Dios jatuwen nuiaiwen taea jau ana chintununbun jatu yuinikiaki, na janchadan
5
Israelin enabuun, ea Amós en janchai ea ninkakanwen.Matuwen taea nui matukidi jabuai
en kaxai ea ninkakanwen:
2 Israelin enabu jawendua jawa chakabuma pepa besti man ibianibu
man ibubis atimapai chakabutiani man chakabuki,
tin itan jaska ana benitiduma keskaidan.
Tsuan matun chakabuwen taexun
matu benitiduma
matun mai anu tin ikima man maniabuki.
3 Man Israelin enabudan,
eska Mekenika Dios Jehován matu yuikiki:
“Maewan anua ja detenamenikabu 1,000 man jatu yunuabu
bua detenametani chintunbidanidan,
jabu jatu deteama ishianbu
100 besti jiwea bexankanikiki.
Mae jatiubuma anua 100 detenamenikabu man jatu yunuabu
detenametani 10 besti jiwedia chintunxankanikiki”, itan,
4-5 Jehován Israelin enabu ana yuikin:
“Beteldan, chakabuwakin yamawakin di ashianbu manixanikiki.
Guilgal anu jiweabu tsuan jatu medabewama
chaijaida jatu iyuxankanikiki.
Jaskawen taea Betel anu matun yushibu kenwain buama inun
Guilgal anu ana jadi buamadi inun,
Beerseba anu ana jadi mapuyamaxankanwen.
Jakia ea benakin en jancha ninkai
eki dasitan jaskai ebe jiwekubainxankanikiki”,
akin ea yuishinaki.
6 Man jiwekunkainkatsis ikaidan,
Jehová anu chintuntan
jawen jancha chibankin
ea akubainkanwen.
Jakia man jaska wamaken
betsatian chi kushipajaida keska
Jehován matu anu yunuxanikiki,
man Israel jiwebaunabu anudan.
Ja inun, Betel anua ja chi ketikainai
tsuan nuka watiduma ixanikiki.
7 Matudan, ¡man peidaxankanwan!
Diosun yunuti kushipa pepa
betsa wai man jawen Dios sinatamamisbuki.
Yusinti chanima kayabi betsa wakin
man chakabuwakubainmisbuki,
jawada jawen jiweti pepabiaken
mai anu chaka udean keska wakinan.
8-9 Bishi xukuabu jawen kena Pléyades inun Orión dami wakin
Jehován aniki.
Jatunan, meshu betsa wakin xaba taxnimamiski.
Januxun ja xaba anua maewakin meshudi taxnimadiamiski.
Ianenwan anua jau jene inabainun kena
ana inabain nidi ikin
mai anu mecha wakubainmiski.
Mishki kenebaunibu kushipabiaken
jatun jatu di amakin
ja maewan medan jatun jiwe kushipa jatu yamawamamisdan,
jawen kena Jehováki.
10 Matudan, ¡man peidakanwan!
Diosun yunuti kushipa pepawen matu nemabiaibun
man jatu dananmiski.
Chanima jancha yuimisbu jatuki chikishkin
man jatu ana ninkakatsis isbumadiki.
11 Nuitapaibun xekiwan trigo tsekaibu
man jamen jatu bianmiski,
mae xanen ibun yunuti chibankin
jatu yumetsunkin
jatu pema pema aka keska wakinan.
Jaskawen taea mishki jiwe jawendua
man jatu amabiaima anu
man ja medan jiweama ikunkainxanaii.
Uva bai pepa man jatu banamabiaima
jawen bimi tsekatan
uva vino wabiaimabu
man januxun jawa akama ikunkainxanaii.
12 Kanekubainkin matun chakabu
jeneama man akubainai en unanjaidaii.
Pepabu bika tenemakin
man jatu danankubainmisbuki.
Jau jatun chakabu kaka wayamanunbun
june jatun pei man jatu bianmiski.
Pepa inun chakabu man unanti wanikabu bebunxun
jabu nuitapaibun matu medabe yukabiabu
man jatu pewaxunkatsi isbumaki,
jawa jatu medabewamadan.
13 Man chakabu wabiakubainmisbuwen taexun
unanepabun jawa matukidi yuikin
pewaxuntiduma pesxun besti matu uintidubuki,
matun shinan chakabu jaska waxun
matu betsa wamatidubumadan.
14 Chakabu ana benama pepai jiwekunkainun ika
pepa besti benakubainkanwen.
Man jaskakin chanima yuikubainaibudan:
“Mekenika Dios kushipajaida
dasibi binu keyua Jehován nuku medabewamiski”, iwanan,
man shinanmisdan, chanima matu medabewaxanikiki.
15 Danankinan, chakabu besti akubainkanwen,
pepa besti bechipaikinan.
Ja inun, jabun pepa inun chakabu unanti wanikabun
jau ana matu ichakawama
matu pe bestiwen manakuxunkubainunbun
jatu uindakubainkanwen.
Jamen man jaskaibu man Israelin enabu nortekidia matu texewabainimabudan,
Mekenika Dios kushipajaida dasibi binu keyua Jehová
matuwen ana nuikin matu medabewatidumenkain.
16-17 Eska Mekenika Dios kushipajaida dasibi binu keyua Jehován matu yuikiki:
“Janu kupinun ika en juai anu
jemaintin janu icha juindukunmisbu xaba tibi anua
datei kaxabaunaibun
mae bai tibi anua mapua kaxai bis bis ibaunaibun
jatun yunu bai anu dayaibu
jabudi ichatan kaxaibun
peiwen taea jatu kaxaxuni bis bis imisbu
jabudi datei kaxa chakayamaibun
uva bai anu dayaibu kaxadiaxankanikiki”, akin
jaska Jehován ea yuishinaki.
18 Matun Xanen Ibu Jehová ja xabatian janu juxanai uinkatsis iki
man mana chakayamabiaidan,
¡man peidaxankanwan!
Ja xabatian janu jaskakidanxanaidan, ¿man unain?
Ja jaskaitianan, meshu keska chakabu besti ixanikiki,
jawa xaba pepa jayamadan.
19 Juni betsan inu betsa león bechibaini paxabiai
unudia yuinaka puben oso juaiki bepusia keska ixanikiki.
Janua betsa ikidan, jawen jiwe anu jikitan
dunu jawen dintuki tsamia jaki tabiai
pia keska ixanikiki.
Jaska dasibi mese betsa betsapa kainxanikiki.
20 Chanima janu Jehová juxanaitianan,
jawa xaba jayama,
meshu ten ikai keska besti ixanikiki,
jawa pemadan.
21 Man eskamisbu Jehován matu ana yuikin:
“Jaska ea kenwain besikunkainkin
man chakabuwakubainaidan,
jadan, en danaiin.
Ichai petan man ea kenwanbiakin
jawen jiwekainkin man ea benimawaismaki.
22 Yuinaka xeni inun xekiwan trigo dudu kuakin
man jawen ea duawakin kenwankatsis ibiaya
en ana ja bechipaiamaki.
Ea ana daewanun ixun ina awa bake xuadanwan tesenxun
jawen yuda jidabi man ea menu keyubiaxuna
jawen nue danankin en ana jakidi pe shinanma ixanaii.
23 Ja man ea kenwain kantai matun jui kaiainan,
ea ninkamai ikama jamakidi besua ikanwen.
Ja matun mimawati arpa jui kaiainan,
en ninkakatsi ikamadiki.
24 Matu anua en yunuti pepa kaiain
en matu uinkatsis ikaii,
jene jabai jeneisma keskadan.
Juni pepakin man ana jatu padanbuma
en matu uinkatsis idiaii,
matun pepa chacha unpax jawa netsuisma keskadan.
25 Israelin enabuun, ea ninkakanwen. Janu tsua jiweabuma anu 40 año jiwekubaunkinan, matun xenipabunan, jatun inankuin tibi inun jatun inabun xeni ea kuaxunkin ¿jabun ea kenwanpaunibumen? Ea jaska waxunaibu en uianma ikunkidaniki. 26 Jakia na eskatian matubunan, jabun dami wani matun xanen ibujaida Sicutin dami inun bishi Quiiún dami, yushibubu damidan, jawa jeneama june bekubidanibuki. Matubunan, jabias keskadi man shinankubainaiwen taexun 27 Damasco uke betsaudi chaijaida anu en matu jatu iyumakubainxanaii, ana jadia chintunkidantimawakinan”, akin Mekenika Dios kushipajaida dasibi binu keyuatun ea yuishinaki, jawen kena Jehovánan.