28
Junni Jacóbori Beerseba tinun pueblobi nechi loto, Harán puebloca jinun minuse jinue.11 Junni nasi jinaminnan, yo numa wica jonan, minute catsochun purainue. Junto su manca cato, junbi misunhito catsonue. 12 Junni junte yachi quipinue. Jun quipibi teranca tobi nechi yoquido fecári joeque quipinue. Junni Diosichi anjelila jun terancabi patan, manlon, ilainaeque quipinue. 13 Junsi Miya Diosiri teranca jamobi quiraito, yabe itsantinue: La Miya Diosiyoe. Nuchi tata Abrahanchi, nuchi apa Isaáchinan Diosi joyoe tieque quipinue. Junni lari nu in tsodica toca nuchi, junsi nuchi alicalachi, cuwanae tinue.
14 Junni yalari duque animali seralaichunae. To poyo tsansi duque jolajochunae. Junsi feca tala, butunnin tala, pele nan tala chudilaichunae. Junni nunan, nuchi alicalanan, jerale tote chuminlabe sen jolajochunae tinue lachi mantate. 15 Junni la nube perayoe. Nunchitiya jinasa cuidaiyanae. Junni in tote manaman manjasa cariyanae tieque quipinue. Nuca seque queyanae tito tsanqueyanae. Junsi nuca puratuanae tieque quipinue. Tsanque Jacóbochi quipinue.
16 Junni mansonhitobi, itsanque tenca canue: Miya Diosiri tsanan in postote rae. Tenhica itomanyoe. 17 Junto Jacobo duque jele tito, itsanque tenca canue: In postori duque wepanantsan posto joe. Inni Diosichi ya, junsi Diosichi tobi winun tamolan joe tinue.
18 Junni Jacóbori quepenanan mancupato, misunhito catsoca jun suca cato wirucarinue ya postoca mantenhichun. Junsi su jamote aseite ponue Diosichi cuwanayoe tito. 19 Junni casaleri ya pueblo Luz mumun jominue. Junni Jacóbori mumunca canbiyaquito, Betel mumun ponue. Junni “Betel” tito, “Diosichi ya” tinun joe. 20 Junni Jacóbori Betélite Diosibe itsantinue: Haranca jinasa nu Diosi aconpanain, junsi cuidain, tsanpa posa cuwan, ano fino cuwan, quitori, 21 junsi seque apachi yaca manfesa caritori, junto nu lachinan Miya Diosi jochunae tinue. 22 Junni jun su wirucarica junca Diosichi ya mumun jochunae tinue. Junni nu Diosiri titiya cuwanari, lanan chuncabi manca nuchi mancuwanae tinue.
Jacobo Haranca jito manjanunca
Junni Jacobo Harán puebloca jinue. Junni junte siete wata chuto, paluca miyanlabe casalainue. Ya paluca miyanla mancari Lea, junsi mancari Raquel mumun jominlanue. Junsi palu chunca wata poletobi, numa chunca manca naola taminue. Junni suedrochi yaca purato, apachi yaca manjilainue.
Junni manjilainato, duque jele tinaminue. Yachi aco Esaú yaca capánan jonhoeque jele tinaminue. Junsi yaca toten, yachi sonalaca, nalalaca seiton quin, quichunaequenan jele tinaminue. Junni yachi apachibi cafetuminnan, titiya epe cuwato Esaúchi erenue yape pa jominca manpolarisa. Junsi Esaúchi epe cuwato eretobi, Jacobo ya chunun nan talanan cajinaminue. Junni Esaúchi quelo janaminnan, pibi fenue. Junni yachi sonalaca, nalalaca, peyunlaca, junsi animalilaca, jera tanunca erenue yachi cale pi polelaisa. Junni yari junte purainue.