Jacóbobe Esaúbe nailainunca
21 Aman Isaachi sona Rebeca na tano podeitumin jominue. Jun tenchi Isaari Miya Diosibe rocainue. Junni tsanque rocainan, Rebécari paluca na winue.
22 Junni ya nalalari ayanchi pecolobi quicaalaquinaminue. Junni Rebeca itsantinue:
—Tsanque padeseino jotori, puyaca jomanpari fe se jono jomin jonhoe tinue.
—Nuchi pecolobi paluca nalala polarae tinue. Ya nalalari paluca wa bolon tsachila jonola joe. Juntonan yala tala numasitiya pa tala jolajochunae tinue. Junto na caituminnan, numa quicaalaquinae tinue. Junni manca nari mancaca fe sonban jono joe tinue. Benechi nari caque náca mantachunae tinue.
24 Junni aman Rebécachi na quino tula ma fenan, palucale nailainue. 25 Casale naimin luban misu jominue. Junsi piyanlete fusiri jominue. Jun tenchi yaca Esaú mumun polaquinue. 26 Junni benete yachi aco nainue. Yari nainato, tedechi Esaúchi nede tacaca churaminue. Junto yaca Jacobo mumun polaquinue. “Jacobo” tito, josoleminca tsantinun joe. Rebeca na quinasa Isaari sota chunca wata taminue.
Esaúri caque naochi mantá jono jominca Jacóbochi cuwanunca
27 Junni uwailainue. Junto uwaitobi, Esaúri duque jelenchi jimin jominue. Duque peque camin jominue. Junni Jacobo mantimini pansi chuniramin jominue. Junsi yatesiri chuchi timin jominue. 28 Junni Isaari Esaú jelenchi ticatiya caya junca fichi timin joto, yaca fe laqui timin jominue. Junnasa Rebécari Jacóboca fe duque laqui timin jominue.
29 Junni man mate Jacóbori ticato danaminue. Junnasa Esaúri jelenchi nechi duque pepa manfanue. 30 Junto Esaú itsantinue:
—Jacobo, niya josatiya ya luban anoca nasi cuwade!
(Junni Esaú lubanca fichi timin jonun tenchi, yachi alicalacanan “lubanla” tinun jominlanue. Yalachi fiquichi lubanca “Edom” timin jominlanue.) 31 Junto Esaú tsanque panhanan, Jacóbori itsantinue:
—Nuri caque na joto, chiquilachi apa puyanunbi laca fe jono joe. Laca fe mantá tan joto, jun erensiaca fe duque cano mantá tachunae. Junni lari in anoca cuwanae tinue. Juntonan nunan ya mantaca lachi cuwade! tinue.
32 Junni Esaú itsantinue:
—Nuri laca ano mochi puyanaminca quiranae tinue. Tsanque ano mochi puyanari, caque na jonun tenchi mantá epe jochunae tinue.
33 Junni Jacóbori itsantinue:
—Junni juraquito pade! tinue nuchi mantaca lachi cuwachinayoeque.
Junni Esaú juraquito panue. Junni tsanque yachi mantaca Jacóbochi cuwanue. 34 Aman ya luban anori lenteja jominue. Junni Jacóbori ya lentejabe bibube Esaúchi cuwanue. Junca jera fito, Esaúri mancupato jinue caque nao cano jominca tennatuto.
Junni manca mate Isaari unica joto, itsantinue: La capuyatuminnan lachi caque na Esaúca bendesiquino muquee tinue. Junni Esaúbe Jacóboberi tsanque trato quica jominlanue. Jun trato tenchi Isaari caque náca bendesiquinato, Jacóbocari bendesiquino jominue. Junni Jacóbori apabe nene pánan, apari Esaúca bendesiquinayoe tenhinue. Tsanque Jacobo nene patonan bendesiinue.
Jacóbochi quipibi Diosi quirainunca
Junni Esaú Jacóboca duque paito, toteno tenca canaminue. Junni Rebécari Jacóbochi ayan joto yaca isaino munaraminue. Junsi Jacóboca Canaán tobi chumin sonaca catusa tenca canaminue. Junto yabe Isaabe Jacóboca yalachi familiala chunun toca erelaquinue Harán puebloca. Junte Jacobo yalachi ni sonaca cano podeino jominue. Junni Esaúri nuwiri chuto, toteno podeitunue.