Mai kini medan inu betsa león puben jiweabu anu Daniel mistunibukiaki, na janchadan
6
Janu jatu yunubaunai anu jau ja xanen ibu bexmaskin jatun mai pakea jau mekekubainxanunbun 120 yununikabu xanen ibu Daríon jatu katutan 2 januxun mai pakea yununikabu jau jabun jatu uinkin pewaxunkubainunbun jaskawen taexun jawen xanen ibu benui chakabukatsi ikama 3 xanen ibubu betsabu jatu binuabu jatu katudiatan janua xanen ibu pewanika betsa Daniel ikunkaini 3 unanepajaidaiwen taexun dayakin ja xanen ibu dabe betsa inun yununikabu bexmasbu dasibi jatu binuaiwen taexun xanen ibujaida Daríon shinankin: “Ea kachu Daniel xanen ibujaida en watidumenkain”, ikaya 4 jaska shinain janchai unantan Daniel danankin: “Danielkidi min shinainan, dayai peismaki”, iwanan, xanen ibujaida yuikatsi ikin ja xanen ibu bexmas dabe inun yununikabun Daniel daya chakai benaibun jakia Daniel juni pepawen taexun jawa yunu chakai bechiabumawen taexun xanen ibujaida Darío Danielkidi jawa chakabu yuiabumabiaken 5 jabiaskabiaken Danielki sinatakin danain yuinamei: “Daniel dayai jawa chakabu jayamawen taexun nun ja atidumaki. Jakia jawen mekenika Dios kenwankubainaiwen taexun nun Daniel ja atiduki, chakabuwakinan”, ika6 xanen ibujaida Daríobe janchai ja xanen ibu dabe uinkin pewanika inun yununikabu ichapa bui ja bebun mapuxun yuikin:
“Xanen ibuun, ¡jabi min jiweyukunkainxanaii, jawa bextekeamadan! 7 Xanen ibu bexmasbu inun, maewan yununikabu inun, mia medabewanikabu inun, mia dayaxunmisbu nun ichaxun shinanshinaki. Min xanen ibujaidatun yunuti bena min yunutidu nuku dasibibun eska nun shinaiin. 30 xaba kaya jamapai yushin inun dios inun junin jawen medabewati tsuan yukatidumaki. Kenwankin mia besti jau yukakubainxanunbunwen. Tsuabunda min yunuti jancha ninkakin mia akabumaken mai kini medan inu betsa león puben jiweabu anu jau jatu udenxanunbunwen. 8 Nukun jancha min bechipaiaidan, jaska jatu yunuwe. Media nawabu inun Persia nawabun beya tsuan tede akin keyutiduma chibankin min yunuti jancha mia kenexunabu min kena kenekin mestenwanwen, jau tsuan betsa wayamaxanunan”, akabu
9 jaska wabu ninkatan jatu yunua ma kenexunabu jatu bebunxun jawen kena xanen ibujaida Daríon kenekin mestenwankin jatu bisha bisha axuan 10 jawen yunuti jancha bena jawen kena kenekin Daríon ma mestenwanshina Daniel ninkatan jawen jiwe anu kai jikixun janu uxamis dintu anu Jerusalénkidi uian xui bepen keyutan xaba tibi dabe inun bestiki jaskakunkainmis keskai Diosbe janchanun ika danti ixun jawen juiwen kenwankin Diosun medabewati yukakin taewaya 11 jabiatiandi Danielin jiwe anu jatidi xanen ibubu jikibain jawen juiwen kenwankin Diosun jau medabewanun Danielin yukai ninkatan 12 taxnibaini jawen yunuti janchakidi Daríobe janchanun ika buxun ja bebun mapuxun yuikin:
—30 xaba kaya jamapai yushin inun, dios inun, junin jawen medabewati tsuan yukatidumaki. Kenwankin mia besti jau yukakubainxanunbunwen. Tsuabunda min yunuti jancha ninkabuma mai kini medan león puben jiweabu anu jau jatu udenxanunbunwen, akin min jaska jatu dasibi banabimashinaki, ¿chanimamen?— akabu
jatu kemakin Daríon yuikin:
—Jabiaskaki. Media nawabu inun Persia nawabun beya tsuan tede akin keyutiduma chibankin en yunuti jancha jau akin keyukubainxanunbunwen— jatu wa
13 januxun ana yuikin:
—Judán enabu Jerusalén anua jatu iwenibu betsa Daniel miki mesekin min jancha ninkama inun min yunuti jancha min jatu banabimashina jawa ninkamadiki. Jawen mekenika Diosun jau medabewanun xaba tibi yukamis uinkin nun ninkaxuki— akabu
14 jaska ninkatan juinti nishmajaidai: “¿Daniel jau mawayamanun jawawen en medabewatidumen? paxawakinan”, ikin Daríon benabaunkin badi jikidiama jawen yunuti jancha keneshinabu maewakatsis ikin Daríon bika teneaya 15 jakia ja jabias yununikabu ana bexun ja bebun mapubaunxun Darío yuikin:
—Xanen ibuun, Media nawabu inun Persia nawabun beya chibankin jawen nemati inun jawen yunuti jancha kenea ninkama min kenekin mestenwanmis tsuan tede akin keyutidumaki, min unanjaidaidan— akabu
16 jatun jancha ninkatan jau Daniel itanxun jau mai kini medan inu betsa león puben jiweabu anu jau udenunbun Daríon jatu yunua Daniel putadiabuma Daríon Daniel yuikin:
—Min mekenika Dios chintuanma ninkakin min kenwankubainaitun jau mia mekenunwen, min debuyamanunan— akaya
17 león puben anu Daniel udeanbu mishki sapa ewapa bexun ja kini bepukin Daniel kupiti tsuan betsan bepentiduma wakin bin dekua chabai tuis tuis ikaiwen buyatan jawen meichikiti keneyawen Daríon tsamian xanen ibu bexmas dabetun jabiaskadi wanibuki, mishki bepeanbu unanti shada wakinan. 18 Janua jawen jiwe ewapa jawendua anu xanen ibujaida Darío ka jawa piama samakei mimawaibu ninkakatsi ikama jawen dakatiki daka meshu chaitanai Danielkidi shinain uxama ishin 19 penamajaida xabakidanaya bututan mai kini medan león jiweabu anu jawaida kain 20 jaki kemaxun kaxa tenexun Daniel kenakin yuikin:
—Daniel, Dios jiweatun dayaduun, ¿min mekenika Dios chintuanma ninkakin min kenwankubainaitun león pubenbu anu mia udenbiabun nemakin mia mekeshinamen?— aka
21 kini uke medanxun Daniel benimakin jui kushipawen kemakin yuikin:
—Xanen ibuun, ¡jabi min jiweyukunkainxanaii, jawa bextekeamadan! 22 Jawen nai tsuma en mekenika Diosun yunua jau ea chakabuwayamanunbun león pubenbu jatu nemakin jatun kexa bepua ea jawa meama ishianbuki. Kanekin mikidi en jawa chakabuwama ishian Diosun unainkiki— aka
23 jaskawen taea benimajaidakin kini medanua dispiwen jau Daniel mapemanunbun xanen ibujaida Daríon jatu yunua ma mapemabu jawen mekenika Dios ikunjaidawaiwen taexun jawa piama tsua uinsisma uiainbun 24 januxun ja kachu jabun Danielki chakabuwati shinanshinabu jau jatu itanunbun Daríon jatu yunua ja junibu inun, jatun ain inun, jatun bakebu jatu itanxun león puben anu jau jatu udenunbun jatu yunua jatu uden uden akabu tin idiabuma león ishchukidan achixun jatun xeta inun jatun mentsiswen jatu jaxkakin tseka tseka axun pikin keyuaibun
25 januxun yudabu dasibi inun nawa xukuabu betsa betsapa tibi inun jancha betsa betsapawen janchamisbu mai jidabi anu jawen yunuti jancha jatu bumakin xanen ibujaida Daríon jatu kenemakin yuikin: “Jawa nuitapama unanuma jiwei man mabuyakunkainxanun jaska en matukidi shinaiin. 26 Janida en jatu yunubaunmis anuxun Danielin mekenika Dios jawa dananma jau jaki mesekin unankubainxanunbun matu dasibi en jancha en matu yunuaii.
Danielin mekenika Dios jiweaki, ikibi ikadan.
Xanen ibukunkainai tsuan keyukin yamawatidumaki,
jawen kushipa jawa keyutidumadan.
27 Chakabu anua kainmakin tsuabuda mekekin piskumatiduki.
Nai anua inun mai anua dami atimaska akin jatu uinmamiski.
León pubenen mentsis nemakin Daniel mekekin piskumashinaki”,
atan dasibibu anu jatu buma akeakenikiaki.
28 Darío xanen ibukunkaini inun chipu Persia nawa Ciro xanen ibukunkaindiaitian xanen ibu ja kachu Daniel wadianikiaki.
***************