2 chanima ja xabatian Jehová jui taxnikidanai tsuan nematiduma ixanikiki. Tsuanda juai uin janu ni chaipatidumaki, jawen chakabuwen taeadan. Nuku pewai juidan, bai kuabu chi jede keska juxanikiaki. Nukun detsis sabun kushipawen chuka keska waxanikiaki. 3 Jua tsauxun Israelin juni bake Levín enabu nukunabu Diosbe janchaxunikabu unanti wakin jatu pepa waxanikiaki, mane plata juxupa inun mane oro tashipa chi anu kukatsa akin jawen detsis udenkin jas wamisbu keska matu wakinan. Ma matu pewaken jaska Moisin jatu yusini chibankin inabu nami inun jawen xeni jas menukin jatun shinan pepawen Jehová kenwankin uinmakubainxankanikiaki. 4 Judán enabu inun Jerusalén anu jiweabun Jehová inankuinkubainaibun Jehová ana benimaxanikiaki, jatun xenipabu uatian jiwei pexun benimawapaunibu keska wakinan.

5 Jehová kushipa dasibi binu keyuatun ana matu yuikin: “Ean matu unanti watan chakabu inun pepabu matu kupi en juxanaii, eska jiwemisbudan: yushin chakabun kushipa jayabu inun, jawen ainma inun jawen benemabe chutanamebaunmisbu inun, yuda betsa yubakai chanichakamisbu inun, tsuanda dayadubu inun ainbuaibu ma jawen bene mawabu inun bakeishta ibuumabu ichakawakubainmisbu inun, nawa betsabu beaibu jatu ichakawamisbu inun, ewen datei ea ninkaisbuma jatun chakabuwen taexun en jatu kupi juxanaii”, iwanan,

6 “Ea en Jehová maei en jawa betsaismaki. Man Jacobun enabuwen taexun en matu yamawakatsi ismaki. 7 Jaska matun xenipabun en jancha jenenibu keska wakin matundi en yunuti jancha inun en nemati jancha jenekin man jawa chibankatsi isbumaki. Ea en Jehová kushipajaida dasibi binuatun en matu yuiaii. Ea shinain ea anu ana chintunbidankanwen. Man jaskaibun eadi matu anu en chintundiaxanaii, matu ana mekekubainidan. Jakia matun ea yukakin ‘¿Jawa wai mia anu nun ana chintuain?’ man ikaya 8 eandi matu yukakin: ‘¿Juni padananankin tsuan Dios anua yumetsutidumen?’ man ea wa matu kemakin: Chanima man ea padankin medibi betsa enabiaken man ea yumetsunmisbuki. Jaskabia man ea ana yukakin: ‘¿Jawa mia padankin nun mia yumetsumismen?’ man ea wa en matu yuiai ea ninkakanwen. Jawada jau ea menuxunbun inun, matun bai anuxun ma tseka medibi diezmo ea inanti inun, ea inankuinti enabiaken yaushikin eskadabes ea inankin man ea yumetsukubainmisbuki. 9 Chanima dasibi matun mai pakea anua matunabu dasibibu yaushikin ea padankin yumetsukubainaibuwen taexun en matu chakabuwakin yupuxanaii. En jaska janchabiai ea Jehová kushipajaida dasibi binu keyuatun ana en matu yuiaii. Ninkakanwen. 10 Matun bai anua inun matun inabu anua jaska Moisin matu yusini diezmo ena bekin eki nukuti Templo janu adukin meketi dintu anu jatu inankubainkanwen. Man jaska wakin ea uinmaya eki nukuti Templo anu piti pepa jayakunkainaya eanan, matuna binumakin nai anua pepajaidawen en matu duawakubainai uinkatsidan, ea dukun unanti wamakanwen. 11 Matun bai anu yunu inun matun uva bai anu jawen bimi xenan inun jawada shadabun chakabuwamisbu matu anu en ana yunuama ixanaii. 12 Matun mai pakea jawenduajaidawen taexun uinkin yudabu xukuabu tibi jiwebaunabun matukidi yuikin: ‘Diosun jatu benimawakin jatu duajaidawakubainikiki’, akin matu yuikubaunxankanikiki. Eska ea Jehová kushipajaida dasibi binu keyuatun en matu yuiai ninkakanwen”, itan,

13 Jehován ana jatu yuikin: “Jancha kushipawen xabakabi man ea yuankubidanmiski, en matu wa ea kemakin: ‘¿Jawa mikidi jancha kushipawen nun mia yuanmismen?’ akin man ea yukamisbuki. 14 Eska shinain man janchanamemisbuki: ‘Dios duawai nun dayaxunbiakunkainai nun jamenki, jawamadan. Jaska nuku yunumis akubaini nukun chakabuwen dakekin tadi bexa sawea Jehová kushipajaida dasibi binu keyua bebun nun jiwekunkainaidan, ¿jawa nuku manakukin inan nun bixanai? 15 Jakia nukun jatu uinkinan, jabu ibubis kein benima bestiaibu nun uinmiski. Ja inun, junibu chakabubiakin mabu midima ichawakin bikubainmisbuki. Jabunan, Diosun jau ea kupinun, iwanan, unanti wamabiabu jawa Diosun jatu kupiai mediabumaki’, ikin man shinankubainmisbuki”, jatu wanikiaki.

16 Jamen betsadan, eska chanikiki. Tsuabunda Dios duawakin kenwain janchanamei mapuxun jatun jancha jabun yuiai Jehován jatu ninkakin jatu bechipaiaya janua naiudixun jaska jabun shinankubainaibu Jehová bebun jawen jatu shinanmati una kenekin jatun kena tibi jabun Jehová duawamisbu tanakin kenekin netanibukiaki.

17 Jaskawen taexun Jehová kushipajaida dasibi binu keyuatun matu banabimakin yuikin: “Israelin enabu jau ea anu ana chintunxanunbun xaba betsa en jatu pewaxunkubainaii. Juni betsa jawen juni baken jawen epa dayai medabewakubainai jawen epa jawen nuimis keskai eadi enabuwen en ana nuixanaii, matun chakabu ana shinanmadan. 18 Jaskaken jabun man ea ikunwainbu duawakin janua jabun ea ninkaisbuma yupukin en matu jaska waitian man betsajaida uinxanaii, janu ekidi xabakabi unankinan. Jakia natian en matu jaska waxanai man tapindiabumaki”, itan,