2
1-2 Januxun Jehován ana betsakidi yuikin:“Moab nawabun chakabu betsa betsapa akubainibuwen taexun jakimama
jatu kupikin en jeneama ikunkainxanaii.
Edomnen enabu xanen ibujaida mawa maiwabiaimabun
ichakawakin Moab nawabun jawen xau betsetan
kuakin mapu besti wanibuwen taexun
Moab nawabun mai pakea anu
mae tibi jatu kua keyumakubaunkin
jatun xanen ibun maewan Queriot anu
xanen ibubun jiwe jawendua tibi
chiwen en jatu yamawamaxanaii.
Nawa betsabube jatu detenamemakin
trompeta en jatu chan chan amaya
detenamei bis bis ikubainaibun
Moab nawabu mawaxankanikiki.
3 Moab nawa xanen ibujaida
jawen xanen ibu bexmasbube jatu achimatan
ean en jatu tenanmadiaxanaii”,
ikin Jehován yuiniki.
4-5 Januxun Jehován jawenabu Judákidi yuikin:
“Judán enabun mai pakea anu jiweabun
chakabu betsa betsapa akubainibuwen taexun
jakimama jatu kupikin en jeneama ixanaii.
En yunuti jancha inun en nemati jancha
ninkakin chibankatsi ikabuma
ea en Jehován en yusinti jancha danankin
jabias yushibubu dami jatun ibubun kenwanpaunibu
na jabias yushibubu kenwandiakubainaibuwen taexun
Judán enabun mai pakea anu
mae tibi kuabaunkin maewan Jerusalén anu
xanen ibubun jiwe jawendua betsa betsapa tibi
chiwen en jatu yamawamaxanaii”, itan,
Israelin enabu paxkanibu 9 xukuabu nortekidi jiweabu Jehován jatu kupixanikiaki, na janchadan
6 januxun Jehován jawenabu Israelkididi yuikin:
“Israelin enabu nortekidi jiweabun
chakabu betsa betsapa akubainaibuwen taexun
jatu kupikin en jeneama idiaxanaii,
jabun jatu eska wakubainaibuwen taexunan.
Israelbun jawenabu pe jiwebiabun peiwen taexun
jatu inankin nuitapawamisbuki.
Ja inun, betsa nuitapai jiwebiaken
jatuwen taexun jatun bichi tae bimisbuki,
dayadu esclavo jau jatu iyutanunbunan.
7 Jaska inun, en yunuti pepa chibanma
jabun kanekin juni betsabu nuitapai keinsbuma
babuwakin jatu ichakawamisbuki.
En kena pepa medibikidi ea jatu yuanmakin
junin jawen bakebetan jabias ainbu chutamisbuki.
8 Tsuanda matu dibia jawen tadi bianyuimaxun
ja tadi bekantan jaki dakaxun
yushibubu dami kenwanti piti manchintan
jatubetan man pimiski.
Ja dikabi tsuan jawa chakabuwakin
kaneamabiaken padankin
jamen ichakawakin jawen pei pakamatan
ja peiwen uva vino bixun
jatun mekenika yushin kenwanti jiwe anuxun
jatubetan ja vino man akubainmisbuki.
9-10 Man chakabubiaken
eanan, Egipto anua matun xenipabu jatu taxnimabidankin
jatu bai bepenxunbidankinan,
Amorreo nawabun mai pakea anu jatu ibuwamanun, iwanan,
janu tsua jiweabuma anu 40 año
unanxubida en jatu imatanbauniki.
Ja Amorreo nawabu juni keyatapabu kuxa inun
ji betsa roble kushipa keskabiabun
dasibi yamawakin en jatu keyuxuniki.
11 Israelin enabuun, en matu padanma inun,
man ea padantidumaki.
Matunabu anua en jancha yuixunika
en jatu katukubainmis inun
juni medibi Nazareo jawen bu maxtetima inun
jamapai shadabu buspuai atidubumadi katudiakin
en jatu yunukubainmiski.
Jaska en jancha chanima kayabiwen
en matu mestenwaniki”, itan
12 “En jatu jaska wabianiken matubun jatu ichakawakin
juni medibi Nazarenon vino akatsi ikabumabiaken
man jatu amakubainmiski.
Ja inun, en jancha yuixunikabu
en kena kushipawen janchaibu
jatu ninkakatsi ikama
man jatu nemakubainmiski,
jau ekidi janchayamanunbunan.
13 Ean matu kupikin ina awan tadanbainti xekiwan trigo
matajaidawaxun bumakin tadanbainkin
mai pudekin mishpu wamabainmis keska wakin
jabun matu chai iyuaibu janu man paikainai
ja mai en matu pude pude amakubainxanaii.
14 Jakia kushichakayamabiakainmis
jaskatan binubain paxatidubuma ixankanikiki.
Matun detenamenika kushipajaidabiabu
jatun kushipa benui babuxankanikiki.
Mentsisipabiamis jaskatan ibubis meketiduma ixankanikiki.
15 Jawen piaki chiti ika kushipabiamis
jaskatan ibubis meketidubuma ixanikiki.
Kai jawaida nia nia ibiabainmisbu inun,
caballoki katsaumebainmisbu
jaskatan ibubis paxai meketidubuma idiaxankanikiki.
16 Ja xaba jaskaibutianan,
matun detenamenika mentsisipajaidabudi
paxanun ika jatun detenameti mabu dasibi
pekatan udenkin sa abainxankanikiki,
paxatanun ikadan”,
jaska jancha jatu yuikin
Jehován jawen jancha chanima mestenwanikiaki.