2 Israelin enabu Jehován yuikin: “Eanan, en matu bechipaikin jeneismaki”, en matu wa, jakia matun ea kemakin: “¿Min nuku bechipaiai jaskatan nun unankubainai?” man ibiaya en ea Jehován matu kemakin: “En matu jaska keska wai shinankanwen. Esaú inun Jacob jawen betsajaidabiaken matun xenipabu Jacob besti bechipaikin duawakin 3 Esaú bechipaiama en dananiki. Esaún mai pakea mati matipa pepabiaken betsa wakin ja mai en atimapa waniki, yunu benetima wakin yuinaka besti janu jiwetidubu jatu pewaxunkinan. Jakia matuna chakabuwakin en jaska wama iniki”, en ikaya

4 jakia Esaún enabu Edom nawabu yuinamekin: “Nukun maiwan pakekauana Diosun chakabuwabiani ana bena wakin nun pewakubainxanaii”, ikaibu jatu ninkatan ea Jehová kushipajaida dasibi binuatun jatu kemakin: “Matubunan, matun mai pakea man ana bena wabiaya en ana matu chakabuwankin keyuxanaii”, en iniwen taexun jatun mai pakea kenakinan: “Mai pakea chakabuwen yupuni maiki”, axankanikiki. Janua: “Ja Esaú nawabuki Jehová sinatatiani jawa jatu jeneama jatuki sinatapaketi wadianiki”, jatu jaska waniken 5 Esaú en jaska wani jabias matun beduwen man uintidubuki. Januxun matu Israelbun yuikin: “Nukun Dios Jehován kushipadan, nukun mai pakea binua jawen kushipa uintidubuki, nenu bestimadan, iwanan, man yuikubainxanaii”, iniki, Jehovádan.

6 Jehová kushipajaida dasibi binu keyuatun jabe jawenabu janchaxunikabu jatu yuikin: “Juni bakebun jatun epa ninkakin jatu duawakubainmisbuki. Jawen tsumabun jawen xanen ibu ninkai jaki datekubainmisbuki. Jakia eadan, en matun Epa kayabiki. ¿Jaskakin en jancha ninkakin man ea duawaismamen? Ja inun, en matun xanen ibubiaken ¿jaskai ea ninkai man eki datekunkainsmamen? en ibiaya ea dananbiakubaini jancha chakabukin yuikin: ‘¿Jawa jaska wakin nun mia dananmismen?’ man ikaya 7-8 matu yuikin: En kenwanti chi tapu anu misi medibima ea manchinxun bidanbidanbiai ana jamamaki ea yukakin: ‘¿Jawa jaska wakin mia bedabinwankin nun mia sinatamamismen?’ man ea wai matu kemakin yuinun ea ninkakanwen. Jehován kenwanti chi tapu pema duakabiki, iwanan, ina bekunbu inun, ina tidibu inun, ina isin teneaibu en kenwanti chi tapu anuxun man ea menuxunkubainkin: ‘Nun jawa chakabuwamaki’, ikin shinankubainkin man ea sinatamamisbuki”, en matu waiwen taexunan, ja ina bekunbu inun, ina tidibu inun, ina isin teneaibu inankuinkin matun yununika xanen ibubu anu buxuntankanwen, ¿man jatu buxuan benimakidan matu mebinkanimenkainan? Jaska bechipaisbumaki. 9 Jau nukuwen nuinun matubunan, menan jawaida Dios yukadikanwen. Jakia inabu atimapa shadabu man jawa shinanma man menuxunmisdan: “Diosun ea bechipaixunkin ewen nuixanikiki”, ikin manakin jaska shinanyamakubainkanwen. Dios kushipa dasibi binuatun eska matu yuikiki: 10 “Matuwen en jawa benimamaki. Inabu tesenxun chiwen man ea menuxunbia ana benimama en danankubainxanaiwen taexun en kenwanti chi tapu anu janu man jamen ana chi keti wayamaxanunbun eki nukuti Templo jemaintin mishki kenebaunibu jikiti xui beputi tibi ¿tsuan man beputidumenkain? iwanan, en shinaiin. 11 Yuda xukuabu tibi matunabuma mai jidabi anu manibauna ewen datekin janida jiwebaunabu anuxun ea kenwankin xeni ininti ea inankuinkin kuakubainkin jawada pepa besti ea menuxundiamisbuki. 12 Jakia shinan chakakin: ‘Jehová kenwanti chi tapu inun januxun jawada nun menuxunmis medibi wama Moisin yunuti jancha ana chibanma jaska nun akatsi ikai nun atiduki’, ikin ea bedabinwankin man ea sinatamamisbuki. 13 Jakia matun ana yuikin: ‘Ja dasibi Dios nun axunmiswen taea bika tenekin nun ma jatsanki’, ikin man ea dananmaii. Ea jaska wabiakin ea benimawatanun ixun inabu minama yumetsukidan inun, ina awa tidibu inun, ina betsa isin teneaibu ea inanun, iwanan, man ea bexunkubainaii. 14 Jawen chaxuwan xukuabu anua chaxuwan bene pepa jawa isin teneama man tsuada jaya ea yubabiaimaxun jakia chipu chaxuwan chakabu bexun ea inankin matu menumakin ea matu padanmaibu ja juni chakabuwamanikadan, kupikin en yupuxanaii. Janua betsadan, nawa xukua betsa betsapa ewen datekubainkanikiki, matu keskamadan. Xanen ibujaidatun xanen ibu dasibi binu keyuadan, en eaki. Ea padanun, iwanan, jau shinanyamakubainunbunwen”, akin Jehová kushipajaida dasibi binu keyuatun jaska matu yuikiki.