Ja xabatian xanen ibujaida juxanaitianan, jabun Jehová duawaibu benima chakayamaxankanikiaki, na janchadan
4
Jehová kushipajaida dasibi binu keyuatun matu ana yuikin: “Bai anua jamapai miban tsekaxun jawen xaka ichawakin janus manchinxun kuamisbu keska wakin ibubis kenmisbu dasibi inun chakabubu dasibi kupikin chi ji ikai anu en jatu menukin keyuxanai ja xaba chi kushipaya ma taxni kemaikiki. Ja xabatian jukidan jawa betsa texewama en jatu menu keyuxanaii. 2 Jakia matubu ewen datekin man ea duawakubainmisbu badi pexeai keska en pepa matu chaxaxunxanikiki, ana jawa matu isin tenemama en kupiti matu nemaxunidan. Jaskaiwen taea benimai matubu man ishchu ishchu ikunkainxanaii, kene medanua ina awa bake kainkainai keskaidan. 3 Ja xabatian en matu pewaxunkubainai juni chakabubu man pema pema akubainxanaii, mai mishpu pema keska wakinan.4 Ja inun, betsadan, Mati Horeb anuxun en tsuma Moisés en yusinti jancha en inani jeneama shinankubainkanwen. Ja yunuti jancha inun ja nemati jancha Israelin enabu dasibibun ninkakin jau chibankubainunbunwen.
5 Uinkanwen. Ja xaba mese dasibi datemakin ea en Jehován kupiaitian judiamaken en jancha yuixunika Elías jiwepaunidan, ana matu anu en yunuxanaii. 6 Elías juxun epabu inun jabun juni bakebu sinatanameaibu pewakin jatu daenamemakubainxanikiki, jatun shinan betsa wamakinan. Jamen Elías juxun matunabu yusinkin pewamaken jakia ea kayabis juxun matun mai pakea dasibi kupikin en matu yamawakin keyui juxanaii”, akin Jehován jatu yui chani keyunikiaki.