4 Ea en Nabucodonosor en jiwe ewapa jawenduajaida anu unanuma jiwekunkaini enabube piti inun mabu pepa en jayawen taea benimakunkaini 5 jakia meshu betsatian en dakati anu daka en uxa namaya ja en bika teneaitun mesejaida en namapan ea uinma en datejaidaniki. 6 Janua en nama unanxun jau jaska jawen shinan ea yuinunbun Babilonia anua unanepabun dasibi jau ea yui benunbun en jatu yunua buxun jatu ea iyuxunabu 7 Babilonia anua mukayabu inun, yushibubu yukamisbu inun, unanepabu inun, bishiwen unanmisbu dasibi bei ea bebun mapuabu jaska en namakidi en jatu yuia jakia jaska jadidi yuiti unanbumaken 8 atimas eanu Daniel jua, jawen kena betsa Beltsasar en mekenika yushin dios keskadan, ja medan jabun mekenika medibi yushin jiwexun unanmakubainmis jabun mekenika medibi yushinen unanmakubainmis jaya ea ninkaya eska en nama en yuiniki: 9 ‘Yushibubu yukamisbu xanen ibu Beltsasariin, Dios medibi yushinen mia unanmakubainmiswen taexun dasibi tsuan unantidubuma min unan keyuaii, ean en unanan. Jaska en nama en uinshina en mia yuia ninkatan jaska jadidi yuiti ea yuiwe. 10 Dakaxun namakin eska en uinshina ea yuiniki:

13 Jakia namakin en uinkubainaya nai tsuman uinkin mekenika nai anua butuxun 14 jui kushipawen yuikin:

18 Na eska namakin en ea xanen ibujaida Nabucodonosorin en uinshinaki. Janida en jatu yunumis anu unanepabu jiweabun jaska jadidi unanbumajaidaki. Jakia Dios medibitun yushin kushipa min jayawen taexun na nama jawen unanmati mian min unaiin’, jaska ikis ea yuidiwe”, en wa

19 janua Daniel jawen kena betsa Beltsasar jaska yuiai ninkatan jawaida jawen shinan medan chakabu shinain pes nia datejaidai mesei jawa janchakatsis ikamaken jakia ea en xanen ibujaidatun yuikin: “Beltsasariin, jaska en namashina inun jaska jakidi min ea yui keyutiduwen dateyamawe. Jaska min shinain ea yuiwe”, en wa Beltsasarin ea kemakin yuikin: “En xanen ibuun, min nama pemajaida min uinshina min ea yuimakatsis ikaidan, jaska min namashina ikidan, jau miki sinataibu ixanunbunwen”, itan 20 “Ja ji min uinshina ewai ewapai keyatapai nai kuin binua mai jidabi chaijaida anuxun dasibibun uinbauntidubu 21 inun jawen pei jawendua inun jawen bimi midimajaida dasibibun pibauntidubu janu yuinaka utamisbu inun jawen mebi tibi anu isapan na wamisbudan, 22 jaskadan, xanen ibuun, ja ji keskadan, jabia min miaki, ewai min ma kushipajaidaidan. Jatu detekubainkin jatun mae tibi achikubainkin nai kuin min binua keskaki. Janida mai jidabi anu min jatu yunumisdan, jaki. 23 Ja inun, min uianyan nai tsuman uinkin mekenika nai anua butuxun yuikin: ‘Ja ji dedakin di axun chakabuwakin keyukanwen. Jakia ja mai anu jawen budu inun jawen tapun jenekanwen. Mane hierro inun mane bronce dispi chiwetameyawen jawen buduki nexatan basi bai anu jenekanwen, penaya tibi basnunman cha akubaina yuinakabubetan 7 año basi pikubainxanai jaska yuiadan. 24 Na jaska keska min ikunkainxanai keska wakin mia pewakatsi ikin Dios kushipa dasibi jatu binuatun na kupitiwen mia akatsi ma mia yunuaki. 25 Min xanen ibubiaken chai tadi yudabu paxkatan min jiwenun mia nichianbu inabube jiwexun ina awa keskakin basi min pikubainxanaii, basnunman min yuda cha akubainadan. Dios kushipajaida dasibi jatu binua yudabun xanen ibu jatun tsuada xanen ibu wakatsis ikin jatu bechipaikin katumis min tapindiama yuinaka keskai 7 año jiwekunkainkin atimas tapintan min unanxanaii. 26 Jawen budu inun jawen tapun mai anu jau jenenunbun jatu yunuaya Dios besti kushipa kayabi jaya unantan chintunkidan min ana xanen ibujaida ikunkainxanaii’, jaska Dios kushipakidi unainan. 27 Jaskawen taexun xanen ibuun, en jancha min ea chibantidumenkain, ea ninkawe. Ana ninkaismama pepas akubainwen. Min chakabu jenekubaini nuitapaibuwen nuikunkainxanwen. Jaska wakubaini unanuma jiwei min mabuyapakexanimenkain, mia kupiamadan”, anikiaki.

28 Xanen ibujaida Nabucodonosor Danielin banabimaima keska akin jabias Diosun kupikubainikiaki, jawa kaneamadan. 29 Janua año bestichai kaya Babilonia anu jawen jiwe jawendua keyatapajaida masapa anu nikaunkin uinbauni ibubis kenkin jawen medabewanikabu Nabucodonosorin 30 jatu yuikin: “Babilonia mae ewapajaida jawendua uinkanwen. En maewan uinkin en kushipa jau shinankubainxanunbun xanen ibukin nenuxun en jatu yunukubainun, iwanan, na maewan jawendua en kushipawen en jatu amakubainimaki”, jatu wai

31 janchai jenediamaken nai anua jancha taxnikin yuikin: “Xanen ibu Nabucodonosoriin, eskaki, ninkawe. Min xanen ibumisdan, ana minamaki. 32 Tadi min benanta jiwenun minabun mia nichinxankanikiki. Inabube jiwexun ina awa keskakin basi min pikubainxanaii. Dios kushipajaida dasibi jatu binuatun yudabu xukuabu tibi manibaunabu yunukin tsuabuda xanen ibu wakatsi ikin ibubis katutidu min tapindiama yuinaka keska 7 año jiwekunkainkin atimas tapintan min unanxanaii”, akaya

33 jawaida jaska yuima keska jawen kupiti banabimaima taekainkin jawen shinan yuinakapan shinan keska wawen taexun jawenabun Nabucodonosor putakin nichianbu ina awa keskakin basi pikubaini basnunman jawen yuda cha akubaina, jawen bu inun jawen mentsis ewai chaijaidai tete pei inun jawen juntsis keskanikiaki.

34 Nabucodonosorin ana yuikin: “Diosun ea kupini janu ea menekin dasibi ea betsa waya ea Nabucodonosor naiudi teskantan en uianyan en shinan pepa ana eki jikimakin kaya waya Dios kushipa jatu binu keyua jiwei ikibi ika ean duawakin kenwankin yuikin:

36 “Jabiatiandi en shinan pepa ana eki jiki keyuaya enabu ewen benimai ana eki dasixun dasibibun jau ea pe shinankubainxanunbun en jancha ninkakin ikunwainbuwen taea xanen ibujaidai en ana taekainimaki. En yusinan medabenanikabu inun en xanen ibu bexmasbun ea benai bexun enabu Caldea nawabu dasibi en ana jatu yunukubainxanun ea ana ninkakin taewabainimabuki, ja dukun en kushipani keskama ana kushipa binuawen yunukubainidan.

37 Ibubis kenkubainaibu jatu nese wakin pepa wamis inun chanima akubainmiswen taexun nai anu xanen ibu Dios duawakin jawen jancha ninkakin ea en Nabucodonosorin pepawakin xabakabi en kenwankubainaii”, jatu wani unanuma jiwekunkaini mawanikiaki.