—Jehováan, ¡nukun chakabu nuku buaxunwen! Jacobun enabu nun ichapamawen taexun jatitun nun tenetidubumaki, debui keyukinan— en wa

3 januxun ea kemakin yuikin:

—Jaska shinankin min ea yuiaidan, en ana jaska kainmama ixanaii— akin jawen kupiti Jehován jeneshinaki.

4 Eskadi Jehován ea uinmashinaki. Matu ana yuinun ea ninkakanwen. Kupikin chi jede kujaidai Jehován yunua bekin mai uke medanua jene netsukin tsusinwankin taxka wakin keyuxun yunu bai anua dikabi tsusinwankin keyukubainaya uinkin 5 ean yuikin:

—Jehováan, nukuwen nuikin ¡menaan, nedi iweama jabiadi niti awe! Jacobun enabu nun ichapamawen taexun ja chi nun betsistidubumaki, debui keyukinan— en wa

6 januxun ea ana kemakin yuikin:

—Jaska shinankin min ea yuiaidan, ja dikabi en ana jaska kainmama ixanaii— akin jawen kupiti Jehován jeneshinaki.

7 Eskadi Jehován ea uinmashinaki. Matu ana yuinun ea ninkakanwen. Maewan mishki kenebaunibu dapi Jehová nia dispiki shunbun dunuawen mishki kenebaunikatun jawen daya yushtuma pemenkain, iwanan, unanti jawen mekenwen tsumaxun duntanxun 8 Jehován ea yukakin:

—Amósiin, ¿en meken anua jawa min uiain?— ea wa

ean kemakin yuikin:

—Jawen nichin yushtumawati unanti min jayaki— en wa

januxun ea yuikin:

—Na nichin pemenkain, iwanan, unantiwen enabu Israelbudan, jaska jatun shinan pewen jiwekubainkanimenkain, iwanan, en jatu unanti wakubainxanaii. Jatun chakabu tede akin en ana jatu buaxunama ixanaii. 9 Januxun Isaacun enabun ja tadi jiwe medanxun ea kenwanpaunibu yamawakin jatu keyumatan januxun Israelin enabu nortekidi jiweabun jatun mekenika yushibubu kenwanti jiwe betsa betsapa jatu chakabuwamakin keyumatan jenexankanikiki. Jaska wakin Jeroboamnen enabuki sinatakin nupe chaipawen jatu detexankanikiki— inikiaki.

10-11 Betel anuxun Amasías jawenabu Diosbe janchaxunikatun Samaria anu Israelin enabu xanen ibujaida Jeroboam anu jancha bumakin yuikin: “Israelin enabu jiwebaunabu namakis anu Amós nikaunkin mikidi chanikin mia detexanaibu yuikubaunkin jatu yuikin: ‘Nupe chaipa kenujaidawen matun xanen ibujaida Jeroboam detetan man Israelin enabu dasibi chaijaida anu matu iyuxankanikiki, ana jaska chintunbidantidubumadan’, akin yuikubaunai jas jancha yuiai ninkakin ana tenetidubumakiaki”, axun jancha bunika yunua jawen jancha buxun

12 januxun jawaida Amós kena jua ja bebun nia Amasíasin Amós yuikin:

—Diosun jancha yuixunikaan, nenua nuku jenebaini Judán enabu anu menan kadiwe. Diosun jancha yuixunkubaini jadi jiwea dayakin min jamapai bikubainditanwen. 13 Ja inun, na kenwanti jiwe anu nukunabu dasibi bebidan bebidanmisbuwen taea janua ana jaska ixanai jatu yui janchayamawe. Jakia nenu nukun xanen ibujaidatun mae Betel anuxun nuku yunuai anudan, tadi jawen kenwanti jiwe medibi nun jayaki— aka

14 jakia Amósin kemakin yuikin:

—Eadan, en Diosun jancha yuixunikamaki. Ja inun, ibubis en jaska yuitidumadiki. Jakia eadan, en Diosun jancha yuixunikatun bakemadiki. Jamen ja dayakin en jamapai en bimisdan, chaxuwan mekekubainkin inun higo ni medanua jawen bimi tsekakubaini en jawen jiwekunkainimaki. 15 Jakia jabiatiandi chaxuwan en mekebiaken Jehován ea jenematan ea yuikin: “Enabu Israelbu norte anu jiweabu anu kaxun en kushipawen en jancha ea jatu yuixunkubaintanwen”, iwanan, ea nichinmaki. 16 Jaskawen taexun Jehován jancha mia yuinun ninkawe. Mian ea yuikin: “Israelin enabukidi chakabu yuikin Dios janchaxunyamawe. Ja dikabi Isaacun enabukidi jatu yuanyamawe”, min ea wabia 17 eska Jehován mia yuikin: “Min ain maewan anua xabakabi jininipai chutanamekunkainxanikiki. Min juni bakebu inun min ainbu bakebu nupe chaipa kenupawen detekin jatu tenanxankanikiki. Min bai inun min inabu inun minabu betsa betsapa dasibi xau senke númeroya udenkin jawen unantan jatu paxkakin bixankanikiki. Miadan, chaijaida anu mia iyuabu januxun Jehová ikunwanbuma anua min mawaxanaii. Minabu Israelin enabu achixun chaijaida anu jatu iyuxankanikiki, ana jaska chintunbidantidubumadan”, akin jaska xabakabi yuitan kainkainikiaki.