Shinibube Jehová juxanikiaki, na janchadan
2
1-2 Tsuanda Mati Sión anuxun trompeta mawakin chan chan akinJehován mati medibi anuxun
mese juaikidi jawen unanmati jatu banabimakanwen.
Jehován jatu kupiaitian
nai kuin meshupa inun nai kuin uta
xabatian meshua yamea dakaxanai
ma kemaiwen taea
Judán mai pakea anu jiwebaunabu dasibi datei saki saki ixankanikiki.
Detenamenikabu kushipajaida midima mati matipa anu
bebidan bebidani
ma penai xabakidanai keska
dasibi nati ikabu uinxankanikiki.
Jaskaibu uatian tsuan uianma inibu inun
ana jaska kaiain unudi ana uianma ixankanikiki,
ana ja keska betsa taxniama ixanaidan.
3 Janua shini chi keska nukudiabuma
mai pepa anu miban jawendua dakaken
chi jede ji ji ikai keska
bekin dasibi kuakin achibainkin
binukaindiama dasibi menui keyubainaya
janua ja chi ma binukainaya
jabias mai anu miban jawendua ibiaima
janu tsua ana jiweama yenken dakaxanikiki,
jawa texe betsa jenebainamadan.
4 Ja shinin yudadan, caballo keskaki,
detenamei jaki katsaumebaini kushibidanaibu keskadan.
5 Mati matipa mamaki ja shini ishchu ishchu ibidanidan,
jawen jui kainmabidanaidan,
detenamei caballo jawen tadanbainti tadanmekainai jui keskabuki.
Tadux tadux ibidanaibu keska
nisa pei tsusin kua sakada sakada ibainai keskabuki.
Detenamenikabu midima unanjaidaibu
xukuabu tibi detenamekatsi
ma pejaida watan beaibu keskabuki.
6 Ja shini uin yudabu dasibi datei saki saki iki
besu juxua mapuabun
7 juni detenamenika mentsisipabu keska kushibidani
mae kenekauna janu inanun ika
niti ikama bui kekubaini jawa binui yushtuama
8 jawa betsa tu ikama
bestibu tibi jabias bai besti chibainbu
jatukidi pia midimajaida bishku bishku abiabu
jawa dateama ja xukubainaibu jawa pua iki paxkama
9 mae kenebaunibu anu ishchubainbaini inatan
butubaini jiwe tibi jikikain
yumetsubu jawa chaniama keska
janu uinti xui anu jikibainkin
maewan jidabi achi keyuaibun
10 jaskaibun jatu bebunua mai saki saki iki
nai tadi tadi iki
badi inun uxe ibubis meshui
bishi mawaida ana chaxama
11 jatu bebun kakin jawen jui tin ikainkainai keska
jawen tsumabu Jehován jatu ninkamakubidani
jawen yunuti jancha ninkakin axunkin menemisbu
midimajaida tsuan tana keyutiduma ixankanikiki.
Janua Jehován janu kupixanai xaba mesejaidatian
jawen kushipa uinkin
tsuan jawa nemakin bextetiduma ixanikiki.
Jehová nuikipa jatuwen dabanan ixanikiaki, na janchadan
12 Januxun Jehován jawen jancha chanima mestenwankin eska matu yuikin:
“Samakei bis bis iki kaxakin
matun juinti jidabiwen shinan betsa watan
ea anu chintundikanwen”, matu waikiki.
13 Matun chakabu jenetan shinan betsa wakin
matun Mekenika Dios Jehová anu chintuntan
ja besti chibankin
jawen jancha ikunwankubainkanwen.
Jehová nuikipa duapa jin jin isma
unanxubida sinatakunkainmis
bechipainamenikajaida matu kupikatsi ikamabia
matu kupitiduwen taexun
nui bika tenekin matun tadi man ushnimis keska wakin
matun juintinin man chakabumis uinmakin
matun tadi ushnia keska wakanwen.
14 Man jaskaibun matu kupinun ixun shinanbiai
ana jaska shinanma
shinan betsa waxanimenkain.
Jaskatan nukun Mekenika Dios Jehová
man ja tsekaxun inankuinun
xekiwan trigo inun uva vino matu inantiduki,
matu ana pepawen duawakinan.
15 Mati Sión anuxun trompeta chan chan akin
nukunabu ichawaxun
jatu banabimakanwen,
jau samakenunbunan.
16 Diosun enabu dasibi ichawatan
Diosun jau jatu ana dananyamanun
jatun chakabu tibi jatu jenemakin
jatun juinti jatu xunpin wanmakanwen,
anibubu inun, yuxabubu inun,
juni ewabu inun, bedunanbu inun,
chipashbu inun, bake mishtinbu inun,
bakeishtan chuchu akaibu inun,
dama ainyanbiaxu jatun ainbe taxnibidanaibu
dasibibu jatu ichawakinan.
17 Jehován kenwanti Templo jemaintin anu ichabu bebun nikain
Diosbe nukunabu janchaxunikabu
Jehová dayaxunmisbudan,
ja medibi dintu beputi anu
jawen kenwanti chi tapu namakis nia kaxakin
eska jancha Jehová jau yuinunbunwen:
“Jehováan, minabun chakabu tede atan ana shinanyamawe,
jau ana tsuabuda minabuki kaxekubainyamanunbunan.
Minabu nawa betsabun jatuna wakin ibuwatan
jau ana jatu yunuyamaxanunbunwen.
Jabun ikunwanbuman mikidi jatu yukakin:
¿Jania, matun Mekenika Diosdan? ikin
jau ana jaska jatu yuiyamakubainunbunwen”, ikaibun
18 jaska jancha yuiaibun jawenabuwen nuikin jawen mai pakea bechipaikin jatu shinain uinmakin 19 Jehován jatu ichakawama jatu yuikin:
“Matun piti jau keyuyamanun
xekiwan trigo inun, uva vino inun,
piti xeni en matu yunukubainxanaii,
ja pi man benimai pe pekubainxanunbunan.
Ja dikabi ikunwanbuma
jau matuki ana kaxeyamanunbun
en jatu matu nemaxunkubainxanaii.
20 Shini nortekidia matukidi beaibu
matu anua en jatu udenxanaii,
jadi tsua jiweabumakidi jatu nichinkinan.
Jabu dukun bebuaibu Ianenwan Mar Muerto anu
en jatu jasaxanaii.
Jabu chipu bekin jatu mekebidanaibu Ianenwan Mar Mediterráneo badi kaikidi anu
en jatu jasadiaxanaii.
En jatu jaska wa jatun yuda chapui
pisi mayaxankanikiki,
ea Jehován jatu betsajaida waxunkin
tsuan jaska shinantiduma wakinan”, ikikiki.
21 “En mai pakeaan,
jawa dateama benima chakayamadiwe,
Jehován jatu betsajaida waxunkin
tsuan jaska shinantiduma waxanaiwen taeadan.
22 Yuinaka basi anu mapuabun,
jawa dateyamaxankanwen.
Matun piti basi ana jukuin benexanikiki.
Ji shadabu bimi jayaxankanikiki.
Ji miban higo inun uva nishi jawen bimi midimajaida jayadiaxankanikiki.
23 Man Mati Sión anu jiweabuun,
benimadikanwen.
Janu ui pakei taekaini inun
janu badi pakei taekaini
janu xaba pepatian Jehován ui yunumiswen taea
matun Mekenika Dios Jehováwen benimakubainkanwen.
Chanima uatian matu axunmis keska
ana jabias keskadi matu axunkubainxanikiki.
24 Matu jaska waiwen taexun
matun xekiwan trigo bimi chakama man tsekaxanaii.
Ja dikabi uva vino inun piti xeni ichapajaida man jamen axanaii”, itan
25 Jehován matu ana yuiai ninkakanwen:
“Ja baditian jau shini mesebun matun yunu chakabuwanunbun
matu anu en jatu yunua bexun
matu yamawainmabunan,
ean en ana matun yunu inankin jayawaxanaii.
26 Matubun pikin yaniwakubainkinan,
ea matun Jehová Mekenika Dios
man ea kenwankubainxanaii.
En kushipa en matu unanmashinawen taea
man enabudan, ana matun dake pae teneama man ixanaii.
27 Ea en matun Mekenika Jehová en matubedan,
man Israelbun janu man ana ea unan taewabainxanaii.
Ea besti en matun Dios kayabi betsa jayama
man unanxanaii.
Jaskawen taea man enabudan,
ana taska matun dake pae
man teneama ikunkainxanaii”, itan,
Jawen Yushin Kushipa Diosun jatu anu yunuxanikiaki, na janchadan
28 Jehován ana jatu yuikin:
“Na eska binukainayadan,
ma badi jawen jenei kaya
en Yushin Pepa yuda dasibi jiwebaunabu anu
en jatu yunua jatu achixanikiki.
Matun juni bakebu inun
matun ainbu bakebu ekidi janchabaunxankanikiki.
Mestebu inun yuxabubu namawen jaska ixanai uinxankanikiki.
Bedunanbu inun chipashbudi nama keskawen jaska ixanai
en Yushinen jatu uinmaxanikiki.
29 Ja dikabi ja xabatianan,
matun dayadubu junibu inun ainbuaibu anu
en Yushin Kushipa en jatuki butediaxanaii.
30 Jaska inun, nai anua jawen e imati kushipa wakin
mai anuadi dami betsa betsapadi en waxanaii,
jimi jabamakin inun,
chi wakin inun,
nai anua basnun bai kua jawen kuin keska wakin
en jatu uinmaxanaii.
31 Ja jaskaitian badi ana pexeama
meshui inun
uxe ana chaxamadi jimi keska ixanikiki.
En bake kushipajaidai chaxakapa xanen ibui jua kemadiamaken
ja janu kupiaitian xaba mese atimapa ixanikiki”, matu waya
32 januxun tsuabunda:
“En Xanen Ibu Jehová Dios kushipaki”, ikin ea dayuiaibu
jabu besti paxakin jatun jiwea ikibi ika bixankanikiki,
mawa kayabi anu kamadan.
Jaska Jehován jatu yubanidan,
Mati Sión inun Jerusalén anu janu piskuti jayaki.
Janua tsuabuda Jehován ma jatu katuni jiwediakubainxankanikiki,
jawen kupiti mawa bika teneabumadan.