5 Jun nasi wanbile manaman mancatsonan, manaman quipinue. Jun quipibiri sieteca trico taran man pelebiri ica joe. Uraran lunca joe. 6 Junni aman jun benele sieteca sen taran ranunbinan, man sieteca seiton taran lae. Yalari chiban wuchi jequen ica jun, junsi niyaca jun joe. 7 Junsi aman in taranni uraran sen taranca jera fie. Junni aman Faraonni mansonhito, moora tenhinue quipi joeque.

8 Junni Faraón yachi tsanque quipinan, ayuna nanchi quepenan duque wepananaminue. Junsi aman Egipto ponelalaca, junsi Egíptobi miiminlaca yachica jalaisa mantanue. Junni aman Faraonni yachi quipica jera cuenta quinue. Junni ponelalari, o miiminlari, ti niyaque quipi jonunca monantiya miino podeilaitunue. 9-10 Junni aman Faraonchi bino poto cuwaminni itsantinue:

—Faraón, niya josatiya nasi meráde! tinue. Lari duque numari quipica ura miimin tsachibe tulaito, nube yachi tenchi cuenta queyanae tica jomanyoe tinue. Junni lari seiton pansimin joto, nube cuenta quino pansica jomin joanue. Junni meráde! Itsanque jominue tinue: Nu labe pa jominhe tinue. Junsi bibu quimin jominbenan pa jominhe tinue. Junto chiquilaca doranun yaca ereca jominhe tinue nuca cuidaimin soldado capitan ranunte. 11 Junni jun doranun yabi man quepen bibu quimin jominchi quipinue tinue. Junto lachinan quipiquee tinue. Junni quipi cura chiquila miisa jominue tinue. 12 Junni aman chiquila doranun yabi hebreo tsachi manca capitanchi peyun jominhe tinue. Junni aman chiquilari chiquilachi quipica yabe palaquiyoe. Junni yari ti niyaque quipi jonunca chiquilabe jera manpae tinue. 13 Junni ya paca, jun tsanquenan paticae tinue. La tsanquenan lachi trabajobi manwicayoe tinue. Junsi bibu quimin jomincari tsanquenan sopeto totecalae tinue.

14 Tsantinunsi, Faraonni Joseca cabi erenue. Junto Joseca donun yabi nechi wewe larilaquinue. Junni José junbi nechi manlotobi, tese quin, uyan tsanpa manpon, quito, Faraónchica jinue. 15 Junni Faraonni itsantinue:

—Lachi quipiquee tinue. Juntonan ya quipi ti niyaque quipi jonunca pamin monantiya itoe tinue. Juntonan la nuca meráyoe tinue nu quipica meráto ti jono jonunca miimin joeque.

16 Junni Joseri beconan pato, itsantinue:

—Yari lachi mite itoe tinue; Miya Diosi micuwamin joe tinue. Junto Miya Diosi seque miisa carichunae tinue ya quipi ti niyaque quipi jonuncatiya.

17 Junni Faraonni junca meráto, Josebe itsantinue:

—Lachi quipibiri lari Nilo pi fiquile wirurayoe tinue. 18 Junni jun wirurasa quiranari, jun pibi nechi sieteca uraran mulun wala lalaimannue tinue. Jun latobi, lapa filaquinae tinue. 19 Junni yalachi benele man sieteca wala quiyanpun, jelenquiranlaman lalaimannue tinue. Egíptobi numatotiya tsancari quiyanpun walacari quiratumanyoe tinue. 20 Junsi ya quiyanpun jelenquiran walari caque sieteca sen walaca jera filaquee tinue mulun jominlaca. 21 Ya mulun walaca fica jototiya, jun tsannan cajolajoe. Casale cuwentanan quiyanpun cajolajoe tinue. Junni tsanque quipinunsi, mansonhiyoe tinue.

22 Junni wanbile manaman quipiquee tinue. Jun quipibiri itsanque jominhe tinue: Man pelebinan sieteca uraran lunca trico taran joe tinue. 23 Junni yachi benele man sieteca taran ie tinue. Yari jequen, junsi cumana tsanini taran joe tinue. Junto chiban wuchi niyaca jun joe tinue. 24 Ya seiton taran sieteca uraran sen taranca jera fie tinue. Lachi tsanque quipinunca miiminlabe jera cuenta quiyoe tinue. Juntonan yalari monantiya pano podeilaitue tinue ya quipi ti niyaque quipi jono jonunca.

25 Junni Joseri Faraonbe beco mantulanto, itsantinue:

—Faraón, ya paluca quipibe man cosasiri miintsan joe tinue. Jun quipibe Miya Diosi nube pánae tinue ya niyan quino jonunca. 26 Ya sieteca sen walari siete wata joe tinue. Junsi sieteca sen taranni, yanan jun siete watanan joe. Ya paluca quipiri man quipiri joe tinue. 27 Junsi ya sieteca quiyanpun jelenquiran walari, man weyanlachi benele laminlari, yalanan man siete wata joe tinue. Junsi sieteca taran jelenquiran, chiban wuchi niyaca junni, yanan jun siete watanan joe tinue. Jun siete watate titiya jera falta jochunae tinue.

28 Junto nube itsantinayoe tinue. Miya Diosi inca nube pánae tinue ya ti quino jonunca. 29 Egíptobi casale siete wata duque titiya ano fino tsanla jochunae tinue. 30 Jun sieteca sen wata jerainunsi, aman siete wataca titiya ano fino michi itochunae tinue. Jun watate Egíptobi chuminlari duque padeseinato, duque tamin jominlayoeque mantenhilaituchunae tinue. 31 Titiya jera falta jochunae tinue. Junto casale duque jominnan natiya puraituchunae tinue. 32 Nuchi palu ne quipinue tinue. Junto securo joe tinue Miya Diosi tsanquichunaeque. Junto moora tsanquichunada.

33 Junni Joseri Faraonbe cacuenta quinato, itsantinue:

—Nuri tenca oco sen tsachica wentede! yape in tote mantamin josa. 34 Itsanquede! Cobernadorila suwade! yape jera in tote tricoca layalaquisa. Yalari in tote jeralete nenato, trico ticatiya mante quintalibi, man quintali calaquichunae. Siete wata fecári duque titiya jominca tsanque calaquichunae jera Egíptobi. 35 In sen watate duque trico jominca jera layato nuchi cuwaponan, jerale pueblobi duquintsan jochunae tinue yape tsachilari fino talarasa. 36 Tsanquitori, trico ituno watate in tote trico tano podeicaichunae tinue yape tsachilari ano mochi puyalaitusa.

37 Junni Josechi fiquica Faraonchi, junsi yachi tsachilachinan, sele merajanan, 38 Faraonni yalabe itsantinue.

—Duque neyanatotiya, in Joseca fe sen tsachica fetucaichunae tinue. Inni Diosichi Tenca pun tsachi joto, duque tenca oco joe tinue.

39 Junsi aman Josebe itsantinue:

—Monantiya nu cuwenta fe tenca oco, junsi miramin, itoe tinue. Miya Diosi nuca in quipica jera miisa carie tinue. 40 Junto lachi tobi mantamin jona! tinue. Junnan lachi tsachila nuca jera meralaquichunae tinue. Juntonan lari nuca fe joanae tinue miya joto. 41 Meráde! La nuchi mantá cuwachinayoe tinue yape Egíptobi jera mantamin josa.

42 Faraonni tsantisi, yachi aniyo seyo punca yachi tedebi nechi larito, Josechi tedebi pocarinue yape yachi tenchi mantasa. Junto aman uraran sen lino panuca posa carinue. Junsi Josechi cudanbi oro cadena pocarinue. 43 Junsi yachi benele jamin carobi chuteto petannenaminue. Junsi Josechi caquele otiminca erenue yape fe mantá tan José janae tito, joqueilaideque otisa. Joseri tsanque Egipto tobi duque mantá tan inue. 44 Junni Faraón itsantinue:

—La Faraón josanan, nu jera mantachunae. Nu mantá cuwatunari, Egíptobi monantiya tinantiya quino itolajoe tinue.

45-46 Junto aman Faraonni Joseca Egipto to mumun poto, Zafnatpanea mumun ponue. Junsi Joseca Asenabe casalaisa carinue Potiférachi namabe. Ya Potifera On tinun pueblobi patele jominue. Aman José doraminca larito, Egipto miyachica tanjino mate peman chunca wata taminue. Junni Joseri Faraonbe despediisi, jerale Egíptobi quirato nenabi jinue.

47 Junni siete sen wata jeraino fecári, Egíptobi duque titiya imin jominue. 48 Aman junni jun sieteca sen watate Joseri duque tricoca quelole pueblolabinan dusa carinue. 49 Junni Joseri trico layasa carinato quiranari, lamaribi tsalan tsomin tsansi jominue. Tsancari duque trico jonan, wari nisi jonunca mino podeituto, mino deilainue.

50 Aman junni titiya itono wata caitosanan, Joseri yachi sona Asenabe paluca na taminlanue. 51 Junto yachi casale náca Manasés mumun ponue. Junni “Manasés” tito, Miya Diosi ya padeseinacaca, junsi yachi jerale familialacanan, jera pansisa carinue tito tsantinun jominue. 52 Junsi junte nechi yachi manca náca Efraín mumun ponue. “Efraín” tito, Miya Diosi ya padeseinun tote na tasa carinue tito tsantinun jominue.

53 Junni Egíptobi jun siete wata duque titiya joto polenunbi, 54 aman junsi siete wata tinantiya iton inue. José paca jun fiqui jun tsannan inue. Jerale uyan tobi ano fino itosanan, Egíptobiri ano fino taminlanue. 55 Aman junni Egíptobi chumin tsachilari ano muquin tilatinato, Faraonbe trico panhabi jilainue. Junni Faraonni piyanle Egíptolabe itsantinue:

—Joseca quiralaquechin! tinue. Ya niyantiya quisa mantanatiya, nulari tsanquinilaquina! tinue. 56 Aman junni jerale tote ano muquin tilatinasa, Joseri trico dunun ya doranunca jera lasinue Egipto tsachilachi osichun. Ma cura fe ano muquede muquede jinaminlanue. 57 Junni ano fino itonan, jerale tote nechi Egíptoca jamin jominlanue Joséchica trico cabi.