Israelin enabu jatun chakabuwen ma bimi jushinjaida keskanibukiaki, na janchadan
8
Januxun Mekenika Dios Jehován ana betsa ea uinmashina matu yuinun ea ninkakanwen. Kukiki bimi jushinjaida mata tsaua en uianyan 2 Jehován ea yukakin:—Amósiin, ¿min jawa uiain?— ea wa
ean kemakin yuikin:
—Kukiki bimi jushinjaida mata tsaua en uiaiin— en wa
Jehován ea yuikin:
—Israelin enabu jatun chakabuwenan, ma bimi jushinjaida keskabuki. Jatun chakabu tede akin en ana besti wakin jatu buaxunkatsi ikamajaidaki. 3 Ja xabatian Dios kenwanti jiwe jemaintin anua kenwain kantabiai betsatani bis bis ibaunaibu ja yudabu midima jatu tenan keyuabu tsuanda june jatun yuda xadabainbainkin jatu udenxankanikiki— akin Jehován jawen jancha mestenwanshinaki.
Israelin enabu janu jatu kupixanai ma kemaikiaki, na janchadan
4 Jawa jayabuma nuitapabiaibun matun mai anuxun ana jatu ichakawakin man jatu chakabuwamisbuun, ea ninkakanwen. 5 Matubunan, eska yui man janchamiski: “Uxe bena janu besiti binukainaya nukun xekiwan trigo jatu inankin pei ichapa bikatsi ikin nun jatu inankubaintiduki. Janua juindukunti xaba binukainaya jawen tanati pishta inun jawen xankama unanti chakabuwen jawen kadu xekatan nun jatu inankubaintiduki. 6 Nuitapaibun nuku dibiabu jawen taexun pei bikatsi dayadu esclavo jau jatu wanunbun jatu inankin nuku dibiabu nun jatu inan jawen nuku pakatidubuki, bichi tae besti nuku dibibiakenan. Ja dikabi xekiwan trigo dexka chakabubiaken jadi nun jatu inandiaxanaii, pei bikinan”, ikin man shinan chakakubainmisbuki. 7 “Jaska man chakabuwakubainmisbu en jawa jakima taskama ixanaii, ea en Jacobun Dios ibubis matukidi en yubakaii”, iki matukidi Jehová janchaimaki.
8 Badi tibi Egipto anu ja jenewan ewapa Nilo bai
matatan netsutantanmis keskai
mai pacha sakui mai namanua inatan
janua ana main butuaya
dasibi jiwebaunabu kaxa chakayamaxankanikiki,
datejaidaidan.
9 Jehován jawen jancha mestenwankin yuikin:
“Ja xabatian badi manananbi chaxabia
badi ibubis nukai
mai jidabi meshun achi keyuxanikiki.
10 Man besiaibutian janu en matu tenanyan
man bis bis ixanai inun
man kantai matu betsa wakin
mawa beabu man kaxa chakayamaxanaii.
Minabu mawabuwen nui
jawen punu nuka jawen unanmati bexa tadi sawea
nui tenejaidai maxtekei man maweden ixankanaii.
Matun juni bake bestichai mawaken
ana jania bitima nui kaxa chakayamai keskai
dasibi juinti nishmai keyuxankanikiki.
11 Mai jidabi anu buni pae
en yunuxanai ma kemaikiki”, iwanan,
jawen jancha ana mestenwankin yuikin:
“Ja xaba jaskaitianan, piti kayabiwen buniama
unpax kayabi manuama
jakia en jancha ninkakatsis ixankanikiki.
12 En jancha benai yudabu jadakidi kai
unanbuma bedutubauni
ianenwan itamamajaidakidi bui inun,
jenewan kexa betsaudi bui inun,
nortekidi bui inun, badi juaikidi bubia
jakia jania en janchaki nukutidubumajaida ixankanikiki.
13 Jabiatiandi chipash jawenduabu inun bedunan kushipabu
unpax manujaidai unanyamasi shinanexankanikiki.
14 Samaria anua yushibubu dami
tsuabunda man yubamisbuki.
Janua tsuabuda yubakai janchaidan,
Dan anu jiweabu matun yushibun jiweawen man yubakamisbuki.
Janua Beerseba anu yushibubu jiweabuwen
man yubakakubainmisbu mawai man di ixanaii,
ana jaskatan man benitidubumadan”,
akin chanima jancha Jehován ea yuishinaki.