Diosi Abraham nisi quereimin jonunca miinunca
22
Junte nechi numarile, Diosi Abrahanca tsanan quereimin jonunca miichun yabe cuenta quinue. Abrahanca mumun pato otie. Junni Abrahanni beconan tulanto, inte rayoe tinue. 2 Junni Diosi itsantinue: Isaac nuchi mancari nao joe. Nu yaca duque laquirae. Tsan jotonan, Moría tinue toca tanjide! Junbi fesi, nuchi naoca lachi cuwana! Yaca toteto, lachi cuwachun jera nin pona! tinue. La du manca micuwanae tinue yape junte toteto lachi cuwasa.3 Junni tseinunsi, Abraham quepenan wiruito, burobi ancariya quinue. Junsi te porecanue nin carichun. Junsi jilainue Diosi jisa tica posto minu. Abraham yachi nao Isaabe, peyun palucabe jilainue.
4 Junni peman ma jinato, Abraham nuwiri nechi quirano podeinue junte joeque. 5 Junni yachi peyunlabe itsantinue:
—Burobe inte purailaide! Naobe laberi jilainayoe tinue. Diosibe rocaitobi, manjalaiyanae tinue.
6 Junni tsantito, Abraham Isaaca te panása carito, nin, cuchilu casi, palunan jilainue. 7 Nanni wanbile Isaac itsantinue:
—Apa.
Junni apari beconan manpato, Nao, ¿ti munarayun? tinue.
Isaari quirade! tinue. Te, nin talarayoe tinue. Juntonan ¿tile opisa jun? toteto Diosichi cuwachun. 8 Junni Abraham beconan manpato, itsantinue:
—Diosi opisa cuwachunae tinue yape yachi cuwalaquisa.
Jun tsantisi, cajilainue. 9 Junni Diosi fesa tica junbi numa felainue. Junbi fetobi, Abraham Diosichi titiya cuwanun mesa tsan quito, te nancarinue. Junsi yachi nao Isaaca teleto, ya mesabi te butuchi nancarinue. 10 Yachi naoca toteto, Diosichi cuwachun cuchilu canasale, anjeli manca otinue. Ya anjeli Diosi ereca jun jominue. 11 Junni Abrahanca pato, Abraham tinue. Abraham beconan otito, inte rayoe tinue. 12 Junni anjeli itsantinue:
—Ya náca niyanantiya quitude! tinue. Numa mirayoe tinue Diosica obedeseimin joeque. Nu nuchi mancari naoca Diosichi cuwachi tie. Diosi numa mirae tinue nu merámin joeque.
13 Junni aman bene nanchi quiranari, unila opisa manca chide alibi cachile cayaito wiruraminue. Junni Abraham jisi canue. Yachi nao Isaac tenchi ya opisaca cato, toteto Diosichi cuwanue.
14 Junni Abrahanni ya postoca mumun ponue. Diosi sen munaranunca cuwanun posto tinun mumun ponue. Jun tenchi amana matenan israelítalari pato, Diosichi dubi yari titiya munaranunca cuwachunae timinla joe.
—Diosi itsantie tinue. Laca obedeseichun nuchi mancari naoca cuwachinaminhe tie tinue. Jun tenchi lari tencachiquenan juraquito pánayoe tie tinue 17 nube duque sen jono joyoeque. Yoquidobi duque animali tsabo chue. Lamari fiquite duque tsalan tsoe. Jun tsanquenan nuchi alicalanan duque jolajochunae tie tinue. Junto pa jominlaca nuchi alicalari numasitiya fe lominla jochunae tie tinue. 18 Yalaca duque sen quisa cariyanae yape jerale uyan tsachi bolonlachi tenchi seque quilaquisa. Abraham, nuri laca obedeseie. Jun tenchi tsanqueyanae tie tinue.
19 Junni Diosi cuenta quinunbi, Abrahánlari peyunla méranun postoca manjalainue. Junto jeralelanan Beersébaca parejo manjalainue yala chunun postoca.
Junsi duque wata poleto, Abrahanni numa unica joto, yachi mayordomoca erenue yachi familiala chunun minu yape Isaachi sona neyasa. Junni mayordomo jito, Rebécaca tanjanue. Junni Isaari yabe casalainue.