12
Junni Miya Diosi Abranbe itsantinue: Nuchi toca, nuchi familialaca, junsi apachi ya jomincanan purade! uyan toca jichun. La micuwanae nunchi jino jonunca. 2 La nuca duque serasa cariyanae tinue. Nuchi alicala wa bolon ilaichunae tinue. Nuca jeralela miralarachunae mo jonunca. Nuchi alicalari jerale uyan tsachilabe sen jolajochunae tinue lachi sonbabe. 3 Nubenan, nuchi alicalabenan sen junlabe lanan sen joanae tinue. Nulabe pa junlaberi lanan seiton joanae tinue. Nuchi alicalaca jerale tobi chuminlabe sen josa cariyanae tinue.4 Jun tsantinunsi, Abram Harán pueblobi nechi lonue Diosi panunca meráto. Abram Canaán toca jinano mate siete chunca mante wata taminue. 5 Yachi sona Sáraica, yachi sobrino Lóticanan, junte nechi titiya tanunca jera tanjinue. Peyunla Harán pueblobi yachi tenchi trabajaquiminla jonan, yalacanan petanjinue. Junni Canaán tobi fetobi, 6 Abram jerale jun tote poleto nenaminnan, aman Siquem pueblobinan fenue. Junte More tinun wa contibi chudilainue ensine chide pele quelole. Jun mate cananeo tsachila jun tobi chuminlanue.
7 Abram junte chusa, Diosi quiraito itsantinue: La in toca nuchi alicalachi cuwanae tinue.
Jun tsantinan, Abram junte su duto, Diosichi titiya cuwanun mesa tsan quito Diosibe rocainue jun postote Diosi quiraie tito.
8 Junsi Abranla du minu jilainue. Ya du Betel pueblote nechi yo lanun nan tala jominue. Junte chudilainue. Betel pueblori yala chununle nechi yo winun nan tala jominue; Hai tinun pueblo mantimini yo lanun nan tala jominue. Abram juntenan Diosichi titiya cuwanun mesa tsan quito, Diosibe rocainue. 9 Junto Abram manaman jito, nasi chude chude jinue Neguev tobi feno fecári.
Junni junbi chusanan, ano fino iton inue. Junnan Abránlari Egipto toca wan fecári chubi jilainue. Yala chununte tinantiya fino itominue.