Mane oro dami kenwanibukiaki, na janchadan
3
Januxun jatun xanen ibujaida inun jawen mekenika yushibubukidi dasibibu jatu shinanmati dami wakin jawen keyatapa 30 metro inun jawen jaxpa 3 metro mane oro dami watan jau Babilonia mai pakekauana mapanpa jawen kena Dura anu jau nichinxanunbun xanen ibujaida Nabucodonosorin jatu yunua mane dami pewanikabun ninkatan jaska jatu yunua akubainkin ma keyuxunabu 2 mai pakea ewapa xanen ibubu tibi inun, detenamenikabun xanen ibubu tibi inun, mai pakea ewapa jatiuma provincia xanen ibubu tibi inun, jatu medabewakin jatu yusin pewamisbu tibi inun, xanen ibun pei mekenikabu tibi inun, unanepabu mekenanbu tibi inun, jamapai shadabu xanen ibu bexmas tibibun ja dami jatu amaima kenwankin jau xabakabi wai benunbun Nabucodonosorin jawen tsumabu yunua jatu yuitanshinabu 3 dasibi jatu kenashina ja xanen ibubu beake beakeshina kenwain besinun ika ja dami bebun ma ichai keyuabun 4 besi taekin jatu banabimati juni betsan jui kushipawen jatu yuikin: “Yudabu xukuabu tibi anua inun jancha betsa betsapawen janchamisbu tibi anua junibu tibibuun, pesxun ea ninkakanwen. 5 Trompeta inun, tepedewe inun, cítara inun, lira inun, salterio inun, gaita inun, mimawati tibi mawaibu ninkatan danti iki beutan mane oro xanen ibujaida Nabucodonosorin jatu dami wamashina kenwankanwen. 6 Jamen tsuabuda ja dami kenwain man danti iki beutan kenwanbumaken jabudan, jawaida chi jede ji ikai anu matu udenkanikiki. Uindakanwen”, jatu wa7 janu ichai keyuabun ja mimawati mawaibun ninkai danti iki beutan mane oro dami kenwankin keyuaibun
8 Caldea nawabu Judíobuki sinatamis betsa ma janu jatu pewaxuna jaska shinain jatu chitekatsi xanen ibujaida Nabucodonosor bebun mapuxun 9 yuikin:
—Xanen ibuun, ¡jabi min jiweyukunkainxanaii, jawa bextekeamadan! ¡Min kena jau shinankubainxanunbunwen! 10 Mimawati mawaibu dasibibun ninkatan danti iki beutan mane oro dami jawaida jau kenwanunbun min ma jatu yunuxuki. 11 Tsuabuda ikabumaken chi jede ji ikai anu jau jatu udenunbun min janchadiaxuki. 12 Jakia Judíobu betsabu Babilonia mai pakekauana mekekin jau jatu mia yunuxunkubainxanunbun min jatu yunuima Sadrac inun, Mesac inun, Abed-negó jabun mikidi pe shinanbuma min mekenika yushibubu kenwanbuma mane oro dami min jatu nichinmashina jabun jawa kenwanbuma nun uiaiin— akabu
13 jaska yuiabu ninkai sinatajaidakin Sadrac inun, Mesac inun, Abed-negó jau iwenunbun Nabucodonosorin jatu yunua jatu itanxun xanen ibu bebun jatu nichianbu 14 xanen ibujaidatun jatu yukakin:
—En mekenika yushibubu inun mane oro dami en jatu yunua ashianbu man kenwanma ixudan, ¿chanimamen? 15 Mimawati mawaibu ninkakin jawaida mane oro dami en jatu amashina bebun danti iki beutan ¿man kenwantidumen, ikisdan? Jakia man kenwanmaken na jabiatian chi jede ji ikai anu matu udenkanikiki. ¿Jaska matu waibun jadatuda yushinen matu mekekin piskumatidumen?— jatu wa
16 Sadrac inun, Mesac inun, Abed-negón kemakin yuikin:
—Ja dami kenwantikidi nun mibe jaska jancha jayamaki. 17 Chi jede ji ikai inun dasibi min nukun xanen ibun nuku chakabuwakatsis ikai nukun Mekenika Dios nun kenwanmistun nemakin nuku binumatiduki. 18 Jakia nuku medabewamabia xanen ibuun, mianan, uindajaidawe. Min yushibubu nun kenwanma inun mane oro dami bebun jawa danti ixun nun kenwanmadiki— akaibuwen taea
Chi jede ji ikai anua Diosun jatu medabewa jawa menuama inibukiaki, na janchadan
19 jaska jancha wakin yuiabu Nabucodonosorin ninkatan jatuki sinata chakayamai jawen besu tashipe iki keyutan mai kini kedu anu chi kuabu jede ji ji ikai anu udenmisbu anu jatun beya binumakin ana 7ki kadu ichapa napukin jau keti wakin ji a chakayamanunbun jatu yunua keti wabu dekein keyua mesea daka ji ji ikai anu 20 Sadrac inun, Mesac inun, Abed-negó tapu manaundixun chi anu jau jatu putanunbun jawen detenamenikabu kushipa datebuma jatu yunua 21 jatun daya tadi jawendua saweabu ja dabe inun besti juni jatun meken inun jatun tae neaxun manaundixun chi dekenjaida anu jatu putabu 22 jaska xanen ibujaidatun jatu yunuai bebis jawaida akin chi dekenjaida anu detenamenikabun jatu putaibu jede bubikin jatu besti menukin tenanyan 23 jakia mai kini anu Sadrac inun, Mesac inun, Abed-negó neaxun putabu kauani chi dekenjaida anu tin ikaibun
24 jatu jaska waibu uinun ika jawaida Nabucodonosor benikain e ikin jawen unanepabun medabewamisbu yukakin:
—¿Juni dabe inun besti neaxun chi anu putakanxumen?— jatu wa
jabun kemakin yuikin:
—Jaa. Jaska wakanxuki— akabu
25 xanen ibun ana jatu yuikin:
—Jaska wabiakanxuken ean uinkinan, juni dabe inun dabe neakama chi anu mapubaunaibu jawa menui chakabuama en uiaiin. Ja betsadan, tsuan ja chi anu udeanma yushibun juni bake itsaki— ikin
26 janchakin yuikubaini kai, janu kadu kuamisbu kini kexa anu kemaxun jui kushipawen jatu kenakin:
—Sadrac inun, Mesac inun, Abed-negó Dios dasibi binuatun tsumabuun, taxnibidani nenu eanu bekanwen— jatu wa, chi jede anua ja dabe inun besti mapekei kainbidanaibun 27 xanen ibujaidatun medabewanikabu inun jawen xanen ibubu bexmasbun jatu uinun ika bei ja dabe inun besti anu icha mapuxun jatun yuda jawa chin jatu metsama inun, jatun bu jawa jatu siwakama inun, jatun tadi jawa menuama ixu uinkin jawa itsa maiai xeteabumaken
28 jabiatiandi jawaida Nabucodonosorin jatu yuikin:
—Sadrac inun, Mesac inun, Abed-negó jatun mekenika yushin Dios dasibibun ¡jau kenwankubainxanunbunwen! Jabu mawaki dateama jatun mekenika Dios ikunwain jawada yushin betsa bebun danti ixun kenwainsbuma inun ea en xanen ibun yunuti jancha jawa akabumawen taexun chiwen nun jatu kupiaya jatun mekenika Diosun jawen nai tsuma yunukin jawen dayadubu chanima chi nemaxunkin jatu medabewaxuki. 29 Natian jaska jatu medabewaxu keska yushin betsan jaska watidumawen taexun ean eskakidi en yunuaii. Yudabu inun xukuabu betsa betsapa inun jancha betsa betsapa jawen janchamisbu anuxun Sadrac inun, Mesac inun, Abed-negó jatun mekenika Dioskidi jancha chakabu tsuanda danain xanen ibubun jawen yuda bais axun mextedabetan jau jatun jiwedi tekekin janus manchinkubainxanunbunwen— jatu watan
30 chipu Babilonia mai pakekauana anu xanen ibun ja dabe inun besti daya betsa kushipajaida ana jatu inankin yununikiaki.