Diosichi tsachila joe tichun, unila nalalaca numi quido puntaca porenola joe tinunca
17
1-2 Junte nechi duque wata poletobi, Abram nue chunca nue wata taminue. Junnasa Miya Diosi jato, yabe itsantinue: La Diosi joyoe; jera quino podeiyanae tinue. Junto nube trato quinayoe. Lachi cale nuri duque seque chuna! tinue. Junni lari nuca duque alicala tasa cariyanae tinue.3 Junni Abram tobi mutsainan, Miya Diosiri itsanque cuenta quinue: 4 In tratoca nube quechinayoe: Nuchi alicala duque bolon jolajochunae. 5 Junto nuchi mumun Abram itochunae; aman Abraham jochunae. (Jun fiquichi “duque bolonlachi apa” tito “Abraham” tinun joe.) 6 Nuchi alicalaca duque josa cariyanae. Duque bolon josa cariyanae tinue. Weyanlari miyala jolajochunae. 7 In tratoca nube quinayoe junsi nuchi alicalabenan. La nuchinan, nuchi alicalachinan Diosi joto poleyanae tinue. Nulabe tsanque numatotiya trato tato poleyanae tinue. 8 Lari Canaán toca nuchinan, yalachinan cuwanae amana chularanunte. Numatotiya nulachi joto polechunae. La nulachi Diosi joanae tinue.
9 Junsi Diosi Abranbe itsanque cuenta caquinue: Nunan nuchi alicalanan lachi trato niyan josa tinatiya quinola jochunae. 10-11 Itsanque quinola jochunae: Jerale nuchi tsachila tala unila nalalaca numi quido puntaca porenola jochunae tinue sircunsidaica tinun quito. In trato seniali cuwenta jochunae labe nulabe. 12 Amanale nechi nulachi unila na iminlaca, ochu ma tasa tsanquinola jochunae. Nulachi nalalaca, o nulabe chumin peyunlachi nalala josatiya, jeralelaca tsanquinola jochunae. 13 Monantiya tsanca iton itochunae. Tsanque lachi trato seniali nulachi pucabinan jochunae. Junto in trato numatotiya joto polechunae. 14 Manca numi punta poreca iton jonari, nulachite nechi manlarito erenola jochunae tinue lachi tratoca respetaitunun tenchi.
Diosi Abrahanchi sona na quino joe tinunca
15 Junni Diosi Abrahanbe cacuenta quinato, itsantinue:
—Nuchi sonari Sarai mumun itochunae. Amanale nechi Sara mumun jochunae tinue. (Jun fiquichi “duque respetainun sona” tito, “Sara” tinun joe.) 16 Lari yabe sen joto, na tasa cariyanae yape nu na tasa. Yabe duque sen joanae. Yachi alicalari duque bolonla jolajochunae tinue. Junto yala weyanla duque fe mantá tanla jochunae tinue. Duque tsachi bolon cura mantaminla jochunae tinue.
17 Junca meráto, Abrahanni tobi mutsaito cacarinue. Junto itsanque tenca canue: ¿Niyaito patsa wata tanni apa jono joichunan? Numanan na tano podeituanae tinue. ¿Junto Sara nue chunca watabi na tano jochinan? tinue. 18 Diosi, nu lachi manca nao Ismaélica bendesiquinan, se jono jonhoe tinue.
19 Junni Miya Diosi Abrahanbe beco manpato itsantinue:
—La Ismaélica pátiyoe tinue. Nuchi sona Sara na quichunae. Junto ya náca Isaac mumun pochunae. Junto nube itsanque trato quito, tsanquenan Isaabe trato queyanae tinue. In tratori nuchi alicalabenan numatotiya tato poleyanae tinue. 20 Junto Ismaélichi tenchi rocaicaca numa meracayoe tinue. Junto yabenan sen joanae tinue. Yacanan na duque tan, alicalanan duque tan, josa cariyanae tinue. Yachi alicala chunca palucaca duque mantá tan miya josa cariyanae tinue. Duque, duque tsachila jolajochunae tinue. 21 Juntonan lari Ismaélibe trato quituanae. Isaabe queyanae. Ya náca Sara man watate tachunae tinue.