114
Läꜙko̱o̱ˉ maˊ gaꜙhwë̱ë̱ˉ dsaˉ Israel hwaꜗ Egipto,maˊ gaꜙhwë̱ë̱ˉ jo̱o̱ꜘsɨɨhˊ Jacob hwaꜗ kihꜗ dsaˉ cha̱a̱ˉ ʉ̱ʉ̱ꜘ,
2 läꜙjë̱ë̱ꜙ dsaˉ kya̱a̱ꜗ Judá gaꜙla̱a̱ꜗ läꜙko̱o̱ˉ gwahꜙ kihꜗ Dio jeeˊ gaꜙgyaˉ Dio kya̱a̱yhˊ.
Jeeˊ ja̱ˉ gaꜙløøyꜗ jmeeyꜙ hihꜙ kihꜗ dsaˉ Israel heꜘ baˊ jo̱o̱ꜘsɨɨhˊ Judá.
3 Läꜙko̱o̱ˉ maˊ gaꜙllaꜙnääyꜗ chaˊhooˊ jmɨˉñeehꜚ gyʉ̱ʉ̱ˉ,
läꜙcha̱hꜘ ja̱ˉ gaꜙhnaꜘ.
Läꜙja̱ˉ kaˉlähꜘ gaꜙlaꜗ kihꜗ jmɨɨˉ Jordán.
4 Gaꜙjehꜗ läꜙka̱a̱ˉ mohꜘ,
gaꜙchaꜗ gaꜙhlaꜗ läꜙko̱o̱ˉ chaˉhë̱ë̱ꜙ chivo.
Hiꜙ gaꜙjehꜗ läꜙka̱a̱ˉ mɨˈko̱hꜘ mähˉ,
gaꜙchaꜗ gaꜙhlaꜗ läꜙko̱o̱ˉ chaˉhë̱ë̱ꜙ gyʉ̱ʉ̱ˉ borrego.
5 ¿Heeˉ gaꜙlaꜗ kihꜗ jmɨˉñeehꜚ gyʉ̱ʉ̱ˉ, heˉlaˈ gaꜙhnaꜘ?
¿Heeˉ gaꜙlaꜗ kihꜗ jmɨɨˉ Jordán,
heˉlaˈ gaꜙhëꜗ jwëˈ jwëꜘ chaˊjmɨɨˉ?
6 ¿Heeˉ gaꜙlaꜗ kihꜗ mohꜘ,
heˉlaˈ gaꜙchaꜗ gaꜙhlaꜗ läꜙko̱o̱ˉ chaˉhë̱ë̱ꜙ chivo?
¿Heˉlaˈ gaꜙchaꜗ gaꜙhlaꜗ mɨˈko̱hꜘ mähˉ,
läꜙko̱o̱ˉ chaˉhë̱ë̱ꜙ gyʉ̱ʉ̱ˉ borrego?
7 Waˊraˉ gaꜙläꜙjnääꜘ Dsaˉjø̱ø̱hˈ jnänˋ läꜙkye̱ˉ hwaꜗ jehꜗ.
Läꜙja̱ˉ lleˋ kihˈ leꜘ waˊraˉ gaꜙläꜙjnääꜘ Dio kya̱a̱ꜗ Jacob.
8 Jëëhꜘ, hi̱ˉ heꜘ gaꜙjmeeꜘ gaꜙhyaˉ jmɨɨˉ dsohꜘ ku̱u̱ˊ hlooˉ.
¿Haˉ cha̱a̱ˉ hi̱ˉ lihꜙ jmeeꜗ hyaꜙ jmɨɨˉ dsohꜘ ku̱u̱ˊ?