Habacucun Jehová kenwankin jawen kushipakidi yuinikiaki, na janchadan
3
Diosun jancha yuixunika Habacuc Jehovábe janchakin yuiniki:2 “Jehováan, dasibi min akubainmiskidi
ninkakin uin
mia bechipaibiai e iki miwen en datekunkainaii.
Nun jiweyua nuku unanmakin
min kushipawen jaska min akubidani keska wakin
min kushipa ana nuku uinmawe.
Nun Israelbuki min nukuki sinatabiai
min nukuwen nuiai nuku uinmawe”, iwanan,
3 “Mikidi eska yui nun kantamiski:
‘Mae kesuakea Temán anua Dios ma juikiki.
Mati Parán anua nukun Dios medibi ma juikiki.
Dios chaxakapatun nai jidabi chaxa waya
mai jidabi anuxun Dios kenwain
jakidi kantakubainmisbuki.
4 Jawen meken anua bin chaxa chaxa wabidani
dasibi jawen yuda chaxai keyukidani nukun Dios juikiki,
jawen kushipajaida ibubis junemis xabakabi jatu uinmabidanidan.
5 Dios juaikidia isin betsa betsapa chakabujaida bebubidanaya janua Dios ichun
yuna paepa bekin jatu isin tenemabidanikiki.
6 Dios jui jaskakidani niti ikaya
dasibi mai pacha sakui saki saki ikaya
ja mati matipa inun mawa keyatapa
ikibi ini pudekeai
nun uinsmabia pudekei keyubidanaya
jaskai nawa betsa betsapabun uin datejaidai
saki saki ikubainkanikiki.
Jakia Dios jaskakunkidani jawen jiwea ikibi ika jawa bextekeamaki’,
iki nun mikidi kantakunkainaii.
7 Cusán anu jiweabu
ana jaskatima dakei bika tenejaidaibu inun
Madián anu jiweabudi jabudi datejaidaibu
en jatu uinmaki.
8 Jehováan, ¿jene tibi inun ianenwan dasibiki min jatuki sinatajaidai?
Min caballo tadanbaintiki nia
¿min ma jatu maemai juai?
9 Min detenameti kanun inun pia ichapa min ma pewaima min jayaki.
Janua jenewen mai paxka akeakekin
jene bai tibi wakin min ma pewaimaki.
10 Mati matipatun mia uin saki saki ikaibun
janua nai anua ui kushipajaida ikaya
janua jene matajaidai tunkax tunkax ibidanaya
ianenwandi nuajaida buspu tsaubidanbidanikiki.
11 Min pia min bishku bishku aka chaxa chaxa ichakayamaya
min jashidi min puta puta aka jawen debu anua
kana bakai keskai chaxa chaxa ikaya
badi inun uxedi ja taxnimis anua ana taxniamaken
12 janua mai jidabi anu jiweabuki jatuki sinatajaidai kakunkaini
nawa betsa betsapa jiweabu
jatu kupi min jatuki pai pai ika keskaxanaii.
13 Jatun xanen ibujaida mian ibubis min katuni inun,
minabu medabewanun ika taxnikidankin
juni chakabubun jiwe bedankin yamawakin
janua tsuanda jiwe wakatsi
ja dukun mishki buyakin taewai
jabu miki sinataibu min jatu yamawanxanaii,
kini besti jatu jenekinan.
14 Xanen ibun detenamenikabu caballoki katsaumebidanaibu
midima kushipai kein niwe keskabidani:
‘Nuku besti nun kushipaki’, ika
jawaidabidan nuku tsuan medabewama dabanen
junebidan nuku tsakakin kushimakin
yamawanun ika bebiaibun
ibubis jawen piawen jatun xanen ibu min tsakaxanaii.
15 Ianenwan nuajaida buspu tsaubiabidanaya
nakui min caballo ichapawen
min kushikaunxanaii.
16 Min jaska waxanai ninkatan en datejaidaii.
En kexa tadi tadi iki
en yuda jidabi en kushipa benui babui
en kishi mestentiduma ikimaki.
Jaskabiaxanaya nukuki sinataibu tsakanamenikabu ja xabatian
Diosun jatu bika tenemabiaxanaya
jaskabiaya ean unanuma en manakubainxanaii.
17-18 Nukun Mekenika Jehován
nuku paxawaxanaiwen taea
en benimajaidaxanaii.
Nukun mai pakekauana nukuki sinataibun
dasibi chakabuwakin keyuabun
higuera ji jua jawa jayama inun,
uva bai jawa bimi jayama inun,
olivo ji jawa bimi jayamadiken
janua bai anudi jawa miban bimi tsekatidubu jayamadiken
chaxuwan xukua dasibi yumetsui keyuabu ana jayama inun,
inapan jiwe anu ina awa betsa taska niamabiaken
Jehová en kenwankubainxanaii.
19 En xanen ibu Jehován ea kushipa inankin
ni chaxu jawaida kainmis keska
en kishi ea wa
mati keyatapa janu paxati anu
Jehován ea iyukin mapemaxanikiki”, inikiaki.