Diosun jancha yuixunikabun dayadan, eskakiaki, na janchadan
3
Matun xenipabu Egipto anua Jehován jatu taxnimabidanixun man Israelbu matu yuiaidan, ninkakanwen:2 “Mai jidabi anu nawa xukuabu tibi jiwebiabaunabun
jabukidi shinanma matu besti katukin
enabu en matu waniwen taexun
chakabu betsa betsapa man akubainmisbuwen taexun
ja shinankin en matu kupixanaii”,
akin matu yuikiki.
3 Jabias shinan wantan yuda dabe
ketaxamea maputidubuki, pepa besti akubainidan.
4 Inu betsa leónen ni medanua
yuinaka betsa achitan
benimai ji ji ikai
chaijaidaxun ninkatidubuki.
Inu betsa leónen jawen baken jawada yuinaka achitan
jawen kini anu buxun piaya
yuinaka betsan dunkebainaya
jaki yaushi tekeden tekeden imisbuki.
5 Juni betsan manaundi jisin bidunwankin punteawen taea
uianma isa jui jaki idutan yabukui
mai anu tin imisbuki, achiadan.
Jamen bidun betsa wakin
janu padanti piti manchinbaunawen taea
yuinaka juxun ja piti pikin
ja ji dishkia bekumanakin
ja yuinaka dispiwen tenexmiski.
6 Jamen maewan anu mese juaya
jatu unanmakin
tsuanda trompeta chan chan akaiwen taea
yudabun ninkai datemisbuki.
Ja maewan anu jaska kainan,
Jehován ma janu chakabu jatu yunua
jaska besti kainkunkainmiski.
7 Jehován tsumabu jawen jancha yuixunikabu
jawen shinan bebunkidi jabu dukun banabimadiama
Jehován jawa aismaki,
yuda betsabu kupikinan.
8 Chaimakea inu léon jui kushipawen ji ji ikaya
¿tsuan ninkai datetidubumamen?
Dasibi datetidubuki.
Jamen Diosun jawen tsuma ma yunuawen taeadan,
¿tsuan janchaxuntidumamen?
Tsuanda ninkatan xabakabi jatu banabimatiduki.
Maewan Samaria Diosun kupixanikiaki, na janchadan
9 Ma Diosun matu yunuawen taeadan,
jawen jancha jatu yuikubainkanwen:
“Maewan Asdod anu xanen
ibubun jiwe jawendua tibi inun
Egipto nawabun mai pakea anu
xanen ibubun jiwe jawendua tibi anu bua jatuki chanitankanwen:
‘Jatun chakabuwen taea
ibubis jatunabu nuitapa wakin
ichakawamisbu jatu uinun ika
Samaria mati matipa anu bekanwen’,
aki jatuki chanitankanwen,
jabu jiwe chakaibu inun
detenamei betsa betsapaibu
jau jatu uin benunbunan”, jatu watan
10 Jehován jawen jancha ana yuikin mestenwankin:
“Enabu Samaria anu jiweabudan,
jawa pepa unankin akabumajaidaki.
Jatu detekin jatun mabu bikin yumetsutanxun
jatun xanen ibubun jiwe jawendua betsa betsapa tibi anu adukubainmisbuki.”
11 Jaskamisbuwen taexun Jehován jatu yuikin:
“Matuki sinataibun matun mai pakea kebaunxankanikiki.
Matun maewan Samaria mishki kenebaunibu kushipabiaken
bedankin keyutan matun jiwe jawendua betsa betsapa anua
matun mabu dasibi man adukubainmis
biantan matu keyu buanxankanikiki”, itan,
12 eska ana Jehován yuikin:
“Inu betsa león juxun chaxuwan achiwanxun piaya
chaxuwan mekenikan chibanbain pikin keyudiama
jawen mestentiwen kusha kusha akin
león mepanmakin jawen tae dabemenkain,
jawen pabinki debumenkain,
jawen pabu jawada texeista mebintidu keska
Damasco anua jaki baxti iti jawendua beabu
mabuyabu jaki baxti imisbu eskadabes
Israelin enabu Samaria anu jiweabube paxaxankanikiki”, itan,
13 Mekenika Dios kushipajaida dasibi binua
Jehován jawen jancha chanima mestenwankin yuikin:
“Matubun en jancha ninkatan
Jacobun enabu chakabumisbukidi
xabakabi jatuki chanikubainxankanwen.
14 Israelin enabun chakabu betsa betsapa wakubainmisbu ja xabatian en jatu unanti waya
Betel anu ja chi tapu jakixun yushibu betsa kenwanmisbu
ja dabe inun dabe jawen machankan mexteabu
mai anu tin ikaya
en jatu yunua yamawaxankanikiki.
15 Xanen ibubun jiwe jawendua betsa betsapa jatu chakabu wamakin
ja elefante jawen maxun makushpi chaipa juxupa nantakea ichapa bexun
jatu inanbu ja makushpi jiwe wakin
jawendua wanibu chakabuwamakin
ja jiwe anu xanen ibubu matsitian janu jiwemisbu inun
badiantian janu jiwemisbu dasibi
en jatu yamawamaxanaii”, akin
Jehován jawen jancha chanima mestenwaniki.