Ca₂rë₃chán₃ Jesús
2
Jaun₂ ca₂lë₃ në́₃ jmɨg₄ jaun₂ ca₂jmo₃ ꞌéiꞌ₃ guiꞌ₅₄ Emperador Augusto, a₂cho₃ si₂ tioin₃ ca₂le₃jɨ́n₃ dsa₂ ta₁caun₂ mɨ₂güɨ́g₃.
San Lucas 2:1-24
2 (Jë₁le₂ꞌuɨg₅₄ si₂ në₅ ca₂cho₃ dsa₂ liaꞌ₂ conꞌ₂ jme₁lɨ́n₄ Cirenio dsi₄máꞌ₂ ꞌuë₃ Siria.)
3 Jaun₂ jma₃quén₅ ca₂tɨ́n₂ dsa₂ ca₂le₃jɨ́in₃ dsɨ₃lein₃ juɨg₂ go₅₄, a₂qui₂dsɨ₃tioin₃ si₂.
4 Jaun₂ ca₂ꞌí₃ José juɨ₅ ca₂o₃ꞌɨ́in₃ juɨg₂ Nazaret ja₁tén₄ ꞌuë₃ Galilea, ca₂ŋáiꞌ₃ juɨ₅ ꞌuë₃ Judea a₂dsiáinꞌ₄ Belén, go₄ David, ia₁ dsa₂ tsɨ₁jon₂ David bá₄ jme₁lɨ́n₄ José.
5 Ca₂i₁tioin₃ si₂ ja₁jaun₂ quianꞌ₅₄ María i₂ma₂lɨꞌ₅₄ jág₁ jéinꞌ₂ gu₂ quiainꞌ₅₄; ma₂quiain₂₃ bá₄ guein₂ ŋɨ₂₃.
6 Ca₂lë₃ në́₃, conꞌ₂ ma₂tioinꞌ₅₄ ja₁jaun₂, ca₂dsɨn₃ jmɨg₄ a₂le₃chan₂ guein₂ quiáin₅.
7 Ja₁jaun₂ ca₂rë₃chán₃ guein₂ ne₅₄ ꞌéi₂ quiáin₅, ꞌein₅₄ ca₂lio₃ ꞌmɨꞌ₂, ca₂quio₂₃ ꞌŋióꞌ₃ tsɨ₁gu₅ ja₁guë́ꞌ₅ jáꞌ₂, ꞌuɨg₅₄ ia₁ a₂tsá₃ ma₃ja₁ca₂tɨ́in₂ dsi₂néi₂ ja₁siáꞌ₂ ja₁jŋia₃.
Ca₂jme₃jnia₅ ángel ne₄ dsa₂ i₂jmo₅ ꞌí₁ jáꞌ₂ chaꞌ₂
8 ꞌUë₃ jaun₂ jme₁tionꞌ₅₄ jŋia₅ ja₁nau₂ co₂nióꞌ₃ dsa₂ i₂jmo₅ ꞌí₁ jáꞌ₂ chaꞌ₂ quián₅, a₂ꞌuë₂ jaun₂.
9 Ca₂jme₃jnia₅ jan₂ ángel quián₅ Te₁guiꞌ₅₄ ne₅₄, ca₂jnia₃ co₂tág₅ co₂ꞌnéꞌ₅ quióꞌ₅ Te₁guiꞌ₅₄ le₃lágꞌ₃ ja₁tioinꞌ₅₄, jaun₂ ca₂rë₃góꞌ₅ ꞌŋio₅ lɨn₃.
10 La₁ ca₂juáꞌ₂ ángel:
―Tsá₃ jmo₂ ꞌniaꞌ₂ gangꞌ₃. Ŋí₂, a₂i₃ꞌë́₃ jág₁ dse₃ bá₄ jniá₂ guio₃, caun₂ jág₁ quióꞌ₅ ca₂le₃jɨ́n₃ dsa₂, jiá₃ cán₂ o₂ꞌŋió₃ dsɨ₅.
11 Ia₁ jmɨg₄ në₃, ca₂rë₃chan₂ o₄quiánꞌ₂ ꞌniaꞌ₂ juɨg₂ go₄ David, jan₂ i₂lió₂, i₂lɨ́n₅ Te₁guiꞌ₅₄ I₂rë₂ꞌɨ́n₁* quián₅ Diú₄.
12 Quianꞌ₅₄ léi₄ la₂ o₁quionꞌ₂ ꞌniaꞌ₂ ꞌí₁: dsianꞌ₂ ꞌniaꞌ₂ guein₂ rë₂bónꞌ₅ ꞌmɨꞌ₂, rë₂quiain₂₃ ꞌŋióꞌ₃ tsɨ₁gu₅ ja₁guë́ꞌ₅ jáꞌ₂.
13 Dsɨ₂juɨ₅ conꞌ₂ tsá₃ jáin₅, ca₂jɨ́in₂ juɨn₅ lɨn₃ ángeles siánꞌ₂ con₂ ángel ꞌéi₂, ca₂tóinꞌ₂ jme₂juɨinꞌ₂ Diú₄ ca₂juáꞌ₂:
14 ¡Juɨ₁le₂juɨnꞌ₂ Diú₄ gueiꞌ₅₄ i₂juɨ́g₃!
Ne₄ guaꞌ₅₄ ꞌuë₃ në́₃,
juɨ₁ꞌei₅ tei₄ ja₁con₂ dsa₂ mɨ₂güɨ́g₃
i₂ma₂dsia₅ Diú₄ dse₃ dsɨ́₅ o₄quióꞌ₄.
15 Ca₂lë₃ në́₃, jme₁ma₂i₃len₃ ángeles gueiꞌ₅₄ i₂juɨ́g₃, jaun₂ ca₂jme₃lióg₃ dsa₂ i₂jmo₅ ꞌí₁ jáꞌ₂ chaꞌ₂ ꞌéi₂ qui₂ca₂tsɨ́ꞌ₃ rɨinꞌ₅₄:
―Ma₃ jniog₄ juɨ₅ Belén, ma₃ dsɨ₁jag₅₄ a₂ca₂lë₃ ja₁jaun₂, conꞌ₂ lë́₅ jág₁ ma₂në₂ꞌë́₂ Te₁guiꞌ₅₄.
16 Ca₂i₃léin₂ jaun₂ në́₃ të₂le₃ dséi₂. Dsónꞌ₂ rëꞌ₂ ja₁jaun₂ ca₂dsáinꞌ₂ María quianꞌ₅₄ José, guein₂ në́₃ rë₂quiain₂₃ ꞌŋióꞌ₃ gu₅ ja₁guë́ꞌ₅ jáꞌ₂.
17 Jme₁ca₂jág₂, jaun₂ guë́₄ ca₂dsia₃ ꞌa₂ liaꞌ₂ lë́₅ jág₁ a₂ca₂nág₂, a₂ca₂ꞌë́₂ ángel a₂ꞌɨin₂₃ guein₂,
18 jaun₂ ca₂i₃góꞌ₃ dsɨ́₅ ca₂le₃jɨ́n₃ dsa₂ i₂ca₂nág₂ jág₁ a₂dsia₅ dsa₂ i₂quián₅ jáꞌ₂ chaꞌ₂ ꞌéi₂.
19 La₁ María në́₃, ꞌnoꞌ₂ bá₄ dsɨ́₅ ca₂le₃jë́₃, ꞌe₂ jein₅ a₂lë́₂ jaun₂.
20 Dsa₂ i₂jmo₅ ꞌí₁ jáꞌ₂ chaꞌ₂ në́₃, ca₂i₃lein₃ bá₄ táng₃ qui₂jme₂juɨinꞌ₂ Diú₄, qui₂cuë₂₃ ti₁ꞌmagꞌ₄ o₄quióꞌ₄ ca₂le₃jë́₃ a₂ca₂të́₂ ne₅₄ quianꞌ₅₄ a₂qui₂ca₂nág₂. Ia₁ ca₂le₃jë́₃ bá₄ ca₂rë₃ti₃ conꞌ₂ lë́₅ ca₂juáꞌ₂ ángel.
Ca₂i₁jme₁jniai₂₃ guein₂ Jesús guáꞌ₅
21 Jme₁ca₂dsɨn₃ jŋia₃ jmɨg₄, ca₂ti₃ dsa₂ lo₄* guein₂, jaun₂ ca₂quiong₃ JESÚSa liaꞌ₂ conꞌ₂ lë́₅ ca₂juáꞌ₂ ángel ca₂tsɨ́ꞌ₃ María néꞌ₃ a₂cáun₂.
22 Jme₁ca₂dsɨn₃ jmɨg₄ a₂ꞌi₄ ꞌéiꞌ₃ jmo₃ le₁jɨ́in₃ a₂jme₂ti₃ liaꞌ₂ conꞌ₂ lë́₅ ꞌÉiꞌ₃ quióꞌ₅ Moisés, ca₂i₁lein₅₄ Jerusalén jŋiai₂₃ guein₂ i₁jeinꞌ₅₄ ne₄ Te₁guiꞌ₅₄.
23 Ca₂jmo₃ le₂në₅ ia₁ ton₅ ne₄ Si₂ quióꞌ₅ Te₁guiꞌ₅₄: “Ca₂le₃jɨ́n₃ guein₂ dsa₂ ŋeꞌ₂ i₂ne₅₄ i₂le₃chan₂, léin₂ i₂lë́₅ ꞌí₁ quián₅ Te₁guiꞌ₅₄.”b
24 Ja₁jaun₂ ca₂jénꞌ₃ ján₃ conꞌ₂ lë́₅ juáꞌ₂ ꞌéiꞌ₃ quióꞌ₅ Te₁guiꞌ₅₄: “On₃ i₁ju₂, o₃ co₂dsánꞌ₃ i₁ju₂ bë₂ ꞌe₂.”c
25 Jmɨg₄ jaun₂, jme₁chan₂ jan₂ dsa₂ jë₄ juɨg₂ Jerusalén i₂jme₁chen₂ Simeón. Jme₁lɨ́in₄ jan₂ dsa₂ dsen₃ lɨn₃, i₂jme₁jme₂gan₃ Diú₄; jme₁chain₂ chi₁jŋia₂₃ a₂guán₂ i₂cuë₃ liánꞌ₂ quióꞌ₅ dsa₂ juɨg₂ Israel. Jme₁quiongꞌ₅₄ Jme₂dsí₂ Jŋió₅;
San Lucas 2:25-52
26 ꞌéi₂ bá₄ ma₂ca₂ꞌë́₂ jág₁ ne₅₄ a₂tsá₃ jóin₂ ca₂liaꞌ₂ ca₂jɨ́in₂ deꞌ₂ I₂rë₂ꞌɨ́n₁* quián₅ Te₁guiꞌ₅₄.
27 Jmɨg₄ jaun₂ ŋó₃ jiog₅ Jme₂dsí₂ Jŋió₅ juɨ₅ guáꞌ₅ templo*. Ja₁jaun₂ jme₁ꞌein₅₄ në́₃ jme₁ca₂dsi₃lén₂ chog₅₄-jmei₂ guein₂ Jesús, jŋiai₂₃ guein₂ a₂jmo₃ quiongꞌ₅₄ conꞌ₂ lë́₅ tag₄ chíꞌ₅ a₂quíꞌ₅ ꞌÉiꞌ₃.
28 Jaun₂ ca₂jŋauꞌ₃ Simeón ca₂jŋaiꞌ₃ guein₂, ca₂jme₃juɨinꞌ₂ Diú₄, ca₂juáꞌ₂:
29 Në₃ guë́₄ në́₃, ꞌne₂ juɨg₃ quiáng₃,
ma₂lé₂ dsiangꞌ₅₄ tei₄
dsa₂ i₂jme₂ti₃ neꞌ₅₄,
liaꞌ₂ conꞌ₂ lë́₅ jág₁ quiángꞌ₂.
30 Ia₁ la₂ ca₂të́₂ ne₃ i₂ma₂chengꞌ₂ lió₂,
31 i₂ma₂jmoꞌ₅₄ co₂jŋia₅₄ quián₅ ca₂le₃jë́₃ juɨg₂ nación.
32 I₂la₂ bá₄ i₂lɨ́n₅ si₂
i₂jmo₃ tág₅ ja₁con₂ dsɨ₂nau₂;
i₂la₂ bá₄ i₂lɨ́n₅ dsa₂ i₂chiꞌ₃ jláꞌ₁
juɨg₂ Israel quiángꞌ₂.
33 Ca₂i₃góꞌ₃ dsɨ́₅ bá₄ José quianꞌ₅₄ chog₅₄ guein₂, o₄quióꞌ₄ jág₁ a₂ca₂juáꞌ₂ Simeón jaun₂, ꞌɨin₂₃ guein₂.
34 Jaun₂ ca₂jme₃guꞌ₅₄ Simeón quióꞌ₅, jaun₂ ca₂juáꞌ₂ ca₂tsɨ́ꞌ₃ María chog₅₄ guein₂:
―Ŋí₂, ꞌen₅₄ juɨ₅ guein₂ la₂ já₅, jmo₃ a₂dsɨ₃ganꞌ₅₄ ꞌuë₃ juɨn₅ dsa₂ juɨg₂ Israel, o₃ të₂le₃ ronꞌ₂ juɨn₅ ꞌe₂. Já₅ lɨ́in₅ caun₂ léi₄ quióꞌ₅ i₂ꞌag₃ i₂náu₃ quen₅ i₂le₃ꞌiog₅₄.
35 Le₂në₅ bá₄ jiógꞌ₃ ꞌí₁ le₃jniá₂ ꞌa₂ liaꞌ₂ dsɨ₂jiog₅ dsɨ́₅ dsa₂ le₂jan₂ le₂jan₂. La₁ të₂le₃ ja₁congꞌ₂ në́₃, dsɨ₃ŋɨ́gꞌ₂ në₂jag₄ bá₄ caun₂ ŋi₁tág₂ dsɨ₂tia₃ të₂ꞌauꞌ₂.
36 Ján₃ bá₄ jaun₂ jme₁ꞌen₅₄ jan₂ guiongꞌ₂ i₂chen₂ Ana, ja₁mɨ́g₄ Fanuel, dsa₂ tsɨ₁jon₂ Aser. ꞌÉi₂ në́₃ jme₁ꞌë́₂ jág₁ o₄quióꞌ₄ Diú₄ ján₃. Jme₁ma₂gueinꞌ₂. Meiꞌ₂ bá₄ liaꞌ₂ conꞌ₂ ca₂jenꞌ₂ gu₂. Guio₃ ŋi₂ bá₄ ca₂rë₃quiainꞌ₅₄ dsa₂ ŋeꞌ₂ quiáin₅.
37 Quénꞌ₂ ne₂guióg₂ rë₂dsɨ́₂ quén₂ (84) ŋi₂ a₂ca₂rë₃ꞌnɨ́i₂.d Guiongꞌ₂ ꞌéi₂ në́₃ jme₁ꞌein₅₄ tián₂ i₁dsi₅ guáꞌ₅. ꞌUë₂-jmɨ₂ bá₄ jme₁jme₂ti₃ ne₄ Te₁guiꞌ₅₄ chi₂léinꞌ₂ Diú₄ a₂jme₂ꞌɨin₅₄ në́₃.
38 Hora jaun₂ dé₄ ca₂dsióg₃ ja₁tión₂ dsa₂, ca₂cuë́ꞌ₃ ti₁ꞌmagꞌ₄ Diú₄, ca₂dsia₃ jág₁ ꞌɨin₂₃ guein₂ tsɨ́ꞌ₅ ca₂le₃jɨ́n₃ dsa₂ i₂tionꞌ₅₄ i₂le₁jŋia₅ a₂lión₂ dsa₂ juɨg₂ Jerusalén.
Ca₂i₃lein₃ táng₃ Nazaret
39 Jaun₂ në́₃ jme₁ma₂ca₂lë₃ jmo₂₃ ca₂le₃jë́₃ conꞌ₂ lë́₅ ta₁ quíꞌ₅ ꞌÉiꞌ₃ quióꞌ₅ Te₁guiꞌ₅₄, jaun₂ ca₂i₃lein₃ juɨ₅ ꞌuë₃ Galilea, ja₁niog₅ Nazaret, juɨg₂ go₅₄.
40 Guein₂ në́₃, caun₂ ca₂i₃juɨinꞌ₂ bá₄, caun₂ ca₂rë₃ꞌuáinꞌ₃ në́₃, tonꞌ₂ ꞌŋio₅ lɨn₃ ŋi₅, Diú₄ bá₄ jme₁jme₂guꞌ₅₄.
Liaꞌ₂ conꞌ₂ meꞌ₂ Jesús ca₂dsióg₃ i₁dsi₅ guáꞌ₅
41 Ca₂le₃jë́₃ ŋi₂ jme₁dsɨ₂lén₂ chog₅₄-jmei₂ Jmɨg₄ Të₂ꞌɨn₅₄* a₂të₅ Jerusalén.
42 Jme₁ca₂dsɨ́ꞌ₃ Jesús guia₃-tɨ́n₂ ŋi₂, ca₂i₃léin₂ táng₃ co₂dsia₅ juɨ₅ Jerusalén. Ia₁ le₂jaun₂ tɨn₂ dsa₂ ca₂le₃jë́₃ ŋi₂ dsɨ₃léin₂ jmɨg₄ jaun₂.
43 Jme₁ca₂gúꞌ₃ jmɨg₄, ca₂i₃lein₃ táng₃. Tsá₃ ca₂rë₃líꞌ₄ chog₅₄-jmei₂ jŋiaꞌ₅₄ jaun₂ bá₄ të₁ꞌŋia₄ Jesús Jerusalén,
44 ia₁ lɨ́in₂ ma₂ŋáiꞌ₅ bá₄ quiainꞌ₅₄ dsa₂ siánꞌ₂. Caun₂ jmɨg₄ ma₂ne₁ŋó₄ tioinꞌ₅₄ juɨ₅ i₃lein₃ jme₁ca₂ꞌnauꞌ₂ jɨn₄ o₁rɨinꞌ₅₄, jɨn₄ dsa₂ i₂cuɨin₂₃ në́₃.
45 La₁ tsá₃ ca₂dsáuꞌ₂. Jaun₂ ca₂jéinꞌ₃ táng₃ juɨ₅ ca₂i₃léin₂ Jerusalén ca₂i₁ꞌniogꞌ₂ ja₁jaun₂.
46 A₂ꞌnɨ₅ jmɨg₄ jaun₂ jme₁ca₂dsáuꞌ₂ i₁dsi₅ guáꞌ₅, guá₅ jɨn₄ të₅juáꞌ₅, nag₂₃ jág₁, ŋag₂₃ ŋɨ́iꞌ₅ ꞌéi₂ në́₃.
47 Jaun₂ ca₂i₃góꞌ₃ dsɨ́₅ ca₂le₃jɨ́n₃ i₂tionꞌ₅₄ nag₅ jág₁ quióꞌ₅, ia₁ ꞌŋio₅ lɨn₃ ŋi₅ ꞌa₂ liaꞌ₂ qui₂jéinꞌ₃ jág₁ quióꞌ₅ dsa₂ ꞌéi₂.
48 Jme₁ca₂jág₂ chog₅₄-jmei₂, ca₂i₃góꞌ₃ dsɨ́₅, jaun₂ ca₂juáꞌ₂ chog₅₄:
―Jón₃, ¿ꞌe₂ lë₃ jmogꞌ₅₄ le₂në₅? Ŋéiꞌ₅, jniá₂ në́₃, ma₂në₂i₁nio₁ ꞌɨ₅ dsɨ₅ ꞌniogꞌ₂ jniaꞌ₅₄.
49 Jaun₂ ca₂ŋag₃ Jesús:
―¿ꞌE₂ lë₃ ꞌnauꞌ₂ ꞌniaꞌ₂ jniá₂? ¿Tsa₁ ŋiꞌ₅₄ ꞌniaꞌ₂ a₂ca₂tɨ́ng₂ ꞌú₄ ta₁ quióꞌ₅ Ŋeꞌ₃?
50 La₁ tsá₃ ca₂ŋɨ́ꞌ₂ dsɨ́₅ ꞌéi₂ ꞌe₂ jein₅ jág₁ jaun₂.