19
Junni neme inasa yala paluca anjelilari Sodómabi felainue. Jun fenasa, Lótiri jun pueblo winunte chuminue. Junteri tsachila layainun jominue. Junni Lótiri anjelilaca quirasi, wiruito facaribi jinue. Junsi tobi mutsaito, 2 itsantinue:—Amicola, niya josatiya lachica jilaisa! Junte nede tsaleto, aman catsono podeilaichunae tinue. Junto ayuna quepenan cajino podeilaichunae tinue.
Junni anjelilari joo tilatinue. Junni Lótichi yabi catsolainue.
15 Junni tseinasa anjelilari Lótibe itsantilatinue:
—We wiruito, inte nechi lolaide! Nuchi sona, junsi nuchi paluca namalacanan cato, sujilaide! tilatinue. Sodómabi chuminlaca casticaquinasa pepuyano muquilaquitunari, sujilaide! tilatinue.
16 Junni anjelilari tsanlatinasanan, Lótiri jituchique wanhinaminue. Junnan anjelilari yaca tedele cato larinue. Miya Diosiri Lótibe yachi familialabeca laquiraminue. Junto Lótilacari casticaquino munaratunue. Junni anjelilari Lótica, yachi sonacanan, junsi yachi paluca namalacanan tedele cato, yalaca pueblobi nechi larisi, 17 manca anjeli itsantinue:
—Se lono muquilaquinari, we sujilaide! Bene nan tala manquiraerelaquituna! tinue. Junsi wa contibi nechi lono fecári wanhilaituna! Puyano muquilaquitunari, du minu sujilaide! tinue.
23 Junni jera tseica josa, Lótiri yachi familiabe Zoar tinun pueblobi feca jominlanue. 24 Junni Miya Diosiri Sodómabi, junsi Gomórrabi ninbe asufrebe jamochi nechi patarinue suwa cuwenta. 25 Tsanque jera yucapiyarinue. Junbi chuminlaca jera toteto, wa contibi chumin chidelaca, tapelaca, tilacatiya jera yucapiyarinue. 26 Junni Lótichi sonari yachi benele janato, bene nan tala manquiraerenue. Junsi juntenan pinba molde inue.
27 Junni aman ayuna nanchi quepenan Abrahanni Miya Diosibe cuenta quica jonun postoca manjinue. 28 Dubi nechi quirato, jera quirantsan jominue. Sodoma, junsi Gomorra, junsi jun quelole wa conti jominca jera quirantsan jominue. Jun quiranari, ninfubi nechi cuwenta nin poyo lonaminue. 29 Miya Diosi tsanque Lot chunun puebloca, junsi weyan wa contibi jomin puebloca, jera yucapiyarinue. Junto Abrahanca laquirato, Miya Diosiri Lótilacanan jun puebloca cayucapiyarituminnan jun pueblobi nechi lolaisa carinue.