Jehován jatu kupiaya tsua paxama ixankanikiaki, na janchadan
9
Jerusalén anu jawen kenwanti Templo jemaintin anu chi tapu dapi Jehová nia en uianyan ea yuikin:“Ja chibu masua tibiki mane bronce maiti jawendua jaya
jau teskekidan nidi ikin yudabu jau jatu chusha chusha akubainun
ja bronce deda deda akin pude pude akubainkin
jeneyamaxanwen.
Tsuada jabu ja tekekidan jatu tenanmadan,
jabudan, nupe chaipawen en jatu tenanmaxanaii.
Paxabiai jaskatan bestichai jamesti piskukaini iduama ixanikiki.
2 Mai kini uke medanjaida junebiai kaken
jabiadia en jatu taxnimaxanaii.
Nai keyatapajaida anu jadi mapekebiabainabun
jabiadia en jatu butexanaii.
3 Mati Carmelo mamakijaida tsuada jadi junebiai kaken
jabiadia jatu benai en kaxanaii.
Eki datei ianenwan nuajaida anu junebiai kaken
ean jatu yunukinan, kushu ikan
jau jatu detenun en yunuxanaii.
4 Jau ana chintunyamanunbun
jatuki sinatamisbun chaijaida anu jatu iyuxun
nupe chaipa kenujaidawen
jau jatu detenunbun
en jatu yunuxanaii,
jatuwen nuiama jatu ichakawakin
ea bebunxun tenankinan”, ea washinaki.
5 Mekenika Dios kushipajaida dasibi binua Jehován
mai mea mai payukui babuaya
año tibi Egipto anu jawen jenewan ewapa Nilo bai matai ewatan
netsutantanmis keskai
mai manaundi inakaina ana xekei butuaya
janua dasibi yudabu jiwebaunabu
datejaidai kaxakubainxankanikiki.
6 Jehován jawen jiwe wakinan,
nai anu ma aniki.
Ja nai nanketapa mai bepumaniki.
Januxun ianenwan itamamajaida anua jene
jau benunbun jatu yunua
bexun mai anu ui imakin
mai mechawakubainmisdan,
jawen kena Jehováki.
7 Eska chanima jancha Jehován matu yuikin:
“Israelin enabuun, en matukidi shinanan,
matu inun Etiopía nawabu
man jabiaskaski, matun jiwea pemadan.
Egipto anua matun xenipabu en iweni keska wakin
natukan ewapa jawen kena Creta anua
Filisteo nawabu jatu iwetan
Quir anua Arameo nawabu en jatu iwedianiki”, itan
8 chakabuwen xanen ibukin
yunukubainaibu anu jawenabu chakabubu jatu uinkin
Jehován jatukidi yuikin:
“Na mai anu jiweabu en jatu tede akin yamawaxanaii.
Jatu jaska wabiakin Jacobun enabu dasibi
en yamawakin keyuama ixanaii,
jaskaida jatu keyuamadan.
Ea Jehován en jancha en mestenwaiin.
9 Chakabu inun pepa tsistakin
xekiwan trigo tamisbu keska wakin
Israelin enabu jau tsistakin akawanunbun
en jatu yunuxanaii,
jawa betsa pepa kauani jau benuyamaxanunbunan.
10 Enabu chakabububia dasibi jancha chakabui:
‘Jawada chakabu mese jukin ea meama ixanikiki’, ikin yui janchakubainmisbudan,
nupe chaipawen jatu tenanxankanikiki”, itan
Jatun mai pakea anu Diosun jawenabu ana chintunwantan pepawen jatu jiwemanunbadikiaki, na janchadan
11-12 Jehován ana yuikin: “Davidin enabun mae nawabun jatu babu watan di akin chakabuwanibu ana jabianudi mishki di anibu benikin jatun mae en jatu kushipa waxanai ma kemaikiki. Uatian jiwenibu keska ana jiwexankanikiki. Edom enabu jatidi texeabu inun yuda xukuabu tibiki en kena en netani Israelin enabube jau ana dasinunbun en jatu kushipa waxanaii”, itan jawen jancha Jehován jabias yuiai keska akin menexanai yuinikiaki.
13 Eska Jehován ana yuikin: “Xekiwan trigo chushijaida midimajaidawen taea tsekakin keyudiabuma ana janu banatitian kemaya mai yapubainaibutian juni betsabu bexankanikiki. Jawen jene tsinikin uva bimi midimajaidaki pai pai ikin keyudiabuma xekiwan trigo ana banatitian ikunkainxanikiki. Mati keyatapa inun mati tenanman anua unpax ichapa jabai keska uva vino ichapa jayaxankanikiki. 14 Enabu Israelbu chaijaida anu iyunibu jawenabu en jatu chintunwanxanaii, jadia ana jatu iwekinan. Bexun jatun maewan chakabuwanibu ana jawen xantukun ana benikin pewakin keyutan janu jiwewabaunkin uva bai banaima bimiai vino waxun akubainkin yunu bai banaimabu jatun yunu bimi tibi pikubainxankanikiki. 15 Jatun mai kayabi en jatu inani anu en ana janu jatu chintunwainma anua dayakin mibankubainaibu januxun tsuan ana jatu iyu taskama ikubainxankanikiki”, atan Mekenika Dios Jehován jawen jancha mestenwanikiaki.