Diosun Israelbu nawabu jatu kupimaxanikiaki, na janchadan
6
Sión anu jawa bika teneama man jiwei pebiamisbudan,¡man peidaxankanwan!
Samaria anu jawa dateama jatuki chiti ika man jiwebiamisdan,
¡man peidaxankanwan!
Matun mae xanen ibu kushipabu yununikabun
Israelin enabun man jatu benamisbudan,
jabudan, ¡man peidadiaxankanwan!
2 Asiria nawabu maewan Calné anu
buxun uintankanwen.
Janua Siria nawabu maewan ewapa jatu binua
Hamat anu buxun jatu uindiatankanwen.
Janua butubaini buxun Filisteo nawabun maewan Gat anu buxun uindiatankanwen.
Ja nawabu betsa betsapabun mae matuna keskamabiaken man jatu jawa binuamaki.
Jakia matun mai pakeadan,
jatun mai pakeatunan, matunadan, binuamaki.
Ja mai pakea tibi jawa dasibi pemaki.
3 Jehován janu matu kupiai
xaba chakabu jubiaxanaya jaskakidi
man shinankatsi ikamaki.
Jaskai jiwetimabiaken
chakabu matun xanen ibu keska wakin
man chakabu mese besti pa waii.
4 Januxun piti ichapa waxun pi
elefante makushpi mabu wati benibuwen
jawen dakati jawenduajaida wanibu
janu baxti itan dakai petan
chaxuwan bake inun ina awan bake xua nami
matu xuixunabu beyuskin man pikubainmisbuki.
5 Mimawati betsa betsapa
Davidin ani keska jatu amatan
Davidin mawani keska wama
unanmabia unanumas tepedewe man mawa pewaismaki.
6 Kencha ewapabuki uva vino nuxukubainkin
man xeni ininipajaida pepawen man cha iake iakemisbubia
matun mai pakea inun matunabu chakabuwatidubu
jatuwen nuiti man jatukidi shinankubainsmaki.
7 Besi watan pitin kayanwanxun pi
man janchajaidabiamis
matu nesewabainkin matubu dukun achixun
nawa detenamenikabun chaijaida anu matu iyuxankanikiki,
jadia man ana chintunkidantidumadan.
8 Nukun Dios kushipajaida dasibi binua Jehován ibubis janchakin eska ea yuishinaki:
“Jacobun enabu ibubis kenkubainaibu danain en jatuki sinatajaidakunkainaii.
Jatun jiwe ewapa jawendua betsa betsapa tibi bechipaiama
jatun maewan inun jawada dasibi jaya
jatuki sinataibu yunukin
dasibi jatu inankin jatu achimatan
en jatu ibu wamaxanaii”,
ikin jawen jancha mestenwanshinaki.
9-11 Jiwe ewapa jawendua dasibi inun jiwe ewapabuma dasibi jawenabuyabi jau jatu kupinunbun Jehován jatu yunuxanikiki. Dasibi chakabuwakin keyuxanaibuwen taea jiwe bestichai anu 10 juni jatu texe washinabu dasibi mawadiaxankanikiki. Date paepaibun jawenabu jiwe betsa anua mawa jawen yuda binun ixun jawenabu betsan jatun jatu biai yuka ikin: “¿Juni betsa jiwea uke medan mibe jayamen?” aka kemakin yuikin: “Nenu tsua ebe jayamaki”, aka jatun yuikin: “Jehován nuku kupiaya jawen kena jawa datan akin jawa yuiyamawe”, akin yuixanikiki.
12-13 Matubunan, jawa xabakabi unanma benimakin yuikin:
“Nukun kushipawen jatu binukin maematan
ikis nun yunuti kushipa jayaki”,
man ibiamis ja jancha pepa yuibiakin
betsa wakin tenanti dau keska man wakubainaii.
Ana betsa wakin maewakinan, ja yunuti pepa man jawen sinatati chakabu wakubainaii.
¿Kushikaini mishki mati matipa anu caballo kai
jawama ishchuakeakekaintidumen?
Itidubumajaidaki.
¿Janua ianenwan ukebukun tsispukin
paxkabainkin tsuan atidumen?
Atidumajaidaki.
Jaska keskadiai Diosun kupiti man betsa watidumaki.
14 Israelin enabuun, eskaki. Shinankin peidawakanwen.
Jehová Mekenika Dios kushipajaida dasibi binu keyuatun matu yuikin:
“Matu ichakawanun, iwanan,
nawa kushipajaidabu matu anu
ean en jatu iwexanaii.
Norte chaijaidakidia bekubidankin
sur chaijaidakidia anuadi bediakin
matu achitan dasibi ichakawakin
jadakidi matu nitima waxankanikiki”,
akin chanima jancha Jehován ea yuishinaki.