Isaac nainunca
21
Junni Diosi Sáraca na quichunaeque paca joto, jun tsanquenan patisa carinue. 2 Junni na wito, unila na quinue nachi apari unica josanan. Diosi ya náca jun malate quichunae tica jominue. 3 Junni Abraham ya náca Isaac mumun ponue. 4 Junni ochu ma tasa numi quido puntaca porenue. Diosi tsansa tica jominue yachi tsachi bolonbi pejoe tichun. 5 Isaac nainasa, Abraham patsa wata taminue.6 Junto Sara na quito, itsantinue: Diosi chique sinuca jominca na quisa carito, son tito cacarisa carie. Jeralela chique na tanunca meráto, chiquebe cacarilaquichunae tinue. 7 Jeralela miraminlae chique numatotiya Abrahanchi na quito cuwano podeitueque. Juntonan na quiyoe tinue sinuca jotonan, yanan unica josanan.
Abraham Agáribe Ismaélibeca erenunca
8 Junni aman ya nari uwainato, cu puranue. Junni cu puranun tenchi Abraham wa fiesta quinue. 9 Junni jun fiesta mate Sara quiranue yachi nao Isaaca Ismael lucarito quirananunca. Ya Ismaélinan Abrahanchi nao jominue. Sáranan yachi peyun sonaca Abrahanchi cuwaca jominue na talarachun. Ya peyun sonari Egíptobi nechi joto, Agar mumun jominue. Junni ya peyun sonachi na, Ismael tinun, Sárachi náca lucarinaminue.
10 Junni Sara Abrahánchica jito itsantinue:
—Peyun sonaca manherede! yachi naobecanan. Chiquechi naobe ya peyun sonachi naori numanan erensia pecatuchunae tinue.
11 Junni Abraham yaca meráto, duque laquiinue. Ismaélinan yachi nao jominue. 12 Tsanque laquiinasa, Diosiri Abrahanbe itsantinue: Natiya tennatude! ya Ismaélichi tenchi, yachi ayanchi tenchinan. Sara rocainae; tsanquiniquede! Lachi cate Ismaélichi alicalacanan nuchi alicala tituntsan jochunae. Isaachi alicalacasiri nuchi alicala jolajoe tintsan jochunae tinue. 13 Juntonan ya peyun sonachi naochinan duque duque alicala suwachinayoe tinue yanan nuchi nao jonun tenchi.