113
¡Aleluya! Hnähꜘ hi̱ˉ jmeeꜙ taˊheꜗ kihꜗ DSAˉJØ̱Ø̱Hˈ jnänˋ,jmeeˊ hnähꜘ jʉʉhˉ kiyhꜗ.
2 ¡Heˉ baˊ cheˉ jø̱hˈga̱a̱ˉ DSAˉJØ̱Ø̱Hˈ jnänˋ,
jmɨɨˊ naˈ hiꜙ läꜙja̱ˉ läꜙjëꜙ johꜘ jmɨɨˊ chaˉ!
3 Läꜙ gaꜙtëꜘ jeeˊ hyaˉ hyooˉ hiꜙ läꜙ gaꜙtëꜘ jeeˊ dsa̱a̱ˉ kaˉlähꜘ, jmeeˊ hnähꜘ jʉʉhˉ kiyhꜗ.
4 Läꜙka̱a̱ˉ gyʉʉhˈ hwaꜗ saꜙ cha̱a̱ˉ gaˊ jñahꜘ hi̱ˉ jø̱ø̱hˈ läꜙko̱o̱ˉ DSAˉJØ̱Ø̱Hˈ jnänˋ.
5 ¿Haˉ taꜙ jäꜙ jñahꜘ hi̱ˉ la̱a̱ꜗ läꜙko̱o̱ˉ DSAˉJØ̱Ø̱Hˈ jnänˋ,
hi̱ˉ gyaꜗ jmeeꜙ hihꜙ gyʉʉhˈ?
6 Maꜙkeꜙ jø̱hˈga̱a̱ˉ la̱a̱ꜗ DSAˉJØ̱Ø̱Hˈ jnänˋ,
maꜙraꜙ heˉ jmää˜ bihꜗ jneˊ kwa̱a̱t˜ hi̱ˉ tä̱ä̱hˊ hwaˈ laˉ.
7 Hiꜙ cha̱a̱yhˉ läꜙjë̱ë̱ꜙ jneˊ hi̱ˉ täˉñeeꜘ hi̱ˉ saꜙ hä̱ä̱ˊ taˊ.
Cha̱a̱yhˉ jneˊ hi̱ˉ saꜙ chaˉ la̱a̱ꜗ niꜙ miihˉ,
8 mahꜗ lla̱a̱yꜗ jneˊ ka̱a̱hˊ läꜙko̱o̱ˉ dsaˉtaˊ ka̱a̱hˊ.
Jmääyꜗ jneˊ kwa̱a̱t˜ ja̱ˉbaˊ läꜙko̱o̱ˉ dsaˉtaˊ ka̱a̱hˊ
hi̱ˉ tä̱ä̱hˊ jeeˊ jwɨɨˉ jnänˋ.
9 Kwa̱a̱y˜ gyʉ̱ʉ̱ˉ kya̱a̱ꜗ dsaˉmëꜘ hi̱ˉ saꜙ leꜘ ka̱a̱ꜗ gyʉ̱ʉ̱ˉ,
mahꜗ läꜙcha̱a̱yˉ lluꜗ kya̱a̱hˊ chihˉ kya̱a̱yꜗ. ¡Aleluya!