Tion₅₄ ꞌnióꞌ₅ tónꞌ₂ dsa₂ juɨ₅
2
ꞌUɨg₅₄ jaun₂ bá₄ tion₅₄ niog₅ tionꞌ₂ jniog₄ juɨ₅ ꞌŋio₅ lɨn₃ guë́₄, jág₁ a₂ma₂néi₁ jniog₄, ia₁jaun₂ tsá₃ qui₂dsɨ₃cónꞌ₅ jniog₄ juɨ₅.
2 Ia₁ chi₂juaꞌ₂ tion₅₄ jme₁jme₂ti₃ dsa₂ ꞌéiꞌ₃ jaun₂ a₂ca₂quiog₂ Diú₄ ma₂lɨ́gꞌ₂ të₂le₃ quianꞌ₅₄ ángeles quiáin₅, jaun₂ chi₂juaꞌ₂ qui₂ca₂gue₃ dsa₂ uɨg₅ ꞌa₂ conꞌ₂ ca₂tɨ́in₂ jme₁ca₂ꞌnáu₂ dso₄,
3 ¿ꞌa₂ bá₄ liaꞌ₂ lé₂ le₃lió₂ jniog₄ në₁juaꞌ₂ tsá₃ tionꞌ₂ jniog₄ juɨ₅ jág₁ a₂ŋɨ́₄ lë₃ quen₅ a₂lió₂ jaun₂? Ia₁ ꞌŋiog₅ bá₄ Te₁guiꞌ₅₄ ꞌéi₂ i₂ca₂juáꞌ₂ le₂ꞌuɨg₅₄ jág₁ a₂lió₂ jaun₂. Jaun₂ guë́₄ qui₂ca₂cuë₃ jág₁ dsau₅ tság₅ jniaꞌ₅₄ dsa₂ i₂ca₂nág₂.
4 Ján₃ bá₄ ca₂cuë₃ Diú₄ jág₁ dsau₅ të₂le₃ quianꞌ₅₄ léi₄ a₂dsɨ₃góꞌ₃ dsɨ́₅ dsa₂ ca₂jmo₃ ꞌlióng₂ ráun₂, ján₃ bá₄ të₂le₃ quianꞌ₅₄ Jme₂dsí₂ Jŋió₅ i₂ma₂qui₂ma₂cuɨin₃ jniog₄ le₂jau₂ le₂jau₂ liaꞌ₂ conꞌ₂ lë́₅ a₂ꞌnio₃ ꞌéi₂.
Ca₂lɨn₃ Jesús liaꞌ₂ lɨ́n₅ rɨinꞌ₅₄
5 On₃juaꞌ₅₄ o₄gú₃ ángeles ca₂dsia₃ mɨ₂güɨ́g₃ a₂já₅, a₂ꞌë₂ jniaꞌ₅₄.
6 La₁ia₁ cha₂ bá₄ caun₂ ja₁ma₂cuë₅ dsa₂ jág₁ dsau₅ le₂la₂;
¿I₂ꞌein₂ bá₄ dsa₂ mɨ₂güɨ́g₃,
a₂ŋɨ́₄ lë₃ dsauꞌ₂ ꞌauꞌ₂ ꞌéi₂?
¿I₂ꞌein₂ bá₄ tsɨ₁jon₂ dsa₂ mɨ₂güɨ́g₃,
a₂ŋɨ́₄ lë₃ tónꞌ₂ ꞌne₂ juɨ₅ ꞌéi₂?
7 Ca₂jmoiꞌ₅₄ ca₂tiá₂ meiꞌ₂ guë́₄
conꞌ₂ guë́₄ ángeles quiángꞌ₂;
la₁ ma₂ca₂jme₃juɨinꞌ₂, ma₂ca₂jmoꞌ₅₄ a₂lɨ́in₅ i₂dsen₅₄ guë́₄,
[ca₂dsiainꞌ₅₄ a₂nio₃ gu₂ a₂ca₂jmoꞌ₅₄ ꞌne₂ quianꞌ₅₄ gogꞌ₂,]a
8 ma₂dsiaꞌ₅₄ ꞌne₂ ca₂le₃jë́₃ o₄tag₁₂.b
Jaun₂ në́₃, jme₁ca₂dsia₃ Diú₄ ca₂le₃jë́₃ o₄tag₄ dsa₂ mɨ₂güɨ́g₃, tsá₃ ma₂ꞌe₂ cha₂ juaꞌ₅₄ a₂tsá₃ niog₅ gu₂ ꞌéi₂. La₁ia₁ rë₂në́₃ në́₃, tsá₃ ma₂léi₄ guë́₄ a₂niog₅ gu₂ ꞌéi₂ le₃jë́₃.
9 La₁ia₁ jɨn₄ bá₄ jniog₄ Jesús i₂ca₂lɨn₃ ca₂tiá₂ meiꞌ₂ guë́₄ conꞌ₂ guë́₄ ángeles, ca₂rë₃juɨinꞌ₂, ca₂lɨin₃ i₂dsen₅₄ guë́₄ në́₃ ia₁ ca₂i₃ŋɨ́i₂ uɨg₅ ne₄ ꞌmú₃, ia₁jaun₂ le₃cuɨ́ꞌ₅ ꞌmú₃ o₄quióꞌ₄ ca₂le₃jɨ́n₃, ia₁ a₂ꞌua₁ dsɨ́₅ Diú₄.
10 Quióꞌ₅ Diú₄ bá₄ le₃jë́₃; të₂le₃ quianꞌ₅₄ ꞌéi₂ ca₂lë₃ le₃jë́₃. Jaun₂ ꞌnio₃ Diú₄ chóinꞌ₂ ca₂le₃jɨ́n₃ chiꞌ₂-guein₂ quiáin₅, a₂lén₂ ꞌéi₂ jláinꞌ₁ co₂lë₅ quiainꞌ₅₄. ꞌUɨg₅₄ jaun₂, dsi₂ten₅₄ bá₄ a₂ca₂jme₃ꞌŋia₅ Diú₄ ca₂jme₃ꞌŋiai₂₃ Jesucristo të₂le₃ quianꞌ₅₄ jmɨ₁uɨg₅ a₂ca₂i₃ŋɨ́i₂ jme₁ca₂niá₃ juɨ₅ a₂lióin₂ ꞌéi₂.
11 Ia₁ juɨ₁liaꞌ₂ i₂jme₂jŋió₃ quianꞌ₅₄ i₂rë₂jŋió₃ në́₃, jan₂ bá₄ Jmei₂ chan₂. ꞌUɨg₅₄ jaun₂, tsá₃ guiꞌ₅₄ Ja₁ŋiꞌ₅₄ Diú₄ të́ꞌ₂ dsa₂ ꞌéi₂ rɨinꞌ₅₄.
12 Le₂la₂ juáꞌ₂ ne₄ si₂;
ꞌƗ́n₄ jniá₂ ꞌne₂ jɨn₄ rɨ́ngꞌ₃,
te₂jë₄ ja₁le₁ŋɨꞌ₂ dsa₂
ꞌë₅₄ jniá₂ son₅₄ a₂jme₁juagꞌ₂ quiángꞌ₂.c
13 Ján₃ bá₄ juáꞌ₂:
Caun₂ bá₄ ꞌag₁₂ dsɨ₃ ja₁con₂ ꞌéi₂.d
Conꞌ₂ siáꞌ₂ táng₃ juáꞌ₂;
ja₁lá₃ bá₄ chénꞌ₅ jniá₂,
ca₂liaꞌ₂ ma₂quianꞌ₅₄ chiꞌ₂-guein₂
i₂ma₂cuɨn₃ Diú₄ jniá₂.e
14 Juɨ₁liaꞌ₂ ca₂tɨ́n₂ chiꞌ₂-guein₂ jan₂ chog₅₄-jmei₂ dsa₂ mɨ₂güɨ́g₃ caun₂ jmɨ₂ ꞌain₅₄, ján₃ bá₄ le₂në₅ ca₂tɨ́n₂ Jesús caun₂ jmɨ₂ ꞌain₅₄ quianꞌ₅₄ dsa₂ mɨ₂güɨ́g₃, ia₁jaun₂ të₂le₃ quianꞌ₅₄ ꞌmú₃ quióꞌ₅ lé₂ le₃líꞌ₂ ne₄ ꞌéi₂ i₂ꞌio₅ bí₂ quióꞌ₅ ꞌmú₃, co₂ꞌnióꞌ₄ le₃juaꞌ₅₄ i₂së₃dsen₃.
15 Ján₃ bá₄ le₂jaun₂ ca₂jmo₃ ia₁jaun₂ lé₂ le₃qui₂le₃chenꞌ₂ dsa₂ i₂në₂jag₄ bá₄ i₂qui₂rë₂ꞌŋeꞌ₅₄, ia₁ ca₂le₃jë́₃ jmɨg₄ a₂chain₂, góꞌ₅ ꞌmú₃ quióꞌ₅.
16 Ia₁ dsónꞌ₂ bá₄ on₃juaꞌ₅₄ jaun₂ ca₂guain₃ juaꞌ₅₄ a₂jme₃ꞌoin₅₄ ángeles; ta₁ jaun₂ bá₄ ca₂guain₃ a₂jme₃ꞌoin₅₄ tsɨ₁jon₂ Abraham.
17 ꞌUɨg₅₄ jaun₂, tion₅₄ bá₄ ca₂lɨin₃ ca₂le₃jë́₃ juɨ₁liaꞌ₂ lɨ́n₅ dsa₂ mɨ₂güɨ́g₃ rɨinꞌ₅₄, ia₁jaun₂ dsióg₄ léin₂ jan₂ jme₂dsa₂ dsen₅₄ i₂ŋéi₂ dsɨ́₅, i₂rë₂tiꞌ₅₄ në́₃, ia₁jaun₂ jŋiáꞌ₂ dsáu₁ dsa₂ të₂le₃ quianꞌ₅₄ a₂jéinꞌ₂ ne₄ Diú₄.
18 Jaun₂ juɨ₁liaꞌ₂ ca₂ŋág₃ uɨg₅ ꞌéi₂ jme₁ca₂caun₃ Diú₄ táu₂, ján₃ bá₄ le₂në₅ quɨꞌ₅₄ jmɨg₄ jme₃ꞌoin₅₄ juɨ₁liaꞌ₂ dsa₂ i₂cáun₂ dsa₂ táu₂.