Babel pueblobi duque wa jamo ya tsan quilaquinunca
11
Junni jun mate chuminlari man fiquiri pamin jominlanue. 2 Junsi yo lanun minu nechi jalainaminnan, parejo toca felainue Sinar tobi. Junto junte chudilainue. 3 Junni man nete mancabe mancabe tenpalaquinue. Ladriyo quito, nin polaquisa! latinue. Ya ladriyoca suca tenchi polaquinue wa jamo ya tsan quichun. Junsi asfaltoca polaquinue sonba suwachun. 4 Junsi itsantilatinue: Jalaide! Wa pueblo quilaquisa! Junsi jamo tala yoquido tiliino fecári wa ya tsan quilaquisa! latinue. Junni tsanlaquinari, uyanla chiquilaca se tito, duque duque poden jolajoe latichunae latinue. Jerale tote ara cura chubi jituchique tsanque wa jamo ya tsan quinaminlanue.5 Junni Miya Diosiri ya wa puebloca quirabi patanue junsi wa jamo ya tsan quilaquinanuncanan. 6 Junni Miya Diosiri tenhinue yalari man pueblobiri chularaeque, junsi man fiquiri paminla joeque. Junni itsantinue: Jun tenchi yalari in trabajo quino podeilainae. Junto ticatiya quino munaratori, niya josatiya quinilaquichunae tinue. 7 Junto yalachi fiquica palaisa carilaquisa! tinue yape yala tala entendeilaitusa.
8 Junni Miya Diosiri tsanquinue tsachilaca jerale tote jisa carichun. Junnan pueblo quinaminnan telaquepolaquinue. 9 Jun postote jeralelachi fiquica palato, jerale toca ara cura erenue. Jun tenchi ya pueblori Babel mumun joe.
Diosi Abranca wentenunca
Aman duque wata poletobi, Sem tinunchi alica manca jominue Taré mumun.
27 Junsi Taré pemanca naola taminue Abram, Nacor, Harán. Junni Haranchi nao Lot jominue. 28 Haranchi apa Taré capuyatusanan, Haranni Ur tinun pueblobi puyanue Caldea tobi. Haranni ya naica jun tobinan puyanue. 29 Abram Sarai mumun sonabe casalainue. Nacori, yanan Haranchi namabe casalainue. Ya sona Milca tinun jominue Iscachi miyan. 30 Sárairi na tano podeiton sona jominue. 31 Junni nanni wanbile Tareri Ur pueblobi nechi lonue. Caldea tobi nechi loto, Canaán toca jinaminlanue. Junto Harán mumun pueblote chudilainue. Tareri yachi nao Abranca, yachi nieto Lótica, yachi naso Sáraicanan yabe petanjinue. 32 Tareri palu patsa mante wata tan puyanue Harán tinun pueblobi.