3 Jaska wakin matun kushipa mebintan jabun ea kenwankatsi ikin jatun ina beabu jatun inapan pui matun besuki en putaxanaii. Chipu jabundi jatun inapan pui matuki tsamia jayabi matudi putaxankanikiki. 4 En matu jaska wa unantan na yunuti jancha Jacobun juni bake Levín enabube ea en yubakani jawa jeneama jau jaska apakexanunbun matun xenipabu inun matu en jabias yunukubainmis dasibibun jau unankin tapinkubainxanunbunwen”, matu atan Jehová kushipajaida dasibi binuatun ana matu yuikin:

5 “En yubaka janchadan, jiweti jancha inun unanuma jiweti Levín enabu en axuniki, na yunuti jancha jatu inankin jabu eki meseti inun dateti wakinan. Jaskawen taexun jabun ea uinmai ewen datekin ea ninkakin duawapaunibuki. 6 Levín jatu yusinkinan, jawa chakabu jatu yuiama chanima jancha jatu yusinkubainkin jau chakabuwayamanunbun Israelin enabu midima nemakin unanuma pepai ebe ketaxamea ikubainibuki. 7 Matudan, ea Dios dasibi binuatun man en jancha bunikabuwen taexun ekidi jatu yusinkin chanima man jatu ea unanmanikabuki. Matu anu yudabu bexun matu anua en jancha kaiain tapinkin bikubainxankanikiki.

8 Jakia ebe matunabu janchaxunikabuun, jiwea pepa ea anua man ma ea paxkabuki. Man jatu yusin chakaiwen taexun yuda ichapabu benukanikiki. Jaska wakin en Levíbe yubakani matubun chakabuwakin man atimapawaii. 9 En jancha ninkakin man chiban pewama Israelin enabu yusinbiakin yudabu dasibi jabiaskas duawakin man jatu uinmaismawen taexun Israelin enabu dasibibun jau matu danan paepa wakin matukidi jau pe shinanyamanunbun en jatu shinan chakamadiaxanaii”, akin Jehová kushipajaida dasibi binu keyua matukidi jaska janchaikiki.

10 Israelin enabu juni dasibibuun, en ea Malaquíasin matu yuinun ea ninkakanwen. Nuku dasibidan, ¿nun Epa bestichai jayamamen, dasibi dami wanitun nuku katunidan? ¿Jaskai nukubu nukumebi nun padanananbukunmisbumen, jaska Dios nukun xenipabube yubakani danankin chakabuwaidan? 11 Diosun Judá yubabiani Judán enabun jawen jancha chiban pewakin axuanbuma Jerusalén anu jiweabu inun Israel dasibi jiwebaunabu chakabui man atimapakunkainaii. Janu jaki nukuti Templo Jehován bechipaijaidakin medibi wabianiken Judán enabu junibu ibubis atimapakin chakabuwakanikiki. Jaska inun, nawa betsa ainbuaibun yushibubu kenwanmisbu matunan, Diosun yunuti chibanma jatu ainwankin man bikubainaii. 12 Ja nukunabu jaskai jiwexun chakabuaibudan, tsuabunda jaska chakabuwakubainaibuwen taexun jamamaki jau Jehová dasibi binua ewen nuinun ixun jawen inankuinwen Jehová daewanun ixun ina tesenxun jatu menumaxunbiaibun jabu kupikin nukunabu nukun mai pakea anua Jehován jau jatu yamawakin keyuxanunwen.

13 Ja dikabi man chakabu betsa wakubainmisbuki, eskaidan. Matun inabu man jatu menumakubainai benimakin Jehován ana bechipaiama danankubainaiwen taea bis bis iki kaxa chakayamai matun beun jenewen Jehován kenwanti jiwe jemaintin anu jawen chi tapu man mechajaida wamisbuki. 14 Jakia: “¿Jaskakin nukun inankuin nami Jehován nuku dananain ikimenkain?” ika man yuka ikaidan. Eskaki, matu yuinun ninkakanwen. Bedunan ainyantan jawa jeneama jabe jiwekunkainkatsi min jabe yubakabiani min jaska jabe yubakani jabe jiwei ikibi ikama ichakawakin putai mimebi min padananain Jehován matu uinkin unainwen taexun matu danankubainikiki. 15 ¿Na jabias Diosunan, nukun yuda inun nukun yushin nuku inainsmamen? Diosunan, eska bechipaimiski. Tsuabuda jawenabus medibi pepabu watan jatu jiwemakatsis imiski. Jaskawen taexun bedunantun ainbu man ainwain jabe yubakani jawa kaneama jabe jiwekin matun yushin ibubis pe mekekubainkanwen. 16 Jehová Israelin enabu mekenika Dios kushipa dasibi binu keyuatun juni dasibibu yuikin: “Matun ain man yubani padankin jawa jeneama matun yushin ibubis mekekubainkanwen. Tsuanda jawen ain jenebainkin chakabuwai jatun tadi detsis keska wamisbudan, ean en jaska bechipaismaki. Jaskawen taexun ana matun ain tibi jeneyamakubainkanwen”, jatu wanikiaki.

17 Jehován matun jancha ninkai ma matuki chikishi jatsanjaidabiaken ninkamas matun ana yukakin: “¿Nuku ninkai jau jatsanun jawa nun jancha chakabu yuiai?” iwanan, man yukakubainaii. Jakia matun yuikin: “Nun chakabu wabiaya Jehová nukuwen benimaikiki, shinan chankainan”, iwanan, janchakin man yuikubainaii. Jakia matubudan, Dios pepama dabanen man ikunkainaii, jawa ikunwanmadan.