2
Habacuc ana janchakin:“Jehováan, jaska dasibiwen en nuiai shinankin
ja ikin en mia yukaxu jaskada
min ea kemaimenkain, tapinun ika
beputi xui mekenika jawa pes ikama nixun
uinbaunmis keska ninkakin
en mia manaii”, en wa
2 Jehován ea kemakin yuikin:
“Mapu sapa waxun tsusindiama
ji kenu debu mesiwen
jaska en mia unanmai kenewe.
Tsusiain kuabu min nexea
xabakabi min keneshina
tsuanda uinkin jawa keti ikama
jawaida yuibainkin tapintidubuki.
3 Jaska nama keskawen en mia unanmai
jawaida juamabiaken
janu juai katutan en yunua
chanima juxanikiki.
Jakia jawa niti ikama juxanaiwen taea manayukubainxanwen.
Pepabu jatu ichakawamisbu eska jatu axankanikiaki, na janchadan
4 Eska jatukidi kenewe.
Juni chakabubudan, kein jiwemisbuki.
Jakia juni pepabu jiweidan,
Diosun jancha ikunwain chintuanma
unanuma jiwekubainmisbuki.
5 Juni kenikabudan,
jawen jatu yunuti kushipa
ana jayakatsis ikin benamisbuki.
Jaska kushipawen padanananbiai
jawa juindukuanma benabauni
jawen yunuti kushipa ana ichapa jayakatsis imisbuki.
Mawabu jatu maiwamisbu keska wakin
ja kenmisbu jaxpaxun jatu xea keska wakin
yuda betsa betsapabu tibi jatu achitan ibuwanun ixun
shinankin jawa jatu jenetidubumaki.
6 Jakia tsuanda nawa xukua betsa betsapabu jatu achimabun
jabu achimabun jatuki kaxexankanikiki,
jatukidi kantai eskaidan:
‘Matunamabia jatu datebain mebinkubainkin
mabu inun pei midima man ma jayawen taea
¡man peidaxankanwan! matu anu kupiti mese juxanayadan.
Ja mabu inun pei man jatu mebinkubainkin ichawakubainaidan,
¿jatian man jatu jenexanai?’ jatu waxankanikiki.
7 Man jatu dibia jatiada man jatu pakaxanun matu manamisbu
jatixuinda ana matu manama
jawaida matu yukakin datekin
matun jawada mebinkin keyukin
matun tadidi matu pekadiabainxankanikiki.
8 Matuki sinatabidani
nawa betsabudi ichatan
man jatun mabu inun jatun pei
man jatu mebini keska wadiakin
matunadi dasibi matu mebinkin keyuxankanikiki.
Jatun mai pakea anuxun
janu jiweabu inun jatun maewan tibi
man jatu chakabu wakubaini tibiwen taexun
matudi kupikin manakuxankanikiki.
9 Tsuabubeda jatube detenamekin
mese binutan jatun mabu yumetsubidan
matun jiwe tibi man mata wamiswen taeadan,
matu anu kupiti mese juayadan,
¡man peidaxankanwan!
10-11 Matun mae mishki kenebaunibu inun
matun jiwe jawen nabu nakishkun tibi
matuwen taea sai sai ibaunkin
yuda xukuabu midimajaida
man jatu yamawakin beduniwen taexun
matudi yamawadiai bexankanikiki.
Man jatu jaska waniwen taea
matunabu dakejaidaxankanikiki.
12 Caldeabuun, matun maewan Babilonia anuxun
jatu ichakawakin yunuti pepa chibanma
jatu padankin dayama chakayamakin
juni ichapa man jatu tenankubainibuwen taea
matu anu kupiti mese juaya
¡man peidaxankanwan!
13 Jamen daya chakayamai jin jin ikin
matun maewan man beninidan,
Jehová kushipajaida dasibi binu keyuatun
chiwen menu keyukin matu yamawanxanikiki.
14 Ja jaskaitianan,
mai jidabi anu jiwebaunabu
dasibibun Jehován kushipakidi unanxankanikiki,
ianenwan matai dasibibun uinmisbu keskaidan.
15 Matu dapi jiwebaunabu
uva vino dau betsa kapantan jatu amakin
man jatu paenwan
tadiuma jabun jatu uinmakin
jatu dakewamisbuki.
Man jabun jatu paenwanmis
¡man peidaxankanwan!
16 Kein man kushipabiamisken
matun kushipa betsa wakin
matu dakewakin
man chakabu besti wamis
matunabu xabakabi uinmakin
ana jawa jatu matu kenwanmama
Jehová matuki sinatakin
dake pae matu achimaxanikiki.
17 Líbano mati matipa anuxun
jatun jimi jaba wakin
man jatu detekubainiwen taexun
jabiaskadi wakin matudi detekin
matun jimidi jaba wadiakubainxankanikiki,
matun inabu tenan keyukin
matu datejaidakinan.
18 Yushin jatu dami wamakin keyutan
¿jawen jawa watimen?
Jamen besti kenwantidubuki.
Ja yushin damidan,
jakidi jawen chani besti mia unanmakin yusintidubudan,
¿jawen jawa watimen?
Jamen besti ninkatidubuki.
Yushin dami jaska janchatiduma
tsuanda ja yushin dami wabiamisdan,
¿jaskatan jaki chiti itidumen?
Chanima jamen tsua jaki chiti itidumaki.
19 Ji dami yushin jawa janchatiduma tsuanda yuikin:
‘Bestenwen’, akin
mishki dami yushin yuikin: ‘Beniwe’, aka
¿jawa jancha matu yuitidumen?
Ja dami oro mane inun plata manewen dapuxbiabu
ibubis jawen jiwea jayamawen taea
matu jawa yuikin kematidubumajaidaki.
Jaskawen taea man jabun kenwanmisbu
¡man peidaxankanwan!
20 Jakia jawen jiwe kayabi templo medibi anu Jehová jiweaki.
Jaskawen taexun mai jidabi anu jiweabun pes manixun
jawen jancha ninkakin
jau kenwankubainunbunwen”, ikin Jehován ea yuishinaki.