Diosi Abranbe trato quinunca
15
Junnunbi Miya Diosi Abranchi quirajasa carinue. Jun quirajacabi Diosi itsantinue:—Abram, jeleratude! Lari nuca sele quirananae. La nuchi titiya duque cuwanae tinue.
2-3 Junto Abranni Diosibe itsantinue:
—Miya Diosi, ¿ti quichun duque cosa munarano joinhin? tinue. ¿Ti se lono jun? Nao itoyoe. Nuri nao cuwaca itoyoeque mirae. Junni Eliezer lachi mayordomo, ya Damasco pueblobi nechi jaca tsachi, lachi nao cuwenta jono jochunae. La puyanunbi la jerale tanunca yari jera tsacumin ichunae tinue.
4 Junnunsi Miya Diosiri itsantinue:
—Uyan tobi nechi tsachiri nuchi erensiaca tsacumin ituchunae. Nu puyanunbi nuchi erensiaca nuchi nao patsa tsacumin ichunae tinue.
5 Junni Miya Diosiri Abranca urachi tanjito itsantinue:
—Yoquidoca sele quirade! Junto tsaboca miquede! Mino podeituchunae. Junni nuchi alicala jun cuwentanan duque duque jolajochunae tinue.
6 Junni Abranni Miya Diosica quereinan, yaca sen joe tinue.
13 Juntonan Miya Diosiri Abranbe itsantinue:
—Nu inca mirano joe: Nuchi alicala duque nuwiri tobi sonnalarachunae tinue. Junteri epe mantato tanun esclabola jolajochunae. Nuchi alicalaca junpalu patsa wata fecári seiton quilaquichunae tinue. 14 Junto lanan seiton quiminlaca casticaqueyanae. Juntonan aman nuchi alicala jun tobi nechi manse lolaichunae. Yalari cala, oro, ti mica cosacatiya tanjalaichunae. 15 Junni aman nu puyano fecári seque chularachunae. Nuri duque unica ito puyato menaichunae tinue. 16 Junni bare toca jitobi, junpalu patsa wata poletobi, nuchi alicala in postote manjalaichunae. Junpalu patsa wata caitusanan in jeraca tsacumin ino podeilaituchunae. Nula wino podeilaisa, amorréolaca sulariyanae. Juntonan jutsa caquilaquitue tinue yalaca tsanque casticaquichun.
Ismael nainunca
Junni aman duque wata polenasa, Sarai na caitominue. Junni yari yachi unilabe itsantinue:
—Chiquechi peyun sonaca cade! tinue yape yanan nuchi sona josa. Pansile yari chiquechi tenchi na quino podeichunae tinue.
Aman ya peyun sonari Agar mumun jominue. Junni Abranni ya sona casi delannan, na wito, na quinue. Junni Abranni ya náca Ismael mumun ponue.