Diosi Noélabe trato quinunca
9
Junni Diosiri Noebe, junsi yachi naolabeca bendesiquinato itsantinue: Duque nalala talarana! yape piyanle tote duque tsachila manjolajosa. 2 Tote nenamin animalila jeralela nulaca jelechi jowinpolaquichunae tinue. Nulari pichulaca, animalilaca, junsi watsalaca jera mantá talarachunae tinue. 3 Nulari piyanle animalilaca, junsi titiya waqueca juncatiya fino muquinari, finiquinola joe tinue. La tsanque mantanayoe tinue. 4 Juntonan man cosacari fitulajona! Asan pun tsachicaca fitulajona! Asanni sonnasa carimin joe; jun tenchi asan pun tsachicaca fino itolajoe tinue. 5 Junni tsachilanan o animalilanan tsachilaca totetori, lachi cate culpa talarachunae. 6 Meralaquede! Tsachila Diosi cuwenta jolajoe. La Diosi yalaca tsanque quicayoe. Jun tenchi motiya tsachilaca toteminlaca uyanlari totelaquichunae tinue. 7 Nulari duque nalala talarana! tinue yape piyanle tote duque tsachila manjolajosa.8 Junsi Diosiri Noebe yachi naolabe itsantinue: 9-10 Meralaquede! La nulabe, nulachi alicalabe, junsi nulabe barcobi peselomin animalilabe trato quechinayoe. Junsi in tratoca piyanle tote sonnamin animalilabe, tsachila tanun animalilabe, jelenchi nenamin animalilabe, junsi pichulabe quinayoe. 11 Ya tratocari numatotiya mancanbiyaquituanae. Yari itsanque joe: Tote chumin tsachilacanan, animalilacanan numatotiya tsanque mapiya manhereto jera yucapiyarituanae tinue. Tsanque piyanle toca jera yucapiyarimin mapiya manan manhitochunae. 12 In tratoca quicaeque miralarasa, man seniali cuwachinayoe tinue. 13 Yoquidobi suyunca chutechinayoe. Yari seniali jochunae.
14 Junni lari tobi poyo josa carinari, lachi suyunni poyobi rachunae. 15 Junni suyunca quirato, nulabe, junsi animalilabe trato quicayoeque mantenhiyanae. Junto tsanque jera totemin mapiya manheretuanae. 16 Suyunca quirato, trato quicayoeque mantenhiyanae. 17 Ya suyunni tsachilabe, junsi animalilabe trato quica joeque seniali jochunae tinue. Diosi Noebe tsantinue.
18 Noechi naola barcobi nechi manlominlari Sem, Cam, junsi Jafet jominlanue. Cam, yari Canaanchi apa jominue. 19 Junni piyanle tote sonnamin tsachilari Noechi pemanca naolachi alicala jolajoe.