JOEL
Miban shinin chakabu wakin yamawaxanikiaki, na janchadan
1
Petuelin juni bake en Joel na kaka Jehován ea jatu yusinmaniki.2 Anibu unanepabu inun nukun mai pakea anu man dasibi jiwebaunabuun,
na jancha en matu yuiai ninka peidawakanwen.
Na chakabu jaska juai tenekin man memis keskama ma jayaki.
Jabias matun epabu inun matun xenipabun jaska ikai uianma ipaunibuki.
3 Jaska en matu yuiai natian ikaidan,
matun bakebu dukun jatu yuikubainkanwen.
Januxun jabundi jatun bakebu jaska man tenekubaini
jau matukidi yuidiakubainxanunbunwen.
Januxun chipu jatun bakedi kaindiaibudi
jau jabias jatu yui jeneyamanunbadinunbunwen.
4 Shini bexun yunu inun,
basi inun, miban shadabu pei pikin keyukin jenebainaibun
jatidi shini betsa ana bekin
ja texe wabainshinabu keyujaidakin ma yamawashinabuki.
5 Man paenawanbuun, bestentan uinkanwen.
Uva bimi jene ma pema pema akaibu
matu mebinxanaibuwen taea
vino anikabuun, kaxadikanwen.
6 Detenamenikabu kushipa midima keska
shiniwanan, inu betsa león bene xeta keska inun
león yuxan makushpia keskayatun
dasibi en mai pakea jidabi ma achi keyuabuki.
7 Nukun uva bai nishi chakabuwakin keyukin
nukun miban ji higuera senu senu akin
jawen pei inun jawen bichi dashpikin
jawen mebi metax wakin
juxu datanbainshinabuki.
8 Jamen betsadan, beneyakatsi jabe yubakaima ma mawaken
nui tadi bexa sawea bis bis iki
kaxakunkaini keskai
9 en kenwanti jiwe Templo anuxun Jehová kenwankin
inankuinti xekiwan trigo dudu inun
uva vino ana jayamawen taea
nukunabu Diosbe nuku janchaxunikabu ma kaxakubainkanikiki.
10 Yunu bai dasibi jawa jayama xaba besti dakaki,
mai besti pes daka kaxai keskadan.
Xekiwan trigo shiniwanen pikin ma keyukin benuabuki.
Uva nishi bana ma xanai keyuaki,
jawa betsa taska bexeamadan.
Olivo ji pei dasibi ma pashin keyua dakadiaki.
11 Man dayakapa bai anu dayanikabuun,
matun uva bana inun matun xekiwan trigo inun cebada bai anu
man banamis matun miban dasibi
ma benui keyuken
man jania ana tsekatimawen taea
punu nuka kaxakubainkanwen.
12 Uva nishi dasibi xanai keyua
higuera miban ji xanai jawen pei nidi iki keyui
jawen bimi ma benuaki.
Bimi batapa granado inun, banin inun,
bimi betsa manzana bai anua ji bimiya dasibi
ma xanai keyuawen taea
jaska keskadiai yuda dasibibun jatun benima pae
ma benukin keyudiabuki.
13 Matu man nukunabu Diosbe janchaxunikabuun,
Jehová kenwanti jiwe Templo anu dayakin
xekiwan trigo dudu inun
uva vinowen nukun mekenika Dios
jawen chi tapu anuxun
man ana inankuintidubumaki.
Jaskawen taea matun tadi pepa pekatan
nui tadi bexa sawetan
nuichakayamai kaxadikubainkanwen.
14 Anibu unanepabu inun
nukun mai pakea anu jiwebaunabu jatu yuikanwen.
Nukun mekenika Dios Jehová kenwanti jiwe Templo jemaintin anu ichatan
samakekin januxun medabe Jehová yukaxankanwen.
15 ¡Ma pemajaida juaya nun peidakanwan!
Jehován janu kupixanai ma kemaikiki.
Xaba mesejaidatian nuku dasibibu unanti wakin
kushipa dasibi binu keyuatun
jawen kupitiwen yamawabaunxanikiki.
16 Nukun bedubi nukun piti dasibi nuku mebiainbun
nukun mekenika Dios kenwanti Templo jemaintin anua
jawa benimati jayama ma keyukunkainikiki.
17 Mai xexakin kedanwanbainxun
ja xekiwan trigo jexe banakin sa abiabu
beneama mawai benui keyuaya
janu aduti dintu tibi di akin ma keyuabuki.
18 Jamen ina awan jatun basi benai maan maan ikaibun
jabiaskadiai chaxuwan xukuabu mawakubainkanikiki.
19 Jehováan, pemakin jui kushipawen min medabe en mia yukaii.
Janu tsua jiweabuma anua basi inun
nukun bai anua chiwen ji kuakin ma keyuabuki.
20 Ja dikabi paxku ma netsui taxkai keyuken
chiwen jatun basi menui keyuken
yuinaka inabuman mia yukadiakanikiki,
jau min jatu medabewanunan.