3 —Niya josatiya moora manjilaituna! tinue. 4 Nulachi munajalaquinari, pi nasi tanjasa carichinayoe tinue yape nede tsalelaquisa. Junto chide pele tenpe nasi jasailaide! tinue. 5 Wari lachica jalainan, ano nasi tanjachinayoe yape ano fito sonba mancalaquisa.

Junni yalari beco manpato, Joo, se joe tilatinue. 6 Junsi Abraham yachi jali ya minu manwisi, Sárabe itsantinue:

—We, junpalu chunca libra fe sen arinaca cato bibu quede! tinue.

7 Tsantisi, Abraham wala ranun minu sujinue. Junto fe sen wala náca cato, yachi peyunchi cuwanue yape wepana jera sesa fichun. 8 Junni Abraham ya pemanca quirabi jaminlachi wala tsachicaca, quesoca, junsi wala cupicanan cuwanue filaquisa. Junto juntenan caméraminue ti cajonatiya cacuwachun yalari chide pele tenpe ano filaquinasa.

9 Ano jera fisi, quirabi jaminlari Abrahanbe itsanque panhalaquinue:

—¿Nuchi sona Sara nunchi ran? tilatinue.

Junni Abrahanni beco manpato, In jali yabi chue tinue.

10 Junni yala manca itsantinue:

—Man watate quirabi manjanae tinue. Junni junnasa nuchi sona na manca tachunae tinue.

Jun tsantinasa, Sara Abrahanchi benele chuminue jali ya tamolante. Junto jera pánanunca meránaminue. 11 Juntonan Abrahanni unica jominue. Junsi Sáranan sinuca joto, luban quiratumin jominue. 12 Jun tenchi Sara cacarino mochi wantaitunue. Junto itsanque tenca canue: Na tamanpari, duque son jono jomin joinhie. Wari chiquilari unica, sinuca joto, natiya na tacaituchunaeque tenca canue.

13 Junni Miyari Abrahanbe itsantinue:

—¿Sara niyaito cacarin? tinue. ¿Sara lachi fiquica quereitun? ¿Sinuca joto na tano joyoeque quereitun? tinue. 14 Ti tenfe jun tsancatiya Miya Diosiri quimin joe tinue. Man watate quirabi manjanae tinue. Junni junnasa Sárari na tachunae tiyoe tinue.

15 In fiquica merasi, Sárari ya fiquica cacariyoeque jelechi itsantinue:

—Chiqueri cacaritiyoe tinue.

Junnasa Miyari beco manpato, itsantinue:

—La mirayoe tinue nunan cacarieque.

16 Junni Sárabe tsantisi, quirabi jaminlari wiruito, Sodoma nanchi jilainue. Junni Abrahanni yalabe nasi pejinue despediichun. 17 Junnasa Miyari itsanque tenca canue: La quino jonunca Abrahanbe pano joyoeque tenca canue. 18 Abrahanchi alicalari sonban wa bolon jolajochunae. Lari Abrahanbe payoe yachi alicala lachi sonbabe jerale uyan tsachi bolonlaca seque quilaquichunaeque. 19 Lari Abrahanca wentecayoe yape yachi alicalaca seque mantasa, yape yalanan laca meráminla josa. Abrahanla la micarinunca meránola joe. La pacayoe Abrahánlachi tenchi titiya queyanaeque. Junni yalari jerale seque tuca jonunca quinola jochunae yape la tsanquisa. Junni Abrahanca tsanque mantaca jotori, yachi nosale quino itoyoeque tenca canue. Yabe pano joyoeque tenca canue Sodómabe Gomórrabeca casticaquechinayoeque. 20 Junni Miya Diosiri tsanque tenca catobi, Abrahanbe itsantinue:

—Jeralela paminlae tinue Sodoma, junsi Gomorra tsachilari duque seitonlaeque. 21 Junni lanan quirabi jichinayoe tsanan seitonla jonunca miichun. Jito miiyanae tinue.

22 Junni Miya tsanque panunbi, paluca quirabi jaminlari Sodómaca jilainue. Junnasa Abrahanni Miya Diosibe cuenta quito purainue.

33 Junni Miya Diosiri Abrahanbe jera cuenta quesi, junte nechi jinue. Junnasa Abrahannan manjanue.