4
Man Samaria anua ainbuaibu jawenduabuman Basán anu ina awa yuxan xuadanwan keskabuun,
ea ninkakanwen.
Nuitapabiaibu jatu bika tenemakin
jawa jayamabiabun man jatu ichakawakubainmisbuki.
Januxun paenun ixun
matun benebun jau uva vino matu bixuntanunbun
man jatu yunukubainmisbuki.
2 Mekenika Dios Jehová medibi jiweatun
matukidi yubakin yuikin:
“Xeamati betanti watan matu jawen achixun
matun bakebudi xeamati ewapawen betantan
matu dasibi iyuxanaibu ma chaima bea kemakanikiki.
3 Matun maewan mishki kenebaunibu bexpa anu
matu kekuntan kainmabainkin
iyuxun Mati Hermón anu matu udenxankanikiki”,
ikin Jehován jawen jancha chanima mestenwanikiaki.
Diosun Israelbu jatu kupibiakubaina jawa tapinkatsi isbumakiaki, na janchadan
4 Jehován ana jatu yuikin:
“Betel inun Guilgal mae medibi anu jadi ana buditantankanwen.
Matun xenipabu en yusini jancha danankin ea sinatamakin
chakabui man pikujaidakunkainaii.
Penama tibi matun mekenika yushibubu
jawen daewati nami xeniya buxun jatu kuaxunkin
xaba dabe inun besti tibi
matun diezmo jatu inandikubainkanwen.
5 Jawen benimawati misi xaxa watiuma
chi tapu anuxun matun yushibu dami jatu menuxundiakubainkanwen.
Mae tibi anu tsuabunda jau jatun inankuinti bexununbun
jatu banabimadikubauntankanwen.
Jaska man bechipaikin amis besti shinankin adikubainkanwen,
en jancha man ninkaismadan”, akin
Jehován jawen jancha chanima mestenwanikiaki.
6 Jehován ana jatu yuikin:
“Matun maewan tibi anua en matu buni tenemaimaki.
Matun mae tibi anuadi
matun piti keyukin en yamawaimaki.
Jakia en matu jaska wabia
jawa shinan betsa watan
ea shinain ea anu man chintuanma ikubainimabuki”, akin
Jehován jawen jancha chanima mestenwanikiaki.
7 Ana yuikin:
“Ja dikabi xekiwan trigo tsekadiabuma
uxe dabe inun bestitian taewakin
ui en yunuama ikunkainimaki.
Maewan betsa anu ui imakin
jakia maewan betsa anudi
ui imakin en yunuama ikimaki.
Jatun yunu bai betsa anu ui imakin
jakia yunu bai betsa anu
ui yunuama en tsusinwankin keyuimaki.
8 Ja yudabu jatun maewan anu unpax jayamaken
maewan betsa anua unpax bechinun ika
benai bukubaunkin
unpax eskadabes bechibiabu
ja unpax manukin abiabu unpax ichapamawen taea
jawa unpax manuaibu jatu mainwanma ikimaki.
Jakia en matu jaska wabia
jawa shinan betsa watan
ea shinain ea anu man chintuanma ikubainimabuki”, akin
Jehován jawen jancha chanima mestenwanikiaki.
9 Jehován ana yuikin:
“Niwe kushipajaida inun
isin betsa betsapawen en matu datekubainimaki,
kusha kusha aka keska wakinan.
Matun yunu bai inun
matun uva bai utsi wakin
matun higuera ji inun matun olivo ji
shinin jau pikin keyununbun
en jatu yunuimaki.
Jakia en matu jaska wabia
jawa shinan betsa watan
ea shinain ea anu man chintuanma ikubainimabuki”, akin
Jehován jawen jancha chanima mestenwanikiaki.
10 Jehován ana yuikin:
“Jaska Egipto anu atimapa betsa betsapa en jatu yununi keska wakin
isin betsa paepa matu anu en yunuimaki.
Matuki sinataibube detenamei matun bake bedunanbu
jau mawanunbun
en jatu jeneimaki,
jatu medabewamadan.
Matuki sinataibun matun caballo ichapa matu biantan
matu buainbu en jawa matu nemaxunama ikimaki.
Detenamei mawashinabu chapui
pisi maiai matun jiwe tibi anuxun
en matu xetemaimaki.
Jakia en matu jaska wabia
jawa shinan betsa watan
ea shinain ea anu man chintuanma ikubainimabuki”, akin
Jehován jawen jancha chanima mestenwanikiaki.
11 Ana yuikin:
“Jaska Sodoma inun Gomorra nawabu
en jatu kupini keska wakin
matu chakabujaidawakin matu yamawabiakin
en matu keyuama ikunkainimaki,
kadu menui keyui tsistekainai anua
matu nexekin akawakinan.
Jakia en matu jaska wabia
jawa shinan betsa watan
ea shinain ea anu man chintuanma ikubainimabuki”, akin
Jehován jawen jancha chanima mestenwanikiaki.
12 Ana yuikin:
“Man Israelin enabudan, eanan,
en matudi kupikatsis ikaii.
En matu jaska waxanaiwen taea
en matun Mekenika Dios matuki sinatakin
en matu kupixanaiwen taexun
jaska man tenexanai
bebunkidi shinaindakubainkanwen”, akin
Jehován ea yuishina ninkaidakanwen.
13 Jehován mati matipa wamis inun,
niwe xunku imamis inun,
jaska yubakani yudabu unanmamis inun,
xababiaken jatun betsa wakin meshu maewamis inun,
mai dasibi anu mati keyatapajaida tibi anu nikaunmisdan,
jawen kenadan, Mekenika Dios kushipajaida dasibi binu keyua Jehováki.