Lot Abranca purato jinunca
13
Junto Abram Egíptobi nechi manloto, yachi sonabe yachi sobrino Lótibe titiya tanunlaca mancato, Neguev tocanan manjalainue. 2 Abram duque oco jominue. Oro tan, cala tan, junsi animalilacanan taminue. 3 Tsanque Neguévibi nechi manjato, nasi chude chude manjalainue Betel pueblo fecári. Junte nechi matu chununcanan manjanue Betel pueblobe Haibe jolate. 4 Matu jun postotenan Diosichi titiya cuwanun mesa quica jominue. Junni junbinan Diosibe manrocainue.5 Aman Lótinan duque oco jominue yachi manpi cuwenta. Duque opisa, wala taminue. Duque peyunlanan yabe chuminlanue. 6 Junni Abranbe Lótibe chuno to michi itominue. Lapanan itominue animalilachi cufino. Parejo chuno podeica itominlanue. 7 Abranchi wala cuidaiminlabe Lótichi wala cuidaiminlabe peyunla tala duque pataaca inaminlanue. Aman jun mate cananéolabe ferezéolabenan jun tobi chumin jominlanue.
8 Junni man mate Abram Lótibe itsantinue:
—Nube labe familialayoe. Tsan josanan, chiquilachi peyunlari yala tala duque pataato chularae. Ya seitoe. 9 Junto quirade! Jana to tsoe. Ya toca nuchi nunca munajanan wentede! tinue. Junto chican chuntsan joe tinue. Nu pelechi jinari, la fechi jiyanae; nu fechi jinari, la pelechi jiyanae tinue.
10 Junni Abranni junca tsantinunsi, Lótiri Jordán pi wa conti jominca dubi nechi jera quiranue. Junteri michi pi pominue. Ya tori Edén tonan quiran jominue Zoar pueblo fecári. Duque sen to jominue Egipto cuwenta. Aman jun mate Miya Diosi Sodómaca, Gomórraca, cayucapiyarica itominue. 11 Junni Lótiri Jordán pi wa contica wentenue. Abranbe yabe ranunle nechi Loti yo lanun nan tala jinue. Junni tsanque Abranbe Lótibe chican lolainue. 12 Junni Loti jinunbi, Abram Canaán tote chudinue; Lótiri Sodoma pueblo quelole contibi chubi jinue. 13 Jun Sodómabi chumin tsachila duque jutsa quimin jominlanue Miya Diosichi contra.
14 Junni Lot jinunbi, Miya Diosi Abranbe itsantinue: Nu chununte nechi seque quirade! fechi, pelechi, butunnin tala. 15 Nu to quirananunca lari jera cuwanae. Yari numasitiya nuchi jochunae tinue. Junsi nuchi alicalachinan jochunae tinue. 16 Junto nuchi alicalaca duque serasa cariyanae tinue to lucu cuwenta. To lucu mino podeituntsan joe. Nuchi alicala jun cuwentanan jolajochunae tinue. 17 Junni wiruito jerale tote jide! bare tala, junsi ayan foro tala. In toca nuchi cuwanae tinue.
18 Junni Abranni yachi cosalaca cato, duque ensine tinun chide pele chun minu chubi jilainue. Mamre tinun tsachichi jominue. Hebrón pueblo quelole jominue. Juntenan Abram Miya Diosichi titiya cuwanun mesa quito yabe rocainue.
Melquisedec Abranca bendesiquinunca
Junni duque ma poletobi, weyan miyala layaito, Sodoma pueblobe Gomorra pueblobeca quera quilaquinue. Junto junbi chumin tsachilaca feito, weyan tsachilaca cato tanjilainue. Lóticanan yachi familialacanan petanjilainue. Junnan Abranni yaca meráto, yachi duque peyunlabe jinue. Junni uyanlabe quicaato, Lóticanan se larinue, junsi yachi familialacanan. Junto Abranni tanjica jominlaca se larito mantanjanasa, Sodoma pueblo miyari pueblo dechi loto, Abranca seque facaricanue. Junsi Melquisedec tinun tsachinan Abranca tulaibi janue. Melquisederi Salem pueblobi miya jominue. Junsi yari jamochi chumin Diosichi patelenan jominue. Junni yari binobe bibubeca Abranchi tenchi larinue.