Mapiya
7
Junni Miya Diosiri Noebe itsantinue: Jerale tsachilale nechi nusiri lachi cale seque nenamin joe tinue. Jun tenchi nuri nuchi familialabe barcobi wilaide! 2 Junsi finun animalilacanan, sieteca unilaca sieteca sonaca cato pepocade! Fitunun animalicari unila manca sona mancari petanwide! tinue. 3 Pichucanan tsanquenan petanwide! Sieteca unilaca, sieteca sonaca petanwide! yape manan tote manseralaisa. 4 Siete mate suwa quechinae. Junpalu chunca ma suwa quichunae quepen malon. La quica jun nenaminlaca tobi jera iton suwachinayoe tinue.5 Junni Noeri Miya Diosi niyaque mantanatiya, jun tsannan quinue.
6 Junni mapiya jato toca jera dono mate, Noeri sota patsa wata taminue. 7 Junni Noeri mapiya janasa puyatuchun, barcobi winue yachi sonabe, yachi naolabe, junsi yachi nasolabe.
8-9 Junsi duque duque animalilanan Noebe parejo barcobi pewilainue. Weyanlari finun animali jominlanue; weyanlari fitunun animali jominlanue. Junsi pichulanan pewilainue. Junsi uyan animalilanan pewilainue pini, mate tsanla. Yalanan tsanquenan unila manca, sona manca wilainue. Diosi mantaca jun, tsanque wilainue. 10 Junni Noé barcobi winunle nechi siete mate mapiya janue.
11 Wata wicale nechi palu pe chunca siete ma jominue. Jun ma patsate Diosiri lamarica duque wapoisa carito, duque duque suwa quisa carinue. 12 Junpalu chunca ma fecári quepen malon suwa quinue. 13 Junni Noeri yachi sonabe, junsi yachi pemanca naolabe Sem, Cam, Jafet, yachi pemanca nasolabe, jun suwa quino mate barcobi wilainue. 14 Junni yalabe parejo duque tanun animalilanan, junsi jelenchi nenamin animalilanan, junsi pichula, pini, mate tsanlanan, 15-16 tsanquenan unila manca, sona manca barcobi pewilainue. Diosi Noebe tsanque mantaca jominue. Junni jun tsanquenan wilainue.
Tsanque jerale animalila winunbi, Miya Diosiri barco tamolanca donue. 17 Junpalu chunca ma fecári mapiya janaminue. Pi nanni fe wapoinasa, barcori jalitaito pi jamo nanhinue. 18 Junni piri nanni fe nanni fe wapoinasa, barcori nanni fe lode lode jinaminue. 19 Junni mapiyari tsancari duque wapoito, tote fe jamobi wa du jominlaca jera donue. 20 Junsi tsanque wa dulaca jera doquetobi, juntele nechi siete metro fe wapoinue.
21 Junni tsanque mapiya duque wapoinan, tote sonnamin animalilanan, junsi tsachilanan, jera puyalainue. Pichula, junsi tsachila tanun animalila, jelenchi nenamin animalila, junsi pini, mate tsanla, 22 tote piyanle jasiminlari jera puyalainue. 23 Junni Noeri, junsi Noebe barcobi pepominlari son lolainue. Junte nechi uyanlari jera puyalainue tsachilanan, junsi animalilanan. 24 Junni patsa mante chunca ma fecári mapiya tobi jominue.