Mapiya manfuinunca
8
Junnasa Diosiri Noélaca, junsi yabe pepomin animalilaca mantenhinue. Junto wa wu quisa carinue yape mapiya manfuisa. 2 Diosi suwáca mandeisa carica jominue. Junni lamari wapoica jomincanan manpeleisa carinue. 3 Junni tsanque nasi nasi manfuide manfuide jinaminue. Patsa junpalu chunca ma poletobi, jera manfuinue. 4 Junni wata wicale nechi siete pe chunca siete ma josa, barco Ararat tinun wa dubi mannanhinue. 5 Junnasa mapiyari nantanancari manfuinaminue. Junni wata wicale nechi chunca pe casale ma josa, nanni fe wa du punta jera manquirailainue. 6 Junte nechi junpalu chunca ma poletobi, Noeri bentanaca lasito quirato, 7 pabacan pichuca ereto quiranue. Juntonan ya pabacan pichuri Noechi barcobi manfatunue. Junte manchi manchi jajinato, mapiya jera manfuisa méraminue. 8 Junni Noeri mapiya manfuica jonunca miichun, palomacaman ereto quiranue. 9 Junni ya palomari tibinantiya chudino podeituto, Noechi barcocanan manjanue. Tobiri mapiya duquenan cajominue. Junni Noeri bentanase tede larito, paloma manjanaminca mancato, barcobi manpocanue.10 Junsi Noeri siete ma polenunbi, manaman palomaca ereto quiranue. 11 Junni ya palomari neme ino inasa olibo tinun chide ali nacaca sini jun barcoca manjanue. Aman junni Noeri tenhinue mapiya manfuinaca jonunca. 12 Junsi manan siete ma polenunbi, manan palomaca ereto quiranue. Junni in neteri ya palomari barcobi manjatunue.
13 Junni Noeri sota patsa man wata tasa, mapiya jera manfuinue. Casale pe, casale ma josa, Noeri barcobi yajaca manbaleto quiranari, mapiya nanni fe manfuica jominue. 14 Junni pe paluca, palu chunca siete ma tasa, aman tsa manfuica jominue. 15 Junni Diosiri Noebe itsantinue:
16 —Nu, nuchi sonabe, nuchi naolabe, junsi nuchi nasolabe barcobi nechi manlolaide! tinue. 17 Junsi nulabe pepomin animalilacanan jera manlarilaquede! tinue. Jerale pichulacanan, finun animalilacanan, junsi jelenchi nenamin animalilacanan manlarilaquede! tinue yape piyanle tote manjito duque duque manseralaisa, yape jerale tote duque animali manjolajosa.