José paluca tsachilachi quipica miinunca
40
1-2 Junni José dorasanan, Egipto to miyari paluca tsachilabe pa joto, yalaca ya doranun yabi donue. Manca tsachiri miyachi bino poto cuwaminla tala mantá tan jominue; manca tsachiri miyachi bibu quiminla tala mantá tan jominue. Yala seiton quicala joe tito dosa carinue. 3 Junto yalaca Capitan Potifar ranunte dosa carinue. Junbi Josenan doraminue. 4 Juntonan jun donun yabi mantamin tsachiri Josebe pato, in paluca doiminlaca cuidaina! tinue. Junni yalari jun doranun yabi duque ma polelainue.5 Aman man quepentenan yala palucachi quipinue. Yalachi quipi yala miisa jominue. 6 Junni Joseri quepenan quirabi janasa, yalari duque wepananaminlanue. 7 Aman junni Joseri itsanque panhanue:
—¿Nulari niyaito tsancari laqui jolajoyun? tinue.
8 Yalari beconan manpato, itsantilatinue:
—Chiquilachi quipiquee. Juntonan interi chiquilachi quipica junca monantiya miiminla itochunae latinue.
Junni yaca meráto, Joseri itsantinue:
—Diosiri quipica miisa carimin joe tinue. Yari miisa carino podeichunae tinue. Junni quipica labe cuenta quinilaquede! tinue.
9 Aman junni miyachi bino cutsawomin jomin tsachiri yachi quipi quiracaca itsanque jera cuenta quinue:
—Lachi quipibiri uba man silibi peman ali chun joe tinue. 10 Aman junni ya siliri uwaito luli ie; junsi aman uba taranhito, ya uba lunca ie tinue. 11 Junsi aman lari Faraonchi copaca tedebi tayoe. Junni la ya ubaca cato, jun copabi churule ponayoe tinue. Junsi aman ya copaca Faraonchi tedebi cuwayoe tinue.
12 Junni yaca meráto, Joseri itsantinue:
—Nuchi quipiri itsanque joe: Peman aliri peman ma joe. 13 Nuca Faraón peman mate jera meráto miito, nuca culpa itoe tichunae tinue. Junto nuca manaman nuchi trabajobi manpochunae tinue bino poto cuwasa casale cuwenta. 14 Juntonan lari nube man fabor rocaino muquee tinue. Faraónchibi féto, laca mantenhina! Junto Faraonbe cuenta quina! Pansile Faraón laca in donun yabi nechi manlarichunae. Laca laquirana! 15 La culpa itoyoe. Laca hebréolachi tobi nechi uyanlachi osicalae tinue. Junto in donun yabi chuno itoyoe tinue.
16 Junni aman miyachi bibu quimin tsachiri José pánanunca meráto, moora tenhinue mancachi quipi sen jominueque. Junto yanan yachi quipica Josebe itsanque cuenta polarinue:
—Lachi quipibiri lari peman tasá bibuca lachi misubi tayoeque quipiquee tinue. 17 Junni aman jamote tasábi Faraonchi pinban bibu pominhe. Junca pichulari jajato, tasábi bibu pominca jera finilaquee tinue.
18 Junni José ya pacaca meráto, itsantinue:
—Nuchi quipiri itsanque joe: Peman tasá, yanan peman ma joe tinue. 19 Junni Faraonni nuca peman mate jera meráto miito, aman nuca totesa carichunae tinue. Junto aman nuca chide pelebi sopele wilocarilaquichunae tinue. Jun wiloraminca barola jato, nuchi tsachicaca jera filaquichunae tinue.
20 Junni jun tsanticale nechi peman mate Faraonchi wata tula ma jominue. Junto aman Faraonni jerale yachi cotole mantá tanlachi tenchi wa fiesta quinue. Junto aman yalachi cate Faraón yachi bino poto cuwamin jomin tsachica, junsi yachi bibu quimin jomin tsachica, donun yabi doraminlaca manlarisa erenue yape yachica tanjalaisa. 21 Junni yachi bino poto cuwamin jomin tsachicari yachi bino manpoto cuwamin mansuwanue. Junni Faraonchi bino manpoto cuwamin manhinue casale cuwenta. 22 Juntonan bibu quimin jomin tsachicari chide pelebi sopele wiloisa carinue. Junni José paca jun, tsanquenan jominue. 23 Juntonan Faraonchi bino poto cuwamin tsachiri Joseca pansinue.