HABACUC
Habacuc inun Jehová janchanamenibukiaki, na janchadan
1
Diosun jancha yuixunika Habacuc Jehován jaskaxanai unanmakin yuinikiaki.2 Ea Habacuc punu nukaxun Jehová yukakin:
“Jehováan, medabe en mia yukabia
min ea ninkama
¿jatiki mia yukakubainxanpa?
Pubenkin nuku ichakawaibu
jatu nuku nemaxunkin
bextexuni min judiamaken
¿jatiki kaxayabi mia yukakubainxanpa?
3 Enabun chakabu wai ichakanikakubainmisbu
¿jaskakin chakabu tibi min ea uinmai?
Ea kebaunabudan, dasibi mae tibi anua
ja ibukuni detenamei pubein
atimapai chakabukubainkanikiki.
4 Moisin nuku yusini keska chibankin
jatun yunuawen xanen ibubun nuku yunuabumaki,
chanima jancha danankinan.
Chakabubun yuda pepabu ichakawakubainkin
pepa jancha betsa wakin
jatu padanmisbuki,
jawa yunuti pepawen jatu jiwemamadan”, en aka
5 Jehován ea kemakin yuikin:
“Yuda xukuabu matu dapi jiwebaunabu uinkanwen.
Jatu uin man datejaidaxanaii.
Jaska en samama axanai
tsuanda matu bebunkidi yuibia man ikunwantidumaki.
6 Ja Caldea nawabu puben tsakanamenikabudan,
en jatu beduwaii.
Jabudan, mai jidabi jatunamabia
bukubaunkin jatu mebintan ibuwamisbuki.
7 Caldea nawabu mesebu inun chakabubunan,
jatu datemakubaini
jawa tsuan yunuti unankatsi ikama
jaska ibubis besti shinainbu bestiwen chakabukubainmisbuki.
8 Jatun caballo kushipajaida jawawen dateama kushikainkin
inu keneya betsa binubaintidubuki, beamakinan.
Ja dikabi, kaman inu betsa lobo kushipajaida
meshu medan mapumisbu binuabuki.
Caballo katsaumeabu midimajaida chaijaida anua bekin
tetepan jawen piti jawaida nuyakain yuinaka achimis keska
achinun ika jawaida ishchukain
jatu tenan keyumisbuki,
jatuwen jawa nuiamadan.
9 Dasibi chakabu wakin keyukubidanaibuwen taea
bebunkidi dasibi datejaidakubainaibu
jatu deteama yudabu midimajaida jenewan kexa mashiti keska
tsuan jatu tana keyutidubumabiaken jatu achimisbuki.
10 Xanen ibujaidabu inun
xanen ibu bexmas yununikabuki kaxekin
jatun mae mishki kushipa kenebiabaunibuken
jatuki dateama usanmisbuki.
Jatun mishki kenebaunibuki mai maspu wakin matawatan
jaki mapekebain
jatun maewan achi keyumisbuki.
11 Niwe kushipajaida xunku ibainai keska bei
Mekenika Yushin shinanma
ibubis jatun kushipa besti chiti itan ikubainmisbuki”, ikaya
12 ninkatan ean Jehová yuikin:
“Jehováan, en Mekenika Dios medibi
mawatiduma min jiwei ikibi ika en unaiin.
En Mekenika Jehováan,
Israelin enabu chakabumisbu jau mia jatu kupixunxanunbun
Caldea nawabu min jatu kushipa waniki.
13 Min miadan, min pepajaidawen taexun jawada chakabu min nemamiski,
jawa jeneamadan.
Min pepajaidawen taexun jawada chakabu uinkin
ja bechipaiama min dananmiski.
Nun Israelbu chakabubiabun
padananankin Caldea junibu sinatapai chakabujaidakin nuku binujaidabuki.
Jakia jatun mae jaska chakabujaidabiaken
¿min jaskakin jatu kupikatsi ikama jatu jawa yuimamen?
14 Ianenwan anua baka inun
ni medanua yuinaka xanen ibu jayabuma jiweabu keska wakin
¿jaskakin min nuku mekekin duawamamen?
15 Caldea nawabun yuda xukua betsabu jatu achitan ibuwakubainmisbuki,
junibun xeamatiwen inun jisinwen
baka bixun ichawaxun uin
benimamisbu keskaidan.
16 Jaskawen taea baka binikabun
jatun yushin dami kenwanmisbu keska wakin
jatun jisin inun jatun xeamatiwen baka nuepa midima biaibuwen taea
benimakin inabu tesenxun
jawen piti xeni inun xeni ininipa
jabun jatu kuaxunkubainmisbuki.
17 Baka binikabu keskakin ja Caldea nawabun
¿jawa jatuwen nuiama
ana yudabu jatu detekin achikubainxankanimenkain,
jatu ichakawakinan?” itan,