AMÓS
Judán enabuki Dios sinatanikiaki, na janchadan
1
Judán enabun mai pakea anu jiweabu Ozías xanen ibujaidakin jatu yunukubainaitian inun, Samaria anua xanen ibujaidakin Israelin enabu xukuabu anua 9 paxkanibu 2 año mai pacha sakuchakayamadiamaken Joásin juni bake Jeroboamnen jatu yunukubainaitian mae pishta Tecoa anua chaxuwan mekenika Amós dayakunkainai na jancha Israelin enabu 9 xukuabu anu Diosun jawen jancha Amós yuimakubainikiaki.2 Jerusalén anu Mati Sión anuxun
tin ikainkainai keskawen
jawen jui Jehován jatu ninkamaya
basi chaxuwanen pimisbu nukaxanai inun
Mati Carmelo mamakia mai tsusin metujaidaxanikiki.
Israelbu dapi jiwebaunabu Jehován jatu kupixanikiaki, na janchadan
3 Eska Jehován jatukidi yuai ninkakanwen:
“Maewan Damasco anu jiweabun
Galaad anu Israel jiweabu
xekiwan trigo xemeti mane hierrowen
jatu kusha keyukin keyunibu inun,
jawa jatun chakabu jenekatsi ikama ikubainaibuwen taexun
en jatu kupikin jeneama ixanaii.
4-5 Jatu jaska wanibuwen taexun
Damasco mishki kenebaunibu
jikiti xui beputi kushipajaidabiaken
en jatu pudemakin baxnemaxanaii.
Chiwen jatun jiwe menumakin
xanen ibujaida Hazaelin enabu yamawamakin
jawen juni bake Ben-hadadin jiwe jawendua betsa betsapa en jatu kuamaxanaii.
Bet-edén anu yununika inun Bicat-avén anu xanen ibuai en jatu yamawamadiaxanaii.
Jatu jaska wamatan
Siria nawabu jatu achimaxun jatu esclavo wamatan
Quir chaijaida anu en jatu iyumaxanaii”,
iki Jehová jatukidi janchakin yuiniki.
6 Januxun Jehován ana betsakidi yuikin:
“Gaza anu jiweabun chakabu betsa betsapa akubainkin
Israelbun mae betsa jatu achi keyukin xakawabainkin
jatun dayadu esclavo wabainkin
Edom nawabun mai pakea anu jatu iyuxun
peiwen taexun jatu inankin
jatu ibuwamanibuwen taexun Gaza anuabu jatu kupikin
en jatu jeneamadi ixanaii.
7 Jatu jaska wanibuwen taexun maewan Gaza mishkiwen kenebiabaunibun
jatun jiwe tibi kuabaunkin
xanen ibubun jiwe jawendua tibi chiwen
en jatu yamawamaxanaii.
8 Maewan Asdod anu xanen ibujaida inun
maewan Ascalón anu yununika
en yamawakin keyuxanaii.
Dasibi en kushipawen maewan Ecrón en jatu achima
Filisteo nawabu jawa betsa texe jeneama mawai keyuxankanikiki”,
akin Jehován yuiniki.
9-10 Januxun Jehován ana betsakidi yuikin:
“Maewan Tiro anu jiweabun
chakabu betsa betsapa akubainibuwen taexun
jatu kupikin en jeneama ixanaii.
‘Israelbu man nukunabuki’, aki jatube yubakabianibu
jabias maewan anu jiweabu jatu achikin keyutan
dayadu esclavo waxun
Edom nawabu jatu inankin ibuwamanibuwen taexun
maewan Tiro mishkiwen kenebiabaunibuken
jatun jiwe tibi jatu kua keyumakin
xanen ibubun jiwe jawendua tibi
chiwen en jatu yamawamaxanaii”,
ikin Jehován yuiniki.
11-12 Januxun Jehován ana betsakidi yuikin:
“Edom nawabun mai pakea anu jiwebaunabun
chakabu betsa betsapa akubainibuki.
Jaskawen taexun jatu kupikin en jeneama ixanaii.
Israelbu jawenabu kayabibia
jatuki sinatajaidai tsuan jatu nematiduma
ibubis jatukidi shinain jatuki daetiduma
jatuwen nuiama
nupe chaipa kenujaidawen detekin
chibanbainkin jatu ichakawanibuwen taexun
jatun maewan Temán kuakin
jatun xanen ibun maewan Bosrá anu
xanen ibubun jiwe jawendua tibi
chiwen en jatu yamawamaxanaii”,
ikin Jehován yuiniki.
13-14 Januxun Jehován ana betsakidi yuikin:
“Amón nawabun chakabu betsa betsapa akubainibuwen taexun
jatu kupikin en jeneama ixanaii.
Jatun mai pakea ana ewapa wakatsis ikin
Galaad maewan anu Israelbu janu jiwebaunabu
detekin ainbu tuyadi nupewen chachikin
jatu pudis akubainibuwen taexun
nawa betsabu jatu detenamemaya
ja xabatian niwe bidenepa beaya
bis bis imakin
ja maewan Rabá mishkiwen kenebiabaunibuken
jatun jiwe tibi kuabaunkin
xanen ibubun jiwe jawendua tibi
chiwen en jatu yamawamaxanaii.
15 Jatun xanen ibu bexmasbube
jatun xanen ibujaida achixun
jatun mai pakea anua chaijaida anu
jatu iyuxankanikiki,
ana jadia chintuntidubuma wakinan”,
ikin Jehován yuiniki.