Xanen ibujaida Belsasarin jatu pimakin jatu besimanikiaki, na janchadan
5
Badi ichapa ma kaya Babilonia xanen ibujaida betsa Belsasarin jatu pimakin jatu besimanun, iwanan, 1,000 jawenabu yununika xanen ibubu xukua tibi anua jau benunbun jatu yunua bukubaunkin jatu yuikubauntanshinabu dasibi ma bei keyushinxun xanen ibu jatubetan pikin uva vino ichapa akubainkin 2-3 xanen ibujaida ma paean benimakin Jerusalén Templo anua mane oro inun mane plata kencha ichapa jawen juchi Nabucodonosorin jatu bemani jau bitanxun jaki vino jatu amabaununbun Belsasarin jawen dayadubu yunua buxun kencha dasibi ichawatanxun xanen ibujaida inun, jawen ainbuaibu inun, jawen nantakea ainbuaibu inun, dasibi jabetan piaibun Jerusalén Templo anua kencha benibuwen vino aki 4 paenxun jatun yushibu oro inun, plata inun, bronce inun, hierro inun, ji inun, nenkati dami wanibu kenwainbun5 jabiatiandi junin meken besti taxnixun kene pechiudi bin dekuabu tsaua xabakan dintu kene juxupa anu kenekin taewaya ja meken besti xanen ibujaida Belsasarin uin 6 datei besu juxujaidatan jawen yuda jidabi saki saki ikin 7 bis bis ikin Babilonia anu yushin yukamisbu inun, unanepabu inun, bishiwen unanmisbu jatu kena beabu kene metukin jatu yuikin:
—Ja kene tsuanda yuikin unantan jadidi jancha yuia man ea tapinmadan, xanen ibun tadi tashi jushinipa sawemaxun oro mane teumatan xanen ibui ea kachu tsaumis anu ja dabe inun besti xantukun yunui tsaumisbu anu en tsaunxanaii— jatu wa
8 unanepabu xanen ibu dayaxunmisbun dasibi jikibidan jakia ja dintu kene juxupa anu jawada kenea unantan jadidi yuibainti tsuan xanen ibu tapinmatidubumawen 9 taea xanen ibujaida Belsasar ana datejaidai jawen besu juxui keyuken jawen yununikabun uin jawawen jaska watima ikaibun 10 xanen ibujaida inun jabetan piaibu bibiski ikaibun xanen ibun ewan ninkatan jikikidan yuikin:
—Xanen ibuun, ¡jabi min jiweyukunkainxanaii, jawa bextekeamadan! Jaskaida jawen datei besu juxua dakayamawe. 11 Janu min yunu keyumis anu juni betsa Dios medibitun yushinen unanmakubainmis min juni jayaki. Min juchi jiwea xanen ibuaitian yushibubu keska jawen shinan jawa junema xabakabi inun tapinika inun unanepakin ja junin jatu unanxunkubainiki. Jaskawen taexun nukunabu mukayabu inun, yushin yukamisbu inun, unanepabu inun, bishiwen unanmisbu jatu mekei jau xanen ibukunkainxanun min juchi xanen ibujaida Nabucodonosorin ja juni katuniki, 12 jawen kena Danielbiaken kena betsa wakin Beltsasar wanidan. Jawada namabu jakidi unantidu inun, junea jancha jatu unanmakin yusintidu inun, jawada itimaskabiaken pewatidu shinan xabakabi jawaida tapinkin unanmamis yushin jaya ikunkainiki. Daniel menan kenadiwe. Ja juxun ja dintu kene juxupa anu jawada kene nea jaska yuitikidi mia unanmaxanikiki— aka
13 jawen ewan jancha ninkatan jau Daniel iwexununbun Belsasarin jatu yunua Daniel iwexunabu xanen ibujaida bebun nia Belsasarin yukakin:
—Judán enabu achitan Jerusalén anua en juchi Nabucodonosorin jatube mia iwenidan, ¿min jabiamen, Danieldan? 14 Mikidi ea yuikinan, Diosun Yushin kushipa min jaya min shinan xabakabijaida inun, jawaida tapinika inun, min unanepakiaki. 15 Eskawen taexun en xanen ibuai anua enabu juni unanepajaidabu en jatu kena bexun na kene unankin betsan ea jawa yuiamajaida ikanxuki, ja jancha unankin tapianmadan. 16 Jabiaskabiaken junea jancha jatu unanmakin jawada itimaskabiaken min pewatidu mikidi yuiaibu en ninkaxuki. Ja dintu kene juxupaki kene nea yuikin unantan jadidi yuitikidi min ea yuikin unanmaya xanen ibun tadi tashi jushinipa sawemakin oro teuti sawematan dabe inun besti xanen ibun yunui tsaumis anu ebe en mia tsaunkin xanen ibu waxanaii— aka
17 januxun Danielin kemakin yuikin:
—Xanen ibuun, min ea jaska inankuin yuiaidan, juni betsa inantan axanwen, min jiwe pepa anu xanen ibumakinan. Jakia eanan, ja dintu kene juxupa anu kene nea unantan jadidi yuia en mia unanmaii.
18 En mia yuixunai ea ninkawe. Jawen jancha ninkakin dasibibun jau jawen kena unankubainxanunbun min juchi Nabucodonosor kushipa wakin Dios kushipa dasibi jatu binuatun xanen ibujaida wanixun duawakubainiki. 19 Jawen kushipa Diosun ma inaniwen taea yudabu xukuabu tibi inun jancha betsa betsapawen janchamisbu min juchi bebunua datei saki saki ipaunibuki. Tsuabuda tenankatsi ikin tenankubainiki. Tsuabuda jau jiweyununbun min juchin jatu jenekubainiki. Betsa betsapa xanen ibu wakubainkin betsa betsapa jatu nuitapa wakin jatu babu wakubainiki. 20 Jakia ibubis kein: “Ea besti pe xanen ibui en kushipajaidakunkainaii”, iki juinti kushitan keainwen taexun jawen xanen ibun kushipa inun jawen pepa dasibi Diosun mebian 21 jau tadi jiweyukunkainxanun nichianbu dami betsai yuinaka keskai asno inamabe jiwexun ina awa keskakin basi pikubaini basnunman jawen yuda cha akubaina Dios kushipajaida dasibi jatu binuatun yudabun xanen ibu jatun tsuada xanen ibu wakatsis ikin jatu bechipaikin katumis tapindiama yuinaka keskai jiwekunkainkin atimas min juchin tapinkin unaniki. 22 Xanen ibujaida Belsasariin, min jawen baban min juchi jaskani unanbiai ibubis miadi kein min pe jiweamaki. 23 Jakia nai anua Jehováki kaxekin jawen Templo anua jawen kenwanti kencha ichapa jau bitanunbun min jatu yunua bitanxun ja besiaibubetan Jehován kenchawen uva vino akubainkin matun dami yushin oro inun, plata inun, bronce inun, hierro inun, ji inun, nenkati dami ichapa wanibu jabun jawa uianbuma inun, jawa ninkabuma inun, jawa unanbumajaida min jatu kenwanmaxuki. Jakia betsadan, Diosun besti mia jiwemakubainkin dasibi min jiwea mia tsuma keyubia min ja kenwainsmaki. 24-25 Jaskawen taexun ja junin jawen meken bestiwen na jancha MENÉ, MENÉ, TEKEL inun PARSÍN kene netanan, Diosun yunuaki. 26 Na jaska jancha yuiadan, eska yuiaki. Mia yuixunun ninkawe. Ja MENÉ janchadan, min xanen ibukunkainai xaba tibi mia tanaxun janu min mawaxanai Diosun ma mia unainkiki. 27 Ja TEKEL janchadan, Diosun jawen tanatiwen min xankama mia tanaidan, min jawa pemaki. 28 Ja PARSÍN janchadan, janu min xanen ibukin jatu yunubaunaidan, Diosun paxkatan namakis Media nawabu inankin namakis Persia nawabu jatu ibuwamaxanikiki— aka
29 jabiatiandi xanen ibujaida jakidi chakabu yuibia xanen ibun tadi tashi jushinipa Daniel sawemaxun oro teuti sawemakin teumatan Belsasarin dasibibu jatu yuikin:
—Dabe inun besti xanen ibun yunui tsaumis xantukun Daniel ma ebe tsauikiki, xanen ibu yununikaidan— akin Babilonia jidabi anu jau jatu yuibaununbun jatu yunua