—En uxa namakin uinshina jawen shinan en tapinpanan jawen datei en bika teneaii— jatu wa

4 jatun Arameon janchawen unanepabun jatun xanen ibu yuikin:

—Xanen ibuun, ¡jabi min jiweyukunkainxanaii, jawa bextekeamadan! Nun min dayadudan, jadakidi min namashina nuku yuiwe, jaskada jawen shinan nun mia yuikin tapinmaidan— akabu

5 xanen ibun jatu kemakin yuikin:

—En namashinadan, ma kainkaina en jakimaki. Jakia jaska namakin en uinshina jakidi man ea yuikin unanmama matun yuda mexte mexte akin matu chudi waxankanikiki. Ja inun, matun jiwe tibi bedantan janus maspu waxankanikiki. 6 Jakia namakin jawada en uinshina inun jaska en namakidi jawen pe shinanmati xabakabi man ea yuiayadan, matu kenjaidawakin matu medabejaidawakin jamapai shadabu mabu en matu inankuinxanaii. Jaskawen taexun namakin jawada en uinshina unantan jakidi ea yuikanwen— jatu wa

7 ja kachu unanepabu betsan kemakin yuikin:

—En xanen ibuun, jaska min namashina nuku yuiwe, min nuku yuia jaska min namakin uinshina jaska ixanai xabakabi nun mia yuiaidan— akabu

8 xanen ibun ana kemakin jatu yuikin:

—En manakuti man ninkaxuwen taexun ea manamayukin man ea nemayukatsis ikaii. Man ea jaska watidudan, en unaiin. 9 Jabiaskabiaken en namashina man ea yuiamadan, jabias en kupitiwen man nuitapaxanaii. En shinan betsa ea wamakatsis ikin unanumas chani jancha ea yuinun— iwanan —yuinamekin jabias man shinaiin. Jaska en namashina besti ea yuitan, januxun ja nama en uinshina jaska ixanai man ea tapinma ninkatan en unanxanaii— jatu wa

10 unanepabun ana kemakin yuikin:

—Jawada min unankatsis ikai mai jidabi anuxun tsuan jaskatan jaskakidi mia yuitidumajaidaki. Ja dikabi xanen ibu betsabu kushipabiakin na min yuka ikai keska juni mukayabu inun, yushibu yukanikabu inun, juni unanepabu jaska jatu yukai janchaisbumaki. 11 Xanen ibuun, jawada min yuka ikaidan, bikajaidaki. Tsuan mia yuitidu jayamajaidaki, yushibubun besti atidubudan. Jakia jabudan, yudabube jiweabumaki— akabu

12 jaska waibu jatun jancha ninkatan sinatajaidakin Babilonia anu unanepabu dasibi jau jatu tenanunbun xanen ibujaida Nabucodonosorin jatu yunua 13 jaska jatu banabimakin keyutan Daniel inun jawen jaibuaibudi jatube tenanun ixun jatu benabaunaibun

14 unanepabu tenanun ika xanen ibujaida mekenikabu yununika jawen kena Ariocin Daniel bechixun achia daewakin unanxubida jancha bexuniwen jancha wakin 15 Danielin yukakin:

—¿Jaskakin nukun xanen ibujaidatun jatu tenankanwen, iwanan, jawaida matu yunuxumen?— aka jaskawen taexun jatu akai Ariocin Daniel xabakabi yuikin ninkama 16 jabe janchakatsis ikaya Nabucodonosor anu Ariocin Daniel iyua jikikain Danielin yuikin:

—Xanen ibujaidatuun, ea ninkayuwe. Jaska min namashina tapintan en mia yuitiduki. Xaba bestichai ea jeneyuwe— aka jaska wa xanen ibujaidatun ninkatan:

—Peki— aka 17-18 janua kainkaini jawen jiwe anu kai jikixun Babilonia anua unanepa betsabube jau nuku tenanyamanunbun, iwanan, jawen jaibuaibu Ananías inun, Misael inun, Azarías Danielin jatu yuia: “Jau nuku Diosun medabewanun Dios nai anua yukanankanwen”, jatu wa 19 jabias meshu medan uinmakin xanen ibun nama inun jaska ixanai yuiti Diosun Daniel unanmakin keyuken jaskawen taexun nai anua Dios kenwankin 20 na eska janchawen Danielin yuikin:

24 Dios kenwankin keyutan jaska Babilonia anua unanepabu dasibi tenankanwen, akin xanen ibujaidatun Arioc yunushina anu ana uin kaxun Danielin Arioc yuikin:

—Unanepabu nuku jatu tenanmayamawe. Jaska namashina inun jaska ixanai xabakabi en yuitiduki. Xanen ibujaida bebun ea iyuwe— aka

25 jaska wa xanen ibujaida Nabucodonosor anu Daniel iyuxun ja bebun nichinxun yuikin:

—Xanen ibuun, Judán enabu min jatu iweni anua na juni bechixun en mia iwexunaii. Min namashina inun jaska ixanai jatun mia unanmaikiaki— aka

26 januxun xanen ibujaidatun Daniel jawen kena betsa Beltsasar yukakin:

—¿Jaska en namashina inun jaska ixanai min ea yuitidumen?— aka

27 Danielin kemakin yuikin:

—Xanen ibuun, jawada min unankatsis ikai unanepabu inun, yushin yukamisbu inun, mukayabu inun, bebunkidi jaskaxanai bishiwen unanikabu tsuan jaska mia yuitidubumajaidaki. 28 Jabiaskabiaken Dios bestichai nai anu jiweatun jawada junea unanmamiski. Jaskanunbadiai min xanen ibujaidaken mia unanmashinaki. Min uxa namakin jawada min uinshina en mia unanmaii. 29 Min dakati anu dakaxun min jaska wakatsis ikaikidi min shinankin taewaya jawada junea unanmamistun min namaiwen mia uinmashinaki. 30 Ja dikabi na jabias min nama junea eadi ea uinmadiashinaki. Jaska ea unanepakin yuda betsabu en binukin taewama jakia min namakin uinshina jaska ixanai en mia unanmanun Diosun ea unanmashinaki. Min jaska shinain mia anu juxun mia uinmashina en mia jaska tapinmatiduki.

31 Xanen ibuun, min uxa namayadan, mia bebun ja dami juni itsa ewapa keyatapa chaxajaida mese pakea tibi benia nia min uinshinaki. 32 Ja damipan buxkadan, mane oro jas pepaki. Jawen xuchi inun jawen punyanan, mane plata jas pepaki. Jawen puku nashtu inun jawen kishidan, mane bronce kushipaki. 33 Jawen bikedanan, mane hierro due keska kushipaki. Jawen taedan, mane hierro kushipa inun mapu bawa kushipa jusiaki. 34 Min xanen ibun jaska uianyan mati keyatapa anua mishki ewapa bestichai tsuan jawa mekin xutuamabia jamebi tsekei mati anua tadamekidankin jawen tae tu akin chakantushia ja dami tin iki tudeke tudeke ikaya 35 jawaida mane hierro inun, mapu bawa inun, mane bronce inun, mane plata inun, mane oro ibubis tudeke tudeke iki mishpui keyushinaki, baditian xekiwan trigo tsekatan manaundixun kata kata aka niwen jawen xaka sa abainkin chai bua jawa jawen xaka betsa dakama keskaidan. Jakia mishkipan ja dami tu aka di iki mishpuaya janubi ja mishki jawen xantukun ewakauani mati itamamatan dasibi mai jidabi achi keyushinaki. Jaska min namashinaki, ja jaskadan.

36 Uxa namakin min uinshinaki. Jaska kainxanai min unankin tapinun en mia yuiaii. 37 Dami buxka min uinshinadan, jabia min miaki. Jau xanen ibu betsa betsapabun mia kenwankubainxanunbun mia kushipa wakin Dios nai anuatun mia xanen ibujaida waimawen taea xanen ibubu betsabu yunukin dasibi jatu binukubaini min xanen ibu ewapakunkainaii, 38 janida yudabu inun yuinaka inun nai anua peiyabu jiwemisbu dasibi Diosun mia ibu wamaimaxun min buxkadan, ja dami oro buxka keska mia uinmashinaki. 39 Min xanen ibukunkaini keyui mawaken pe bexmas xanen ibu betsa mina keskama ixanikiki. Ja xanen ibu mawadiaken jawen xantukun xanen ibu betsa mane bronce keskatun mai jidabi yunukubainxanikiki. 40 Ja xanen ibu mawadiaken mane hierro kushipa keska xanen ibujaida betsa juxanikiki. Mane hierro jawen mastati ewapa keskatun tude tude akin dasibi xanen ibu betsabu chakabuwaxanikiki, jatu binukinan. 41 Xanen ibuun, ja dami tae dabe inun jawen meken texpa tibi mapu bawa tude inun mane hierro tude jusia keska yuiadan, xanen ibu bestichaimatun yunukubainaibu yununikabu wakin paxkatan mane hierro keska kushipa bexmastun yunukubainxanikiki, jaska min uinshinadan. 42 Jawen tae inun jawen meken texpa shadabu mane hierro inun mapu bawa jaya jusia keskadan, ja jaska yuiadan, jabiatiandi xanen ibu kushipa inun babu ikubainxankanikiki. 43 Mane hierro inun mapu bawa jusia min uinshina keska jatun ainbu bake bitan jabe xanen ibube yubakabia ja xanen ibu kushipa ikatsi ibiakin yununika betsabu daewakubaintidubumawen taea jaska jatuki dasiama ixankanikiki, mane hierro inun mapu jusitiduma keskaidan. 44 Ja xanen ibubun yunukubainaibutian xanen ibubu betsabu keskama nai anu jiwea Diosun xanen ibu betsa katukin yununika kayabi waken tsuan jawen xanen ibu maema taskama ikunkainxanikiki. Xanen ibu betsabun kushipa keyuaya na yununika kayabi niti ikama xanen ibupakexanikiki. 45 Ja jaska mishkidi yuiadan, min uianyan mati keyatapa anua mishki ewapa bestichai tsuan mexte mexte akama ibubis tsekekidani mati anua tadamekidankin mane hierro inun, mane bronce inun, mapu bawa inun, mane plata inun, mane oro jaki tin ikin dasibi mishpu wakin keyua keskaxanai min xanen ibujaida Dios kushipajaidatun mia unankin mia uinmashinaki, jaska taxninunbadiaidan. Min namashina chanimajaidaki. Ja inun, en mia ninkamakin yuiaidan, chanimadiki— aka

46 jaska wa ninkatan Daniel bebun xanen ibujaida Nabucodonosor danti iki maiki beti itan januxun inankuin inantan xeni ininti jau kuaxununbun jawen tsumabu yunua jaska yunua akin keyuaibun 47 Nabucodonosorin Daniel yuikin:

—Na nama junea tsuan atiduma en mia jawa unanmakin yuiamabia min ea tapinmaxunwen taea chanimajaida matun mekenika Dios kushipakunkainkin yushibubu dasibi binujaidaikiki. Xanen ibubu dasibibun xanen ibudiki, jawada junea jancha unanmamisdan— atan

48 januxun jatu binumakin keyukin jau Daniel kenwankubainxanunbun mabu inankuin jawendua ichapa inantan maewan Babilonia mai pakekauana yununika waxun jabetan unanikabu jatun xanen ibu waxun jawen dayadubu dasibi xanen ibujaida Nabucodonosorin Daniel jatu binumashinken 49 jawen jaibuaibu shinankin Danielin xanen ibujaida jawen jaibuaibu jatu yukaxuna maewan Babilonia mai pakekauana anu jabudi xanen ibu wamaima januxun jatu mekekin jau jatu yunukubainxanunbun Sadrac inun, Mesac inun, Abed-negó xanen ibujaidatun jatu yunua janu jawen jaibuaibu dayakubainaibun xanen ibun jiwe ewapa jawendua anu xanen ibujaida medabewamisbube Daniel jadi tsaua dayakunkainikiaki.