ano cuwasa carinue. 26 Junni yalari tricoca burobi jera panarito, aman junte nechi manjilainue.

27 Junni quebi inasa catsochun, junsi burochi ano cufichun, costalica patarilaquinue. Junni yala manca yachi costalica foroto quiranari, junbi trico tenchi pacara quica jun calari jun costalibi manpominue. 28 Junni yari yachi acolabe itsantinue:

—Quiralaquede! Lachi trico tenchi cuwaca jun calaca inbi manpocala joe tinue. Ina poe tinue lachi costalibi.

Junni ya acolari duque wepananato, junsi jelechi jowinponato, yala tala mancabe mancabe itsanlatinue:

—¿Diosiri niyan quinan? tilatinue.

29 Junni Canaán tobi manfato, yalachi apabe itsanque cuenta jera quilaquinue:

30 —Egipto tobi mantamin miyari duque paito, seitonque pato itsantie latinue: Nulari quiracabi in toca jacala joe tie latinue. 31 Junni chiquilari sen tsachila jolajoyoe tilatiyoe. Junsi numatotiya quiracato nenatuminlayoe tilatiyoe. 32 Junsi chiquilari chunca paluca acolayoe tilatiyoe. Man apachiri nalalayoe tilatiyoe. Juntonan manca acori numari mánta chiquilabe peitonhe. Junsi fe nácan acori Canaánbinan nubenan puraicae tilatiyoe. 33 Junni yari itsantie: Nula tsanan sen tsachila jotori, nulachi aco mancaca inte labe puralaquede! tie. Junto nulari trico cato, nulachi familialachi tanjilaide tie. Junni nulachi debi acoca tanjalaina! 34 Yaca tanjalainari, aman quereiyanae nulari sen tsachila jolajoeque. Junni nulachi manca acoca manhereyanae. Junnan nulari Egíptobi necosio quino podeilaichunae tie latinue.

35 Junni Josechi acolari trico costalica jera foroto quiranari, jun jeralelachibinan trico tenchi cuwaca jun cala manponue. Tsanque jera costalibinan cala tolo nacá manpominca quirato, duque wepanalainue. Yalachi apa Jacóbonan quirato, yanan duque wepananue. 36 Junsi Jacóbori itsantinue:

—Nulari laca nao iton suwalaquinae tinue. Josenan chiquilabe peitonhe. Junsi Simeonnan itoe. Aman junsi Benjaminca mantanjichi latinae tinue. Tanjin cura lasiri laqui pasaimin joyoe tinue.

37 Junnasa Rubenni yachi apabe itsantinue:

—Benjamíncari la cuidaiyanae. Sencanan mantanjato mancuwanae tinue. Junni tsanque sencanan mantanjatunari, nuri lachi paluca naolaca totena! tinue.

38 Junni Jacóbori beco manpato, itsantinue:

—Lachi nao Benjaminni nulabe pejituchunae tinue. Yachi aco Joseri puyacae. Amanari Benjamín mancasiri puraicae. Lari wari duque unica joyoe. Junnasa Benjamín junchi jito, niyanni ito manjatunari, laquichi puyaichunae tinue. Junni nulari culpa talarachunae tinue.