3
Ana eska Jehován matu yuiai ninkakanwen:“Ja jaskaibutianan,
jaska Judán enabun mai pakea anu inun
Jerusalén anu bika tenei jiwekubainmisbu
ana jaskama jatun jiwea betsajaida
en matu waxunxanaii,
jaska uinsbuma matu axunkinan.
2-3 En mai pakea anua enabu jatu achitan
paxka akeakekin peiwen jatu inankin
jaikaimas yuda betsa betsapabu anu jatu yunuakeakenibuki,
mai jidabi anudan.
Jatu eska wakinan, jawen jamapai unanti xau mexte númeroya putakin unantan
enabu paxkaxun juni bakebu inun
ainbu bakebu dayadu esclavo jatu amakin
peiwen taexun jatu inanbauntan,
chipu jatuwen taexun pei bishianwen jawen uva vino bikin inun
ainbu jininipabu chutakubainibuwen taexun
ja nawa tibibu en jatu ichakawaxanaii.
Jatu jaska watan Josafat Paxku Napaku anu jatu iyuxun
Israelbu enabudan,
jabun ea jatu ichakanwanibuwen taexun
unanti watan jatu manakuxunkin en jatu kupidiaxunxanaii.
Yuda xukuabu tibi Jehován jatu unanti watan kupixanikiaki, na janchadan
4 Maewan Tiro inun maewan Sidón inun dasibi betsabu man Filistea mai pakea anu jiweabuun, ¿ekidi jawa shinankin man ea jawa wakatsis ikai? ¿Eki sinatakin manakukin man ea ichakawakatsis ikai? ¿Jawa en matu dibia man ea pakamakatsis ikai? Man jaska bikatsis ikaidan, ja matu inanma jaska man jiwe chakawen samama jawaida en matu kupikin memaxanaii. 5 Matun xenipabunan, en kenwanti Templo anua en plata mabu inun en oro mabu yumetsubainkin buxun matun yushibubu kenwanti jiwe anu jabun adunibuki. 6 Judán enabun mai pakea inun Jerusalén anu jiweabu achitan dayadu esclavo jatu wamakin chaijaida jatu nichinkin peiwen taexun Griego nawabu matun xenipabun jatu inanibuki. 7 Jakia eanan, jadia jatu peiwen inanbianibun Israelin enabu ana ichawanun, iwanan, en jatu iwexanaii, jabun mae anu jau ana jiwekubainunbunan. Matun xenipabu Filisteobun Israelbu jatu bika tenemanibu keska jabiaskadi bika tenemakin en matu kupixanaii. 8 Januxun matu manakudiakinan, matun juni bakebu inun matun ainbu bakebu Judíobu en jatu inanxanaii. Januxun jabundi Sabeo nawabu chai nenumajaida jiweabu jau peiwen jatu inanxanunbun en yunuxanaii. Ea en Jehován en jaska matu yuiaii”, itan
9 ana jatu yuikin:
“Nawa xukuabu tibi na en jancha jatuki chanibaunkanwen.
Detenamenikabu jau dasibi jatu pewakin keyununbunwen.
Jatun mentsisipabu jatu kena bea
detenamebainkatsi jau ichai benunbunwen.
10 Ja babubunan, shinan betsa watan
jau eska yuinunbunwen:
‘Eadan, en kushipajaidaki’, ikidan,
januxun jatun mai yapubainti betsa wakin
jau nupe kenu chaipa midima wanunbunwen.
Ja inun, jatun nupe xewetiya trigo mexteti betsa wakin
jau jashi midima wadianunbunwen.
11 Jamen man nawabu betsa jatu dapi jiwebaunabuun,
menan jawaidabidan
jatuki dasi ichai bedikanwen.
Junin detename shinainsmabia betsabidan
jau detenamedi benunbunwen.
12 Januxun nawa xukuabu tibi
Israelin enabu dapi jiwebaunabu
Jehován jatu unanti waxanaiwen taexun
yuda xukuabu dasibi detenamenun ika
pewakin keyutan Josafat Paxku Napaku anu
jau ichai benunbunwen.
13 Ja yudabu chakabujaidabu jatu detekinan,
ma xekiwan tsekatitian kani jushian daka
mextekin tsekamisbu keska jatu waxankanwen.
Vino wanti ma uva bimi jushin keyua tsekatan
jaki pai pai imisbu keska wakin
jatu maemakin keyuxankanwen.
14 Jehován jatu kupixanaitian ma kemaiwen taea
januxun Unanti Wakin Katuti Paxku Napaku anu
yudawan ichapajaida janu ichai keyuxankanikiki.
15-16 Jerusalén anu Mati Sión anuxun
tin ikainkainai keska jawen jui Jehován jatu ninkamaya
nai inun mai chuduin taka taka ikunkainaya
badi inun uxe ibubis meshua dakaken
bishi mawaida ana chaxamaken
jakia Jehován enabu Israelbudan,
jatun Jehová anu idui piskuxankanikiki”, itan
Judán enabun mai pakea pepa unanuma inunbadikiaki, na janchadan
17 Jehován ana matu yuikin:
“Ja man ea anu jaskaitianan,
chanima en matun Mekenika Dios Jehová
Sión en mati medibi anu en jiwea
man unanxanaii.
Ja inun, Jerusalén maewan medibi unanuma jawama ixanikiki.
Ichakanikai mebinanain detenamei nukunabuma
nawa betsabu ana betaskatidubuma ixankanikiki.
18 Ja xaba jaskaitianan,
ui ikaya mati anua jene jababidanmis keskai
uva vino inun ina awa chuchu ichapa
jamen ikai man jayaxanaii.
Judán enabun mai pakea anua paxku tibi
unpax midimajaida jayadiaxanikiki.
Ja inun, en kenwanti Templo anua chacha unpax tuetan
paxku Sitim napaku anu jabapakexanikiki,
mai dasibi pepa mecha wakinan.
19 Jabiatiandi Judán enabun mai pakea anu jiweabu achikin
pepabu jawa chakabuama ichapa jatu detekin
jatun jimi chakawakin jabamakubainibuwen taexun
Egipto nawabun mai pakea anu
dasibi di akin keyunibu ana maema
mashi besti pes dakaxanikiki.
Ja inun, Edom nawabun mai pakea betsa wadiakin
jau janu tsua ana jiweyamanunbun
jatu kupikin en jawa jayama wadiaxanaii.
20-21 Eadan, en jatube manakunanxanaii.
Jatun chakabuwen taexun
jatuwen nuiama en jatu buaxunkatsi ikamaki.
Jakia Judán enabun mai pakea inun
maewan Jerusalén anu ikabudan,
jabudan, jiwepakexankanikiki.
Jamen ea Jehová jiweidan,
en Mati Sión anu
en jiwepakediaxanaii”, iniki.